iOS 26.5 Update: હવે iPhone પર દેખાશે ‘લોક આઈકન’; Android સાથે મેસેજિંગ કરવું બનશે પહેલા કરતા વધુ પ્રાઈવેટ
સ્માર્ટફોન યુઝર્સ લાંબા સમયથી રાહ જોઈ રહ્યા હતા કે iPhone અને Android વચ્ચે થતી વાતચીત પણ એટલી જ સુરક્ષિત બને જેટલી WhatsApp અથવા iMessage પર હોય છે. હવે આખરે Apple અને Google એ સાથે મળીને આ દિશામાં ઐતિહાસિક પગલું ભર્યું છે. બંને કંપનીઓએ જાહેરાત કરી છે કે iPhone અને Android વચ્ચે મોકલવામાં આવતા RCS (Rich Communication Services) મેસેજ હવે ‘એન્ડ-ટુ-એન્ડ એન્ક્રિપ્શન’ (End-to-End Encryption – E2EE) સાથે આવશે.
iOS 26.5 અપડેટ સાથે નવી શરૂઆત
Apple દ્વારા આ નવું ફીચર iOS 26.5 અપડેટ દ્વારા રોલઆઉટ કરવાનું શરૂ કરી દીધું છે. આનો અર્થ એ છે કે હવે અલગ-અલગ પ્લેટફોર્મ (Cross-Platform) પર ચેટ કરવા વાળા યુઝર્સને પણ ઉચ્ચ કક્ષાની પ્રાઈવસી અને સિક્યોરિટી મળશે. અત્યાર સુધી એન્ડ્રોઇડથી આઇફોન પર મેસેજ મોકલતી વખતે સુરક્ષાના કેટલાક પ્રશ્નો રહેતા હતા, જે હવે ઉકેલાઈ ગયા છે.
પહેલા શું ખામી હતી?
Apple એ iOS 18 ની સાથે iPhone માં RCS સપોર્ટ શરૂ કર્યો હતો. આનાથી iPhone યુઝર્સને ટાઈપિંગ ઈન્ડિકેટર, રીડ રિસીપ્ટ (મેસેજ વંચાયો છે કે નહીં તેની જાણકારી) અને હાઈ ક્વોલિટી ફોટો-વીડિયો શેરિંગ જેવા ફીચર્સ મળ્યા હતા. જોકે, તે સમયે સૌથી મહત્વની બાબત એટલે કે ‘એન્ડ-ટુ-એન્ડ એન્ક્રિપ્શન’ ઉપલબ્ધ નહોતું. મેસેજ સુરક્ષિત તો હતા પણ સંપૂર્ણપણે પ્રાઈવેટ નહોતા ગણાતા. હવે iOS 26.5 સાથે આ ખામી દૂર થઈ ગઈ છે.
શું છે આ ‘એન્ડ-ટુ-એન્ડ એન્ક્રિપ્શન’?
એન્ડ-ટુ-એન્ડ એન્ક્રિપ્શન એ એક એવી સુરક્ષા ટેકનિક છે જેમાં મેસેજ ડિજિટલ રીતે લોક થઈ જાય છે. આ મેસેજને માત્ર મોકલનાર અને મેળવનાર જ વાંચી શકે છે. આનો સૌથી મોટો ફાયદો એ છે કે વચ્ચે કોઈ ત્રીજી વ્યક્તિ, હેકર, કંપની કે નેટવર્ક ઓપરેટર પણ તે મેસેજને વાંચી શકતા નથી. ખુદ Apple અને Google પણ તમારી અંગત વાતચીતને એક્સેસ કરી શકશે નહીં.
સુરક્ષા માટે યુનિક કોડ અને લોક આઈકન
Google ના જણાવ્યા અનુસાર, દરેક એન્ક્રિપ્ટેડ ચેટ માટે એક યુનિક વેરિફિકેશન કોડ બનાવવામાં આવશે. જ્યારે કોઈ RCS ચેટ સંપૂર્ણ સુરક્ષિત હશે, ત્યારે iPhone યુઝર્સને ચેટ વિન્ડોમાં ‘RCS Encrypted’ સાથે એક નાનું લોક (Lock) આઈકન દેખાશે. તેવી જ રીતે, Android યુઝર્સને Google Messages એપમાં લોક સિમ્બોલ જોવા મળશે, જે સાબિત કરશે કે તમારી વાતચીત પ્રાઈવેટ છે.
ક્યારે મળશે આ ફીચર?
હાલમાં આ ફીચર બીટા સ્ટેજમાં ઉપલબ્ધ છે અને તેને કેટલાક ટેલિકોમ કેરિયર્સ સાથે ટેસ્ટ કરવામાં આવી રહ્યું છે. આગામી થોડા મહિનાઓમાં તે તમામ યુઝર્સ સુધી પહોંચી જશે. Apple નું કહેવું છે કે iOS 26.5 અપડેટ ઇન્સ્ટોલ કર્યા પછી iPhone માં આ ફીચર આપમેળે એક્ટિવ થઈ જશે. એન્ડ્રોઇડ યુઝર્સે આ માટે Google Messages એપનું લેટેસ્ટ વર્ઝન વાપરવું પડશે.
ડિજિટલ પ્રાઈવસીના આ યુગમાં Apple અને Google નું આ જોડાણ યુઝર્સનો ભરોસો વધારશે અને હવે પ્લેટફોર્મ ગમે તે હોય, તમારી વાતચીત હંમેશા ખાનગી રહેશે.
