બ્રેડને ફ્રિજમાં રાખવી કે બહાર? જાણો તાજી અને સોફ્ટ રાખવાની સાચી રીત અને મહત્વપૂર્ણ ટીપ્સ
ઘરમાં અવારનવાર એવું બને છે કે બ્રેડનું આખું પેકેટ એકસાથે વપરાઈ જતું નથી અને કેટલીક સ્લાઈસ બચી જાય છે. આવી સ્થિતિમાં મોટાભાગના લોકોના મનમાં એ સવાલ ઊભો થાય છે કે વધેલી બ્રેડને ફ્રિજમાં રાખવી યોગ્ય છે કે રૂમ ટેમ્પરેચર પર બહાર રાખવી? જો બ્રેડને યોગ્ય રીતે સાચવવામાં ન આવે તો તે ખૂબ જ ઝડપથી બગડી જાય છે અથવા સુકાઈ જાય છે. આથી, બ્રેડને લાંબા સમય સુધી તાજી રાખવા માટે તેને સાચવવાની યોગ્ય રીત જાણવી ખૂબ જ જરૂરી છે.
બ્રેડ બહાર રાખવી કે ફ્રિજમાં: ક્યારે શું કરવું યોગ્ય છે?
બ્રેડને ક્યાં રાખવી તેનો આધાર મુખ્યત્વે હવામાન અને તમે કેટલા દિવસમાં તેનો ઉપયોગ કરવા માંગો છો તેના પર રહેલો છે:
સામાન્ય હવામાનમાં બહાર રાખવું: જો વાતાવરણમાં બહુ ગરમી કે ભેજ ન હોય અને તમે 2 થી 3 દિવસમાં બ્રેડ પૂરી કરવાના હોવ, તો તેને સામાન્ય રૂમ ટેમ્પરેચર પર રાખી શકાય છે. પરંતુ ધ્યાનમાં રાખો કે બ્રેડને તેના ઓરિજિનલ પેકેટમાં સારી રીતે બંધ કરીને કોઈ સૂકી અને છાંયડા વાળી જગ્યાએ રાખવી. સીધો સૂર્યપ્રકાશ આવતો હોય તેવી જગ્યાએ બ્રેડ ક્યારેય ન રાખવી, તેનાથી તે ઝડપથી બગડી શકે છે.
ગરમી કે ચોમાસામાં ફ્રિજમાં રાખવું: જો હવામાન ખૂબ ગરમ હોય કે ચોમાસાની ઋતુ હોય, તો બ્રેડને ફ્રિજમાં રાખવી વધુ હિતાવહ છે. ફ્રિજમાં રાખવાથી બ્રેડ પર ઉ ફૂગ (Mold) નથી લાગતી. જોકે, ફ્રિજમાં રાખવાથી બ્રેડ થોડી કડક કે સુકાઈ શકે છે. આથી જ્યારે પણ બ્રેડ ખાવી હોય, ત્યારે તેને ઉપયોગના થોડા સમય પહેલાં ફ્રિજમાંથી બહાર કાઢી લેવી અથવા હળવી ટોસ્ટ કરી લેવી. તેનાથી તેનો સ્વાદ અને મુલાયમતા પાછી આવી જાય છે.
પેકિંગ અને સ્વચ્છતાનું ખાસ ધ્યાન રાખો
બ્રેડને લાંબા સમય સુધી સારી રાખવા માટે નાની-નાની બાબતોનું ધ્યાન રાખવું જરૂરી છે. બ્રેડનું પેકેટ હંમેશાં ક્લિપ અથવા ટ્વિસ્ટ ટાઈ વડે સારી રીતે બંધ રાખવું. જો પેકેટ ખુલ્લું રહી જશે, તો બહારની હવા લાગવાથી બ્રેડની અંદરનો ભેજ ઉડી જશે અને તે એકદમ સુકાઈ જશે.
આ ઉપરાંત, બ્રેડને ક્યારેય ભીના હાથે ન અડવુ. ભીના હાથથી અડવાથી બ્રેડમાં ભેજનું પ્રમાણ વધી જાય છે અને ફૂગ આવવાની શક્યતા બેગણી થઈ જાય છે. એકવાર જરૂર મુજબની સ્લાઈસ કાઢી લીધા પછી બાકીની બ્રેડને તુરંત જ પેકેટમાં પેક કરી દેવી જોઈએ.
બગડેલી બ્રેડની ઓળખ કેવી રીતે કરવી?
જો બ્રેડ પર લીલા, કાળા કે સફેદ રંગના ટપકાં કે ધબ્બા દેખાય, તેમાંથી વિચિત્ર દુર્ગંધ આવે અથવા તો અડવાથી તે ચીકણી લાગે, તો આવી બ્રેડનો ભૂલથી પણ ખોરાકમાં ઉપયોગ કરવો નહીં. આવી બ્રેડ ખાવાથી પેટમાં ઈન્ફેક્શન કે પાચનની ગંભીર સમસ્યાઓ થઈ શકે છે.
ઘણા લોકો બ્રેડનો બગડેલો કે ફૂગવાળો ભાગ કાપીને ફેંકી દે છે અને બાકીનો સાજો દેખાતો ભાગ ખાઈ લે છે, જે આરોગ્ય માટે અત્યંત જોખમી છે. ફૂગના બેક્ટેરિયા આખી બ્રેડમાં ફેલાઈ ગયા હોય છે, તેથી આખું પેકેટ ફેંકી દેવું જ યોગ્ય છે.
લાંબા સમય સુધી સાચવવા માટે ‘ફ્રીઝર’ નો ઉપયોગ કરો
જો તમને પહેલેથી જ ખબર હોય કે બ્રેડનો ઉપયોગ આવનારા ઘણા દિવસો સુધી થવાનો નથી, તો તમે તેને ફ્રીઝર (Freezer) માં સ્ટોર કરી શકો છો. જ્યારે પણ બ્રેડની જરૂર હોય, ત્યારે ફ્રીઝરમાંથી જરૂરી સ્લાઈસ બહાર કાઢીને થોડી વાર રૂમ ટેમ્પરેચર પર રહેવા દો અથવા તવા પર શેકી લો. આ પદ્ધતિથી બ્રેડ અઠવાડિયા સુધી એકદમ તાજી રહે છે અને વારંવાર બજારમાંથી નવી બ્રેડ લાવવાની ઝંઝટમાંથી પણ મુક્તિ મળે છે.
આ બાબતોનું ખાસ ધ્યાન રાખો
બ્રેડને ક્યારેય ગેસ, માઇક્રોવેવ ઓવન કે કોઈ ગરમ સપાટીની નજીક ન રાખવી.
ઘરમાં જો નાના બાળકો હોય તો તેમને પણ સમજાવવું કે બ્રેડ કાઢ્યા પછી પેકેટને હવાચુસ્ત બંધ કરી દે.
હંમેશાં સ્વચ્છ અને સૂકી જગ્યાએ જ બ્રેડનું બોક્સ કે પેકેટ રાખવું.
આ નાની પણ મહત્વપૂર્ણ બાબતો ધ્યાનમાં રાખવાથી બ્રેડ લાંબા સમય સુધી તાજી રહે છે અને ખોરાકનો બગાડ થતો અટકે છે.
