Coronavirus Infection: કોરોનાનો અસલી આંકડો: WHO ના રિપોર્ટમાં ચોંકાવનારો ખુલાસો, સત્તાવાર આંકડા કરતા ત્રણ ગણા વધુ લોકોએ જીવ ગુમાવ્યા
કોરોના મહામારીને લઈને અત્યાર સુધી દુનિયા સમક્ષ જે આંકડા રજૂ કરવામાં આવ્યા હતા, વાસ્તવિક ચિત્ર તેના કરતા ઘણું વધારે ભયાનક હોઈ શકે છે. વર્લ્ડ હેલ્થ ઓર્ગેનાઈઝેશન (WHO) ના તાજેતરના અહેવાલમાં દાવો કરવામાં આવ્યો છે કે મહામારી દરમિયાન જેટલા લોકોના સત્તાવાર મૃત્યુ નોંધાયા છે, વાસ્તવિક સંખ્યા તેના કરતા લગભગ ત્રણ ગણી વધારે છે.

WHO ના રિપોર્ટમાં શું થયો ખુલાસો?
અહેવાલ મુજબ, વર્ષ 2020 થી 2023 વચ્ચે વિશ્વભરમાં લગભગ 2.21 કરોડ ‘વધારાના મૃત્યુ’ (Excess Deaths) થયા છે. નોંધનીય છે કે આ સમયગાળા દરમિયાન વિવિધ દેશો દ્વારા સત્તાવાર રીતે માત્ર 70 લાખ કોરોના મૃત્યુની પુષ્ટિ કરવામાં આવી હતી.
WHO એ સ્પષ્ટ કર્યું છે કે આ વધારાના મૃત્યુમાં માત્ર કોરોના સંક્રમણથી થયેલા મૃત્યુ જ સામેલ નથી, પરંતુ મહામારીની પરોક્ષ અસરોને કારણે જીવ ગુમાવનારા લોકોનો પણ સમાવેશ થાય છે.
હોસ્પિટલો પર દબાણ: મહામારી દરમિયાન આરોગ્યતંત્ર પર એટલું દબાણ હતું કે અન્ય ગંભીર બીમારી ધરાવતા દર્દીઓને સમયસર સારવાર મળી શકી ન હતી.
સ્વાસ્થ્ય સેવાઓમાં અવરોધ: લોકડાઉન અને મેડિકલ સ્ટાફની અછતને કારણે કેન્સર, હૃદયરોગ અને કિડની જેવી બીમારીઓના દર્દીઓની સારવારમાં વિલંબ થયો હતો.
વર્ષ 2021: મહામારીનો સૌથી ઘાતક તબક્કો
રિપોર્ટ અનુસાર, વર્ષ 2021 સમગ્ર મહામારી દરમિયાન સૌથી વધુ ખતરનાક રહ્યું હતું. આ એક જ વર્ષમાં દુનિયામાં આશરે 1.04 કરોડ વધારાના મૃત્યુ નોંધાયા હતા. આ તે સમય હતો જ્યારે કોરોનાના ડેલ્ટા જેવા ખતરનાક વેરિઅન્ટ્સ ઝડપથી ફેલાઈ રહ્યા હતા અને હોસ્પિટલો ઓક્સિજન, આઈસીયુ બેડ અને દવાઓની ભારે અછતનો સામનો કરી રહી હતી.
આશ્ચર્યજનક વાત એ છે કે, સંક્રમણની મોટી લહેર શાંત થયા પછી પણ તેની અસર ચાલુ રહી હતી. વર્ષ 2023 માં પણ વિશ્વભરમાં લગભગ 33 લાખ વધારાના મૃત્યુ નોંધાયા હતા, જે દર્શાવે છે કે કોરોનાની અસરો લાંબા ગાળાની હતી.

પુરૂષોમાં મૃત્યુનું જોખમ વધારે
WHO ના ડેટા મુજબ, મહામારી દરમિયાન મહિલાઓની સરખામણીમાં પુરૂષોમાં મૃત્યુનો દર ઘણો વધારે હતો.
વર્ષ 2021 માં પુરૂષોનો મૃત્યુદર મહિલાઓ કરતા 50 ટકા વધુ રહ્યો હતો.
કારણો: નિષ્ણાતો માને છે કે પુરૂષોમાં પહેલેથી રહેલી અન્ય બીમારીઓ (Co-morbidities), કામના સ્થળે વધુ જોખમ અને સારવાર લેવામાં વિલંબ આ માટે જવાબદાર હોઈ શકે છે.
આ રિપોર્ટ સાબિત કરે છે કે કોરોનાએ માત્ર શારીરિક રીતે જ નહીં, પણ સમગ્ર વિશ્વના આરોગ્ય માળખાને અંદરથી હચમચાવી દીધું હતું.
