યુએસ વિઝા ગાઇડ: B1/B2 થી લઈને H-1B સુધીના વિઝા માટે કેટલો થશે ખર્ચ? જાણો તમામ વિગતો
અમેરિકા જવાનું સ્વપ્ન દુનિયાભરના કરોડો લોકોનું હોય છે. પછી તે ત્યાં પ્રવાસ માટે જવું હોય, ઉચ્ચ અભ્યાસ કરવો હોય કે પછી નોકરી કરવી હોય, યુએસ સરકાર દરેક હેતુ માટે અલગ-અલગ શ્રેણીના વિઝા જારી કરે છે. યુનાઇટેડ સ્ટેટ્સ મુખ્યત્વે બે પ્રકારના વિઝા આપે છે: નોન-ઇમિગ્રન્ટ વિઝા (અસ્થાયી વસવાટ માટે) અને ઇમિગ્રન્ટ વિઝા (કાયમી ધોરણે વસવાટ માટે). જો તમે પણ યુ.એસ. જવાનું આયોજન કરી રહ્યા છો, તો ચાલો જાણીએ કે અમેરિકા કયા મુખ્ય વિઝા આપે છે અને તેના માટે કેટલી ફી ચૂકવવી પડે છે.
નોન-ઇમિગ્રન્ટ વિઝા: અસ્થાયી રોકાણ અને ફી
નોન-ઇમિગ્રન્ટ વિઝા એવા લોકોને આપવામાં આવે છે જેઓ ચોક્કસ સમયગાળા માટે જ અમેરિકા જવા માંગે છે અને જેમનો ઈરાદો ત્યાં કાયમી વસવાટ કરવાનો નથી હોતો.
ટૂરિસ્ટ અને બિઝનેસ વિઝા (B1/B2): જો કોઈ વ્યક્તિ યુ.એસ.માં પ્રવાસ કરવા, તબીબી સારવાર કરાવવા કે બિઝનેસ મીટિંગમાં ભાગ લેવા માંગતી હોય, તો તેને B1/B2 વિઝાની જરૂર પડે છે. તેની સરકારી અરજી ફી 185 યુએસ ડોલર (આશરે ₹15,500) છે. તાજેતરના સલામતી નિયમો હેઠળ કેટલાક વધારાના ચાર્જ પણ ઉમેરાઈ શકે છે.
સ્ટુડન્ટ અને એક્સચેન્જ વિઝા (F-1, M-1, J-1): અમેરિકી યુનિવર્સિટીઓમાં અભ્યાસ કે વોકેશનલ કોર્સ માટે જતા વિદ્યાર્થીઓને F-1 અથવા M-1 વિઝા આપવામાં આવે છે, જ્યારે રિસર્ચ કે વિનિમય કાર્યક્રમો માટે J-1 વિઝા મળે છે. તેની પ્રોસેસિંગ ફી પણ 185 યુએસ ડોલર (આશરે ₹15,500) નિયત કરવામાં આવી છે.
વર્ક વિઝા (H-1B, L-1 વગેરે): અમેરિકામાં કાનૂની નોકરી કરવા માટે વિદેશી નાગરિકોને આ વિઝા અપાય છે, જેમાં ભારતીય આઈટી પ્રોફેશનલ્સ વચ્ચે H-1B વિઝા સૌથી વધુ લોકપ્રિય છે. આ પિટિશન-આધારિત વિઝાની સરકારી ફી 205 યુએસ ડોલર (આશરે ₹17,200) છે. જોકે, વિદેશી કર્મચારીઓને સ્પોન્સર કરવા માટે અમેરિકન કંપનીઓએ અન્ય ભારે સ્પોન્સરશિપ અને કાનૂની ચાર્જ ચુકવવા પડે છે.
ઇમિગ્રન્ટ વિઝા: કાયમી વસવાટ માટેનો માર્ગ
ઇમિગ્રન્ટ વિઝા એવા લોકો માટે છે જેઓ કાયમી ધોરણે યુ.એસ.માં રહેવા અને કામ કરવા ઈચ્છે છે.
ઉદાહરણ તરીકે, જો કોઈ અમેરિકન નાગરિક અથવા ગ્રીન કાર્ડ ધારક પોતાના વિદેશી જીવનસાથી, બાળકો કે માતા-પિતાને કાયમી ધોરણે ત્યાં બોલાવવા માંગતો હોય, તો તેણે આ કેટેગરીમાં અરજી કરવી પડે છે.
એમ્બેસી પ્રોસેસિંગ ફી: સામાન્ય રીતે પ્રતિ વ્યક્તિ 325 યુએસ ડોલર (આશરે ₹27,300) થી શરૂ થાય છે.
વધારાના સરકારી ખર્ચ: એફિડેવિટ ઓફ સપોર્ટ રિવ્યૂ માટે 120 ડોલર અને યુ.એસ.માં પ્રવેશ્યા બાદ ગ્રીન કાર્ડ ઇશ્યુ કરવા માટે USCIS ને 220 ડોલર ની વધારાની ફી આપવી પડે છે.
વિઝા નિયમો અને રિફંડ પોલિસી
અમેરિકન વિઝા નિયમો અનુસાર, તમે અરજી કરતી વખતે જે પણ ફી ચૂકવો છો તે સંપૂર્ણપણે નોન-રિફન્ડેબલ (બિન-પરતપાત્ર) હોય છે. જો કોઈ કારણસર તમારી વિઝા અરજી અસ્વીકાર (Reject) થાય છે, તો પણ ચૂકવેલી ફી પરત મળતી નથી.
આ ઉપરાંત, ડોક્યુમેન્ટ ડિલિવરી, કુરિયર ચાર્જિસ અને બાયોમેટ્રિક્સના આધારે કુલ ખર્ચ થોડો વધી શકે છે. તેથી અરજી કરતા પહેલા યુ.એસ. એમ્બેસીની સત્તાવાર વેબસાઇટ પર જઈને તત્કાલીન નિયમો અને ફી માળખાની ચકાસણી કરી લેવી હિતાવહ છે.
