Skincare Tips: નવતપા પહેલાં સાવધાન! આઈસ્ક્રીમ અને કેરી વધારે ખાવાથી બગડી શકે છે ચહેરો, જાણો એક્નેથી બચવાના ઘરેલું ઉપાયો
ભારતમાં ઉનાળાની ઋતુ બરાબરની જામી છે અને ટૂંક સમયમાં જ અસહ્ય ગરમી આપતો ‘નવતપા’ પણ શરૂ થવાનો છે. આ કાળઝાળ ગરમીની શરૂઆત થતાં જ એક સમસ્યા દરેક ઘરમાં સામાન્ય જોવા મળે છે, અને તે છે ચહેરા પર ખીલ (Pimples and Acne) થવા. સામાન્ય રીતે લોકો એવું માને છે કે માત્ર ચામડી પર જામતો પરસેવો, ધૂળ-માટી અને સૂર્યનો આકરો તડકો જ ખીલ માટે જવાબદાર છે. પરંતુ સ્કીન સ્પેશિયાલિસ્ટ (ત્વચા રોગ નિષ્ણાતો) ના જણાવ્યા અનુસાર, ઉનાળામાં આપણી ખાવા-પીવાની કેટલીક ખોટી આદતો પણ આ સમસ્યાને બમણી કરવાનું કામ કરે છે.
જો તમારી ત્વચા સેન્સિટિવ અથવા ઓઇલી (તૈલીય) છે, તો ગરમીના દિવસોમાં અમુક ખાસ ખોરાક શરીરની અંદર તેલનું ઉત્પાદન વધારી દે છે, જેને કારણે ચહેરા પર મોટા ખીલ ફૂટી નીકળે છે. ચાલો જાણીએ કે ઉનાળામાં કઈ વસ્તુઓ ખાવાથી ખીલની સમસ્યા વધે છે અને તેનાથી બચવા માટે કયા ઉપાયો કરવા જોઈએ.
ઉનાળામાં ખીલની સમસ્યા વધારતા ૫ મુખ્ય ખોરાક
૧. આઈસ્ક્રીમ અને વધુ પડતી મીઠી વસ્તુઓ
ઉનાળાની ગરમીથી રાહત મેળવવા માટે લોકો અવારનવાર આઈસ્ક્રીમ, કુલ્ફી, કોલ્ડ્રિંક્સ કે મેંગો શેક જેવી વસ્તુઓ ગટગટાવતા હોય છે. આ બધી વસ્તુઓમાં સુગર (ખાંડ) અને રિફાઈન્ડ કાર્બોહાઈડ્રેટ્સનું પ્રમાણ ખૂબ વધારે હોય છે. તેના સેવનથી શરીરમાં બ્લડ શુગર અચાનક વધી જાય છે, જેના કારણે ઇન્સ્યુલિનનું સ્તર પણ ઉપર જાય છે. આ વધેલું ઇન્સ્યુલિન ત્વચાની અંદર સેબમ (કુદરતી તેલ) નું ઉત્પાદન ઝડપી બનાવે છે, જે ત્વચાના રોમછિદ્રોને બંધ કરી દે છે અને ખીલ પેદા કરે છે.
૨. કેરીનું અતિશય સેવન
ફળોનો રાજા ગણાતી કેરી વિના ઉનાળો અધૂરો છે, પરંતુ તેનો અતિરેક ત્વચા માટે નુકસાનકારક સાબિત થઈ શકે છે. કેરીમાં કુદરતી ખાંડનું પ્રમાણ વધુ હોય છે અને તેનો ગ્લાયસેમિક ઇન્ડેક્સ પણ ઊંચો હોય છે. વધુ પડતી કેરી ખાવાથી શરીરની તેલ ગ્રંથીઓ (Oil Gloss) વધુ સક્રિય બને છે, જે સીધી રીતે ખીલ થવાનું જોખમ વધારે છે.
૩. ફાસ્ટ ફૂડ અને તીખો-મસાલેદાર ખોરાક
તળેલી વસ્તુઓ, પિઝા, બર્ગર જેવા જંક ફૂડ શરીરની અંદર સોજો (Internal Inflammation) વધારે છે. બીજી તરફ, ઉનાળામાં વધુ પડતો તીખો કે ગરમ મસાલેદાર ખોરાક ખાવાથી શરીરની આંતરિક ગરમી વધે છે અને વધુ પરસેવો થાય છે. આ પરસેવો જ્યારે ત્વચા પર જામી જાય છે, ત્યારે બેક્ટેરિયાને કારણે ખીલની સમસ્યા વધુ ગંભીર બને છે.
૪. ડેરી પ્રોડક્ટ્સ (દૂધ અને દૂધની બનાવટો)
દૂધ, ચીઝ અને પનીર જેવા ડેરી ઉત્પાદનોના વધુ પડતા સેવનથી પણ શરીરમાં ઇન્સ્યુલિન અને અમુક હોર્મોન્સનું સ્તર વધી શકે છે. આ હોર્મોન્સ સેબમ પ્રોડક્શનને ઉત્તેજિત કરે છે, જેના લીધે ત્વચા વધુ ઓઇલી બને છે અને એક્નેની સમસ્યા વકરે છે.
૫. પ્રોટીન સપ્લીમેન્ટ્સ (Protein Powders)
આજકાલ જીમમાં જતા યુવાનો બોડી બનાવવા માટે વ્હે પ્રોટીન (Whey Protein) જેવા સપ્લીમેન્ટ્સ લેતા હોય છે. ઉનાળામાં આ સપ્લીમેન્ટ્સના કારણે શરીરમાં ટેસ્ટોસ્ટેરોન અને અન્ય તેલ બનાવતા હોર્મોન્સ ઉત્તેજિત થાય છે, જેના લીધે પીઠ અને ચહેરા પર મોટા અને દુખાવાવાળા ખીલ થવા લાગે છે.
ઉનાળામાં ત્વચાને સાફ અને ખીલમુક્ત રાખવાના અચૂક ઉપાયો
જો તમે ઉનાળામાં પણ ગ્લોઇંગ અને ક્લિયર સ્કીન મેળવવા માંગતા હોવ, તો તમારી લાઈફસ્ટાઈલ અને ડાયેટમાં આ ફેરફારો કરો:
ઠંડી તાસીરવાળો ખોરાક લો: તમારા રોજિંદા આહારમાં તરબૂચ, ટેટી, કાકડી, સંતરા, ગલકા, દૂધી, બેરીઝ અને લીલા પાંદડાવાળા શાકભાજી જેવી કુદરતી રીતે ઠંડક આપતી વસ્તુઓનો સમાવેશ કરો.
ભરપૂર પાણી પીવો: દિવસ દરમિયાન ઓછામાં ઓછું ૩ થી ૪ લીટર પાણી પીવો. આનાથી શરીરના ટોક્સિન્સ (ઝેરી તત્વો) બહાર નીકળી જશે અને ત્વચા કુદરતી રીતે હાઇડ્રેટેડ રહેશે.
ચહેરો સાફ રાખો: દિવસમાં બે થી ત્રણ વાર હળવા ફેસવોશથી ચહેરો ધોવો જેથી વધારાનું તેલ અને ધૂળ જમા ન થાય.
