ઘરે બ્લડ પ્રેશર ચેક કરતી વખતે કરો છો આ ભૂલ? જાણો સચોટ રીડિંગ મેળવવાની સાચી રીત
ઘણા લોકો પાસે ઘરે બીપી માપવાનું મશીન હોય છે, પરંતુ જો રીત ખોટી હોય તો તેની અસર તમારી સારવાર પર પડી શકે છે. સચોટ માપન માટે નીચે મુજબની પ્રક્રિયા અનુસરો:
બીપી માપતા પહેલાની તૈયારીઓ
આરામ કરો: બીપી માપતા પહેલા 10 થી 15 મિનિટ સુધી આરામદાયક ખુરશી પર પીઠ ટેકવીને શાંતિથી બેસો.
વ્યસન અને ખોરાક: બ્લડ પ્રેશર ચેક કરતા પહેલા ઓછામાં ઓછા 30 મિનિટ સુધી ધૂમ્રપાન, દારૂ કે કોફીનું સેવન ન કરો.
શારીરિક સ્થિતિ: બીપી માપતા પહેલા પેશાબ કરી લેવો જોઈએ જેથી મૂત્રાશય ખાલી રહે. ભરેલા મૂત્રાશયને કારણે રીડિંગમાં થોડો વધારો જોવા મળી શકે છે.
કસરત: માપન કરવાના થોડા સમય પહેલા કોઈ પણ પ્રકારની ભારે કસરત ન કરો.
મશીન અને કફનો સાચો ઉપયોગ
પગની સ્થિતિ: બેસતી વખતે તમારા બંને પગ જમીન પર સીધા અને સપાટ રાખો, પગ ચડાવીને (cross-legged) ન બેસો.
કફ ક્યાં લગાવવો: કાંડાના કફ કરતા બાવડા (upper arm) પર બાંધવામાં આવતો કફ વધુ સચોટ રીડિંગ આપે છે. કફને કોણીથી 1-2 આંગળી ઉપર બાંધો.
કપડાં: જે હાથ પર કફ બાંધો ત્યાં કોઈ કપડું ન હોવું જોઈએ, સીધું ચામડી પર કફ બાંધવો હિતાવહ છે.
હાથની ઊંચાઈ: તમારા હાથને ટેબલ પર એવી રીતે રાખો કે કફ તમારા હૃદયના સ્તર (Heart Level) પર રહે.
શરીરની સ્થિતિ: મીટર ચાલુ હોય ત્યારે હાથ સીધો રાખો, મુઠ્ઠી ન વાળો અને વાતચીત કરવાનું ટાળો.
દિવસમાં કેટલી વાર તપાસ કરવી જોઈએ?
સામાન્ય વ્યક્તિ માટે: જો તમને બ્લડ પ્રેશરની સમસ્યા નથી, તો વર્ષમાં 1-2 વાર ચેકઅપ પૂરતું છે.
બીપીના દર્દીઓ માટે: દિવસમાં ઓછામાં ઓછું 2 વાર (સવારે અને સાંજે) ચેક કરવું જોઈએ.
સચોટ તારણ: સતત 7 થી 10 દિવસ સુધી રીડિંગ લો અને ત્યારબાદ તેનો સરેરાશ (Average) કાઢો. આ સરેરાશ આંકડો તમારા બ્લડ પ્રેશરની સાચી સ્થિતિ દર્શાવશે.
