PhonePe: શું તમે લાંબા સમયથી ફોન-પે વોલેટ વાપર્યું નથી? તો આ સમાચાર તમારા માટે છે!
ડિજિટલ પેમેન્ટના યુગમાં ફોન-પે (PhonePe) એ કરોડો ભારતીયો માટે પૈસાની લેવડ-દેવડનું મુખ્ય માધ્યમ બની ગયું છે. યુઝર્સ સરળતાથી UPI દ્વારા સીધા બેંક ખાતામાંથી પેમેન્ટ કરી શકે છે, પરંતુ કંપનીએ હવે તેના ‘ફોન-પે વોલેટ’ (PhonePe Wallet) ને લઈને એક મહત્વપૂર્ણ ફેરફાર કર્યો છે. જે યુઝર્સ લાંબા સમયથી તેમના વોલેટનો ઉપયોગ નથી કરી રહ્યા, તેમણે હવે સાવધાન રહેવાની જરૂર છે, કારણ કે કંપનીએ નિષ્ક્રિય વોલેટ પર મેન્ટેનન્સ ફી વસૂલવાનો નિર્ણય લીધો છે.
શું છે નવો નિયમ?
ફોન-પે ની નવી પોલિસી મુજબ, જો કોઈ યુઝરે છેલ્લા ૩૬૫ દિવસ (એક વર્ષ) થી વોલેટ દ્વારા કોઈ પણ પ્રકારનું નાણાકીય વ્યવહાર (Financial Transaction) કર્યું નથી, તો તે વોલેટને ‘નિષ્ક્રિય’ (Inactive) ગણવામાં આવશે. આવા નિષ્ક્રિય વોલેટ પર કંપની હવે દર ત્રીજા મહિને ૧૦૦ રૂપિયા સુધીનો મેન્ટેનન્સ ચાર્જ વસૂલશે. કંપનીના જણાવ્યા અનુસાર, આ ફી પ્લેટફોર્મની સુરક્ષા, ટેકનિકલ અપડેટ્સ અને મેન્ટેનન્સ ખર્ચને પહોંચી વળવા માટે લેવામાં આવી રહી છે.
ક્યારે વોલેટ નિષ્ક્રિય ગણાશે?
ઘણા યુઝર્સને પ્રશ્ન હોય છે કે શું એપ ખોલવાથી કે UPI પેમેન્ટ કરવાથી વોલેટ એક્ટિવ રહેશે? જવાબ છે—ના. કંપનીએ સ્પષ્ટ કર્યું છે કે માત્ર ‘ફોન-પે વોલેટ’ દ્વારા કરવામાં આવેલા વ્યવહારોને જ એક્ટિવિટી ગણવામાં આવશે.
જો તમે માત્ર UPI થી પેમેન્ટ કરો છો, તો તે વોલેટ માટે એક્ટિવિટી ગણાશે નહીં.
મોબાઈલ રિચાર્જ, બિલ પેમેન્ટ, લોન કે ઈન્શ્યોરન્સ માટે UPI નો ઉપયોગ કરવાથી વોલેટ એક્ટિવ નહીં થાય.
કેવાયસી (KYC) અપડેટ કરવાથી પણ વોલેટ એક્ટિવ ગણાશે નહીં. માત્ર વોલેટમાંથી પૈસા ઉમેરવા અથવા વોલેટમાંથી કોઈને પૈસા ચૂકવવા એ જ વ્યવહાર માન્ય ગણાશે.
૧૦૦ રૂપિયાની ફી કેવી રીતે કપાશે?
કંપની આ ફી વસૂલતા પહેલા યુઝર્સને ૧૫ દિવસનો સમય આપશે. આ સમયગાળા દરમિયાન યુઝરને વારંવાર નોટિફિકેશન મોકલીને જાણ કરવામાં આવશે. જો તમે આ ચેતવણી બાદ વોલેટમાંથી કોઈ પણ એક નાનો વ્યવહાર પણ કરશો, તો તમારું વોલેટ ફરીથી એક્ટિવ થઈ જશે અને કોઈ પણ ફી કાપવામાં આવશે નહીં. પરંતુ, જો યુઝર કોઈ જ પ્રતિક્રિયા આપશે નહીં, તો કંપની દર ત્રિમાસિક ગાળે ૧૦૦ રૂપિયા વોલેટના બેલેન્સમાંથી કાપી લેશે. જો વોલેટમાં ૧૦૦ રૂપિયાથી ઓછું બેલેન્સ હશે, તો જેટલી રકમ હશે તેટલી કાપીને બેલેન્સ ઝીરો કરી દેવામાં આવશે. રાહતની વાત એ છે કે, આ ફીને કારણે તમારું વોલેટ બેલેન્સ ક્યારેય ‘નેગેટિવ’ (ઋણ) થશે નહીં.
યુઝર્સમાં રોષ અને નિષ્ણાતોનું મંતવ્ય
ફોન-પે ના આ નિર્ણય બાદ સોશિયલ મીડિયા પર અનેક યુઝર્સે નારાજગી વ્યક્ત કરી છે. મોટાભાગના લોકો UPI નો ઉપયોગ કરે છે અને વોલેટને માત્ર એક વિકલ્પ તરીકે રાખે છે. યુઝર્સનું કહેવું છે કે, જે સુવિધાનો અમે ઉપયોગ જ નથી કરતા, તેના માટે ચાર્જ ચૂકવવો તે યોગ્ય નથી. જોકે, ડિજિટલ વોલેટ સેક્ટરમાં આ પ્રકારના ચાર્જ નવા નથી. અગાઉ મોબિક્વિક (MobiKwik) અને એરટેલ પેમેન્ટ્સ બેંકે પણ નિષ્ક્રિય વોલેટ માટે મેન્ટેનન્સ ચાર્જ લાગુ કર્યા હતા.
