Tea And Health: ગ્રીન ટી કે સામાન્ય ચા? જાણો તમારા માટે શું છે બેસ્ટ અને ક્યારે પીવી?
ભારતમાં દિવસની શરૂઆત મોટાભાગે ચાના કપ સાથે થાય છે. કોઈને ‘બેડ ટી’ ગમે છે તો કોઈ દિવસભર ચાના શોખીન હોય છે. પરંતુ શું તમે ક્યારેય વિચાર્યું છે કે તમારી ઉંમર અને સ્વાસ્થ્ય અનુસાર કેટલી ચા પીવી જોઈએ? જરૂરિયાત કરતા વધુ ચા પીવાની આદત શરીર પર લાંબા ગાળે નકારાત્મક અસર કરી શકે છે.
ચાયના સ્વસ્થ વિકલ્પો અને ફાયદા
હેલ્થલાઇન જેવી જાણીતી હેલ્થ વેબસાઇટ્સ અનુસાર, ચામાં રહેલું કેફીન અને અન્ય સંયોજનો શરીરને ઊર્જા તો આપે છે, પરંતુ જો તેનું સેવન મર્યાદા બહાર જાય તો તે નુકસાનકારક પણ બની શકે છે. તાજેતરના વર્ષોમાં ‘ગ્રીન ટી’ ખૂબ જ લોકપ્રિય બની છે, કારણ કે તેમાં ‘કેટેચિન’ નામના શક્તિશાળી એન્ટીઑકિસડન્ટો હોય છે. વિવિધ સંશોધનો મુજબ, આ તત્વો હૃદયના રોગો, ટાઇપ-2 ડાયાબિટીસ અને અમુક પ્રકારના કેન્સરના જોખમને ઘટાડવામાં મદદરૂપ થઈ શકે છે. ઉપરાંત, નિયમિત ગ્રીન ટીનું સેવન મેટાબોલિઝમ વધારીને વજન ઘટાડવામાં પણ અસરકારક સાબિત થાય છે.
એક દિવસમાં કેટલી ચા પીવી યોગ્ય છે?
ચાનું પ્રમાણ દરેક વ્યક્તિની ઉંમર, સ્વાસ્થ્ય સ્થિતિ અને જીવનશૈલી પર આધાર રાખે છે.
કિશોરો અને યુવાનો: દિવસમાં 1 થી 2 કપથી વધુ કેફીનયુક્ત ચા ન પીવી જોઈએ.
સ્વસ્થ પુખ્ત વયના લોકો: દિવસમાં 3 થી 5 કપ ગ્રીન ટીનું સેવન સ્વાસ્થ્ય માટે ફાયદાકારક માનવામાં આવે છે.
ગર્ભવતી મહિલાઓ: તેમને કેફીનનું પ્રમાણ ખૂબ જ મર્યાદિત રાખવાની સલાહ આપવામાં આવે છે. નિષ્ણાતોના મતે સમગ્ર દિવસ દરમિયાન 300 મિલિગ્રામથી વધુ કેફીન લેવું જોખમી હોઈ શકે છે.
અતિશય સેવનના ગેરફાયદા
જ્યારે શરીરમાં કેફીનનું પ્રમાણ વધી જાય છે, ત્યારે વ્યક્તિ બેચેની, ઊંઘની અછત (ઇન્સોમ્નિયા), સતત માથાનો દુખાવો, એસિડિટી અને પાચન સંબંધિત સમસ્યાઓનો અનુભવ કરી શકે છે. વધુ પડતી ચા પીવાથી શરીરમાં એંગ્ઝાયટીનું સ્તર પણ વધી શકે છે, જે માનસિક સ્વાસ્થ્યને અસર કરે છે.
ચા પીતી વખતે ધ્યાનમાં રાખવાની મહત્વની બાબતો
માત્ર ચાની માત્રા જ નહીં, પણ તેનો સમય પણ ખૂબ મહત્વનો છે:
ખાલી પેટે ચા ન પીવો: ખાલી પેટે ચા પીવાથી એસિડિટીની સમસ્યા વધી શકે છે અને પાચનતંત્ર બગડી શકે છે.
જમ્યા પછી તરત ચા ટાળો: ભોજનના તરત બાદ ચા પીવાથી શરીર દ્વારા આયર્ન (લોહતત્વ)નું શોષણ ઘટી જાય છે, જે એનિમિયા જેવી સમસ્યાઓ નોતરી શકે છે.
સંતુલન જાળવો: ચાને સંપૂર્ણપણે છોડવાની જરૂર નથી, પરંતુ તેને તમારા દૈનિક રૂટિનમાં સંતુલિત રીતે સામેલ કરવી જોઈએ.
