Hair Care: વરસાદમાં જ કેમ સૌથી વધુ તૂટે છે વાળ? આ રીતે રાખો સંભાળ, નહીં થાય ડૅન્ડ્રફ કે ઇન્ફેક્શનની સમસ્યા
ચોમાસાની ઋતુ કાળઝાળ ગરમીમાંથી ચોક્કસપણે રાહત અપાવે છે, પરંતુ આ જ હવામાન આપણા વાળ માટે ઘણી બધી સમસ્યાઓ લઈને આવે છે. વરસાદના દિવસોમાં હવામાં ભેજનું પ્રમાણ અચાનક વધી જાય છે, જેના કારણે માથાની ત્વચા (સ્કલ્પ) વધુ પડતી તેલીય (ઓયલી) થઈ જાય છે. પરિણામે ખોડો (ડૅન્ડ્રફ), ખંજવાળ, ફંગલ ઇન્ફેક્શન અને વાળ ખરવા જેવી સમસ્યાઓ ઝડપથી વધવા લાગે છે.
ઘણા લોકો આ સમસ્યાથી બચવા માટે મોંઘા મોંઘા કેમિકલયુક્ત હેર પ્રોડક્ટ્સનો ઉપયોગ કરવા લાગે છે, પરંતુ તેનો ફાયદો લાંબા સમય સુધી મળતો નથી. સાચી સંભાળ, ઘરગથ્થુ ઉપચારો અને સંતુલિત આહાર અપનાવીને ચોમાસામાં પણ વાળને મજબૂત અને સ્વસ્થ રાખી શકાય છે.
ચોમાસામાં જ સૌથી વધુ વાળ કેમ તૂટે છે?
ચોમાસા દરમિયાન વધેલો ભેજ વાળના મૂળને નબળા બનાવી દે છે. આ સિવાય વાળમાં સતત રહેતો ભેજ સ્કલ્પ પર ફંગલ ઈન્ફેક્શન અને ખોડાનું પ્રમાણ વધારી દે છે.
પ્રદૂષિત પાણી: વરસાદનું પાણી વાતાવરણના ધૂળ-માટી અને પ્રદૂષણ સાથે ભળીને માથા પર જમા થાય છે, જેનાથી વાળના છિદ્રો (પોર્સ) બંધ થઈ જાય છે.
ગૂંચવાતા વાળ: ભીના વાળ ખૂબ જ ઝડપથી ગૂંચવાઈ જાય છે અને જ્યારે કાસકો ફેરવવામાં આવે ત્યારે તે સરળતાથી તૂટવા લાગે છે.
વિટામિન D ની કમી: ચોમાસામાં પૂરતો તડકો ન મળવાને કારણે શરીરમાં વિટામિન D નું સ્તર ઘટે છે, જેની સીધી અસર વાળના સ્વાસ્થ્ય પર પડે છે.
ચોમાસામાં વાળની સંભાળ કેવી રીતે રાખવી?
૧. સ્કલ્પને સાફ અને કોરી રાખો
અઠવાડિયામાં ૨ થી ૩ વાર માઈલ્ડ અને સલ્ફેટ-ફ્રી શેમ્પૂથી વાળ ધોવા જોઈએ. વાળને લાંબો સમય ભીના ન રહેવા દો. વરસાદમાં પલળી જાઓ તો ઘરે આવીને તરત જ સાદા પાણીથી વાળ ધોઈને માઈક્રોફાઈબર ટુવાલથી હળવા હાથે લૂછી લેવા.
૨. હળવા કન્ડીશનરનો ઉપયોગ
ચોમાસામાં વાળ શુષ્ક અને ગૂંચવાયેલા બને છે. આ માટે હળવા કન્ડીશનરનો ઉપયોગ કરો. ધ્યાન રાખો કે કન્ડીશનર સ્કલ્પ પર લગાવવાને બદલે માત્ર વાળની લંબાઈ અને છેડા પર જ લગાવવું.
૩. નિયમિત તેલ માલિશ (ઓઇલ મસાજ)
વાળ ધોવાના એક કલાક પહેલા નારિયેળ તેલ, બદામ તેલ અથવા રોઝમેરી ઓઇલથી ૫ થી ૧૦ મિનિટ હળવા હાથે માલિશ કરો. આનાથી માથામાં બ્લડ સરક્યુલેશન સુધરે છે અને મૂળ મજબૂત થાય છે.
૪. ટાઈટ હેરસ્ટાઈલ ટાળો
ખૂબ કસીને ચોટલો કે પોનીટેલ બાંધવાથી વાળના મૂળ પર ખેંચાણ આવે છે, જેથી વાળ વધુ તૂટે છે. ચોમાસામાં વાળને થોડા ઢીલા રાખવાનો પ્રયાસ કરો.
૫. સંતુલિત આહાર અને પૂરતું પાણી
પ્રોટીનથી ભરપૂર ખોરાક જેમ કે ઈંડા, કઠોળ, પનીર અને ડ્રાયફ્રૂટ્સ આહારમાં સામેલ કરો. સાથે જ વિટામિન C ધરાવતા ખાટા ફળો અને લીલા શાકભાજી ખાઓ. દિવસ દરમિયાન પૂરતા પ્રમાણમાં પાણી પીવું પણ જરૂરી છે.
૬. હીટ સ્ટાઈલિંગ પ્રોડક્ટ્સનો ઓછો ઉપયોગ
બ્લો ડ્રાયર, સ્ટ્રેટનર કે કર્લિંગ મશીનનો વધુ પડતો ઉપયોગ વાળને વધુ નબળા બનાવે છે. વાળને કુદરતી રીતે જ સુકાવા દો. આ સિવાય દર ૬ થી ૮ અઠવાડિયે વાળને ટ્રીમ કરાવવાથી બે મોં વાળા વાળની સમસ્યાથી છુટકારો મળે છે.
