સુપ્રીમ કોર્ટમાં CJI સાથે દુર્વ્યવહાર કરવો વકીલને ભારે પડ્યો, અવમાનનાની નોટિસ ફટકારાઈ
ભારતની સર્વોચ્ચ અદાલત સુપ્રીમ કોર્ટમાં મુખ્ય ન્યાયાધીશ સીજેઆઈ સૂર્યકાંત સાથે થયેલા દુર્વ્યવહારનો મામલો હવે ગંભીર કાનૂની વળાંક પર પહોંચ્યો છે. 16 નવેમ્બરના રોજ કોર્ટની કાર્યવાહી દરમિયાન અયોગ્ય વર્તન કરનાર વકીલ પ્રવીણ સિંઘલ સામે સુપ્રીમ કોર્ટે અવમાનનાની કાર્યવાહી શરૂ કરવા માટે નોટિસ જાહેર કરી છે. આ કાર્યવાહી સુપ્રીમ કોર્ટ બાર એસોસિએશન એટલે કે એસસીબીએ દ્વારા દાખલ કરવામાં આવેલી અરજીના આધારે કરવામાં આવી છે. કોર્ટે વકીલને જવાબ રજૂ કરવા માટે 20 જાન્યુઆરી, 2027 સુધીનો સમય આપ્યો છે. આ મામલે હવે આગામી સુનાવણી જાન્યુઆરી મહિનામાં હાથ ધરવામાં આવશે.

સુપ્રીમ કોર્ટ બાર એસોસિએશને કરી હતી કાર્યવાહી
આ સમગ્ર મામલે સુપ્રીમ કોર્ટ બાર એસોસિએશને મહત્ત્વપૂર્ણ ભૂમિકા ભજવી છે. એસોસિએશને એટર્ની જનરલ પાસેથી કોર્ટની અવમાનનાની કાર્યવાહી શરૂ કરવાની મંજૂરી મેળવ્યા બાદ વકીલ પ્રવીણ સિંઘલ સામે અરજી દાખલ કરી હતી. આ અરજી પર સુનાવણી દરમિયાન સોલિસિટર જનરલ તુષાર મહેતા પણ કોર્ટમાં હાજર રહ્યા હતા. તેમણે પણ એસોસિએશનની અરજીને સમર્થન આપ્યું હતું. ત્યારબાદ જસ્ટિસ દીપાંકર દત્તા, જસ્ટિસ જોયમાલ્ય બાગચી અને જસ્ટિસ વી. મોહનાની ત્રણ સભ્યોની બેન્ચે રજૂ કરવામાં આવેલા દસ્તાવેજોનો અભ્યાસ કર્યો હતો અને પ્રાથમિક રીતે કાર્યવાહી આગળ વધારવા માટે પૂરતું કારણ હોવાનું જણાવ્યું હતું.
વકીલને 20 જાન્યુઆરી સુધીમાં જવાબ આપવા આદેશ
સુનાવણી દરમિયાન સુપ્રીમ કોર્ટની બેન્ચે સ્પષ્ટ કર્યું હતું કે સામે આવેલા દસ્તાવેજોના આધારે પ્રવીણ સિંઘલ વિરુદ્ધ અવમાનનાની કાર્યવાહી શરૂ કરવા માટે એસસીબીએના પ્રસ્તાવ પર આગળ વધવું યોગ્ય જણાય છે. આ સાથે કોર્ટે તેમને નોટિસ પાઠવીને પોતાનો જવાબ રજૂ કરવાનો આદેશ આપ્યો છે. વકીલે 20 જાન્યુઆરી, 2027 સુધીમાં નોટિસનો જવાબ આપવાનો રહેશે. બીજી તરફ એસસીબીએના અધ્યક્ષ પ્રદીપ રાયે કોર્ટને જણાવ્યું હતું કે પ્રવીણ સિંઘલ અગાઉ પણ ન્યાયતંત્ર અંગે વિવાદાસ્પદ નિવેદનો આપી ચૂક્યા છે. સોશિયલ મીડિયા પર પણ તેમણે ન્યાયતંત્રને લઈને વાંધાજનક પોસ્ટ કરી હોવાનો દાવો કરવામાં આવ્યો છે.
