Women Health: ગરમી, ડિહાઇડ્રેશન અને પીરિયડ્સ પેઇન: આ ઉનાળે સ્ત્રીઓએ આ રીતે રાખવી પડશે પોતાની ખાસ સંભાળ
જ્યારે ઉનાળામાં તાપમાન 40 ડિગ્રીને પાર કરી જાય છે, ત્યારે તેની અસર માત્ર બહાર જ નહીં પણ આપણા શરીરની આંતરિક પ્રણાલી પર પણ પડે છે. ખાસ કરીને મહિલાઓ માટે આ સમયગાળો વધુ કષ્ટદાયક સાબિત થાય છે, કારણ કે ગરમીને લીધે માસિક ધર્મ દરમિયાન થતી પીડા અને અસ્વસ્થતા વધી જાય છે.
ગરમી અને પીડા વચ્ચેનો સંબંધ: ઉનાળામાં શરીર ખૂબ જ ઝડપથી ડિહાઇડ્રેટ થાય છે, એટલે કે શરીરમાં પાણીની અછત સર્જાય છે. જ્યારે શરીરમાં પાણી ઓછું હોય ત્યારે સ્નાયુઓમાં ખેંચાણ (Cramps) વધે છે. ગરમીને કારણે થતો પરસેવો શરીરની ઊર્જા સોષી લે છે, જેના પરિણામે અશક્તિ, થાક અને પેટના નીચેના ભાગમાં થતો દુખાવો પહેલા કરતા વધુ તીવ્ર લાગે છે. ઉમસ (Humidity) ને કારણે બ્લડ સર્ક્યુલેશન પર પણ અસર પડે છે, જે સ્ત્રીઓમાં ચીડિયાપણું અને ભારેપણું વધારે છે.
રાહત મેળવવા માટેના સરળ અને સચોટ ઉપાયો:
નિષ્ણાતો અને ડોક્ટરોના મતે, ઉનાળામાં પીરિયડ્સના દુખાવાને ઓછો કરવા માટે જીવનશૈલીમાં આ ફેરફારો કરવા ખૂબ જરૂરી છે:
હાઈડ્રેશન છે સૌથી મોટું હથિયાર: દિવસભર પુષ્કળ પાણી પીવો. માત્ર સાદું પાણી જ નહીં, પણ નાળિયેર પાણી, લીંબુ શરબત કે છાશનું સેવન કરો. આનાથી શરીરમાં ઈલેક્ટ્રોલાઈટ્સનું પ્રમાણ જળવાઈ રહેશે અને સ્નાયુઓની ખેંચાણ ઓછી થશે.
ખાનપાનમાં સાવધાની: ગરમીમાં તેલવાળો, વધુ પડતો મસાલેદાર કે જંક ફૂડ ખાવાનું ટાળો. તેના બદલે તાજા ફળો (તરબૂચ, ટેટી), સલાડ અને દહીંનો આહારમાં સમાવેશ કરો. દહીં પેટને ઠંડક આપે છે અને પાચનતંત્ર સુધારે છે.
કેફીનથી અંતર: ઉનાળામાં વધુ પડતી ચા કે કોફી પીવાનું ટાળો. કેફીન શરીરને વધુ ડિહાઇડ્રેટ કરે છે અને પેટમાં ગેસ કે બ્લોટિંગ વધારીને દુખાવો તેજ કરી શકે છે.
ગરમ પાણીનો શેક (Heat Bag): ભલે બહાર ગરમી હોય, પણ પીરિયડ્સના દુખાવામાં પેટ પર ગરમ પાણીની થેલી રાખવાથી ગર્ભાશયના સ્નાયુઓને આરામ મળે છે અને લોહીનો પ્રવાહ સુધરે છે.
હળવી કસરત અને યોગ: આ સમયગાળામાં ભારે વર્કઆઉટ ન કરો, પરંતુ હળવી સ્ટ્રેચિંગ કે ‘બાલાસન’ અને ‘ભદ્રાસન’ જેવા યોગાભ્યાસ કરવાથી શરીર રિલેક્સ થાય છે અને માનસિક તણાવ ઓછો થાય છે.
પોતાની સંભાળ રાખવી એ જ ખરી દવા: પીરિયડ્સ એ એક કુદરતી પ્રક્રિયા છે, પરંતુ ઉનાળામાં તે વધુ સંવેદનશીલ બની જાય છે. તમારા શરીરના સંકેતોને સમજો. જો દુખાવો અસહ્ય બની જાય અથવા ચક્કર આવવા જેવી સમસ્યા થાય, તો તેને અવગણશો નહીં અને તાત્કાલિક ડોક્ટરની સલાહ લો. પૂરતી ઊંઘ લો અને બને તેટલો તણાવ મુક્ત રહેવાનો પ્રયત્ન કરો. થોડી કાળજી, યોગ્ય આહાર અને સકારાત્મક દિનચર્યા દ્વારા તમે આ મુશ્કેલ દિવસોને સરળ બનાવી શકો છો.