16 નવેમ્બરે કોર્ટમાં આખરે શું થયું હતું?
આ વિવાદની શરૂઆત 16 નવેમ્બરના રોજ સુપ્રીમ કોર્ટમાં થયેલી સુનાવણી દરમિયાન થઈ હતી. મુખ્ય ન્યાયાધીશ સૂર્યકાંત, જસ્ટિસ જોયમાલ્ય બાગચી અને જસ્ટિસ વી. મોહનાની બેન્ચ કાર્યવાહી માટે બેઠી હતી. તે સમયે વકીલ પ્રવીણ સિંઘલે ન્યાયતંત્રમાં કથિત ભ્રષ્ટાચાર સંબંધિત પોતાની દલીલો પર તાત્કાલિક સુનાવણી કરવાની માગ કરી હતી. તેમણે જણાવ્યું હતું કે આ મુદ્દે 2 નવેમ્બરના રોજ સીજેઆઈની કચેરીને પત્ર લખવામાં આવ્યો હતો, પરંતુ હજુ સુધી કોઈ જવાબ મળ્યો નથી. આ મામલે બેન્ચે તેમને કોર્ટની પ્રક્રિયાનું પાલન કરવા જણાવ્યું હતું.
સીજેઆઈને જ કહી દીધું કે તમે આ ખુરશી માટે લાયક નથી
સુનાવણી દરમિયાન જસ્ટિસ વી. મોહનાએ વકીલને સમજાવ્યું હતું કે આ રીતે કોઈપણ કેસનો ઉલ્લેખ કરી શકાય નહીં. જોકે, વકીલ પોતાની વાત પર અડગ રહ્યા હતા. ત્યારબાદ સીજેઆઈ સૂર્યકાંતે તેમને કહ્યું હતું કે તેમની વાત પર વિચાર કરવામાં આવશે અને હાલ તેમણે રાહ જોવી જોઈએ. પરંતુ વકીલે રાહ જોવાનો ઇનકાર કરી દીધો હતો. તેમણે કોર્ટમાં કહ્યું હતું કે તેઓ રાહ નહીં જુએ. આટલું જ નહીં, તેમણે મુખ્ય ન્યાયાધીશને સંબોધીને કહ્યું હતું કે તેઓ આ ખુરશી પર બેસવાને લાયક નથી. આ વર્તન બાદ સુરક્ષા કર્મચારીઓએ વકીલને કોર્ટરૂમની બહાર લઈ ગયા હતા.

હવે જાન્યુઆરીમાં થશે આગામી સુનાવણી
સુપ્રીમ કોર્ટમાં થયેલી આ ઘટનાને ન્યાયતંત્રની ગરિમા અને કોર્ટની શિસ્ત સાથે જોડીને જોવામાં આવી રહી છે. કોર્ટમાં વકીલોને પોતાની દલીલો રજૂ કરવાનો અધિકાર છે, પરંતુ તે માટે નક્કી કરવામાં આવેલી પ્રક્રિયા અને નિયમોનું પાલન કરવું પણ જરૂરી છે. આ જ કારણસર સુપ્રીમ કોર્ટ બાર એસોસિએશને આ મામલે કાનૂની કાર્યવાહી કરવાની માગ કરી હતી. હવે સુપ્રીમ કોર્ટ દ્વારા જાહેર કરવામાં આવેલી નોટિસ બાદ પ્રવીણ સિંઘલ શું જવાબ રજૂ કરે છે તેના પર સૌની નજર રહેશે. જાન્યુઆરી 2027માં યોજાનારી આગામી સુનાવણીમાં આ મામલે વધુ સ્પષ્ટતા થવાની શક્યતા છે.
