રાહુલ ગાંધીના સમર્થનમાં વિદેશી નેતાની નારેબાજી? ભારત સમિટ વિવાદમાં SIT તપાસની માંગ
હૈદરાબાદમાં યોજાયેલી ભારત સમિટ 2026 હવે રાજકીય વિવાદનું કેન્દ્ર બની છે. આ કાર્યક્રમમાં વિદેશી રાજકીય પ્રતિનિધિઓની ભાગીદારી અને ભારતીય રાજકારણને લગતી તેમની ટિપ્પણીઓ સામે વાંધો ઉઠાવવામાં આવ્યો છે. મામલો હવે સુપ્રીમ કોર્ટ સુધી પહોંચ્યો છે. એક વકીલે બંધારણના અનુચ્છેદ 32 હેઠળ અરજી દાખલ કરીને વિદેશી પ્રતિનિધિઓની રાજકીય પ્રવૃત્તિઓને ભારતની આંતરિક બાબતોમાં હસ્તક્ષેપ ગણાવ્યો છે.

ઇટાલીના નેતાએ લગાવ્યો ‘વોટ ચોર, ગદ્દી છોડ’નો નારો
આ વિવાદનું મુખ્ય કારણ 13 અને 14 નવેમ્બર દરમિયાન હૈદરાબાદમાં યોજાયેલી ભારત સમિટમાં બનેલી ઘટના છે. અરજીમાં આક્ષેપ કરવામાં આવ્યો છે કે ઇટાલીના રાજકારણી અને પાર્ટી ઓફ યુરોપિયન સોશિયાલિસ્ટ્સના મહાસચિવ જિયાકોમો ફિલિબેકે કાર્યક્રમ દરમિયાન ‘વોટ ચોર, ગદ્દી છોડ’ના નારા લગાવ્યા હતા. આ નારાને ભારતીય રાજકીય સંદર્ભમાં મહત્વપૂર્ણ માનવામાં આવી રહ્યો છે. કારણ કે આ નારો કોંગ્રેસ અને રાહુલ ગાંધીના રાજકીય અભિયાન સાથે જોડાયેલો છે.
કોંગ્રેસ અને રાહુલ ગાંધીને સમર્થન આપ્યાનો આક્ષેપ
યાચિકાકર્તા વકીલ ઝાહિદ અલીના જણાવ્યા અનુસાર, વિદેશી રાજકીય પ્રતિનિધિ દ્વારા આ પ્રકારના નારા લગાવવા એ ભારતની આંતરિક રાજનીતિમાં સીધી દખલગીરી સમાન છે. અરજી સૈયદ રિઝવાન અહેમદ દ્વારા તૈયાર કરવામાં આવી હોવાનું જણાવાયું છે. તેમાં દાવો કરાયો છે કે ફિલિબેકની આ પ્રવૃત્તિ કોંગ્રેસ અને રાહુલ ગાંધીના રાજકીય અભિયાનને જાહેર સમર્થન આપવા સમાન છે. જોકે, આ તમામ બાબતો હાલમાં અરજીમાં કરવામાં આવેલા આક્ષેપો છે.
વિઝાના નિયમો અને વિદેશી નાગરિકોની પ્રવૃત્તિઓનો મુદ્દો
અરજીમાં કેન્દ્રીય ગૃહ મંત્રાલયના કોન્ફરન્સ વિઝા સંબંધિત માર્ગદર્શિકા અને ઇમિગ્રેશન એન્ડ ફોરેનર્સ એક્ટ, 2025ની જોગવાઈઓનો ઉલ્લેખ કરવામાં આવ્યો છે. યાચિકાકર્તાનું કહેવું છે કે ભારત આવનારા વિદેશી પ્રતિનિધિઓને અહીંની સ્થાનિક રાજકીય પ્રવૃત્તિઓમાં ભાગ લેવાની છૂટ નથી. તેથી સમિટ દરમિયાન કરવામાં આવેલી આવી રાજકીય ટિપ્પણીઓ વિઝાની શરતોનું ઉલ્લંઘન છે કે નહીં, તેની તપાસ થવી જરૂરી છે.
તેલંગાણા સરકાર સામે પણ કાર્યવાહી કરવાની માંગ
આ મામલે યાચિકાકર્તાએ સુપ્રીમ કોર્ટ સમક્ષ અનેક માંગણીઓ રજૂ કરી છે. તેમાં તેલંગાણા સરકારને ભારત સમિટના આયોજનને લઈને જાહેરમાં માફી માંગવાનો નિર્દેશ આપવાની માંગ સામેલ છે. સાથે જ કેન્દ્ર સરકારને વિદેશી પ્રતિનિધિઓને આપવામાં આવતા વિઝા અને તેમની પ્રવૃત્તિઓ પર લાગુ નિયમોનું કડક પાલન કરાવવાનો આદેશ આપવા વિનંતી કરવામાં આવી છે. અરજીમાં સમગ્ર ઘટનાની જવાબદારી નક્કી કરવાની પણ માંગ ઉઠાવવામાં આવી છે.

તપાસ માટે SIT અને સોશિયલ મીડિયા કંપનીઓને નિર્દેશની માંગ
અરજીમાં સમગ્ર ઘટનાની નિષ્પક્ષ તપાસ માટે સ્વતંત્ર વિશેષ તપાસ ટીમ એટલે કે SITની રચના કરવાની માંગ પણ કરવામાં આવી છે. આ ટીમ ભારત સમિટના આયોજન, કાર્યક્રમને મળેલી સરકારી મંજૂરી અને તેમાં સામેલ વ્યક્તિઓની ભૂમિકાની તપાસ કરે તેવી માગણી છે. આ ઉપરાંત મેટા, એક્સ અને ગૂગલ જેવા સોશિયલ મીડિયા પ્લેટફોર્મને વિવાદિત વીડિયો હટાવવા તથા સંબંધિત ઇલેક્ટ્રોનિક રેકોર્ડ સુરક્ષિત રાખવાનો નિર્દેશ આપવાની માંગ કરવામાં આવી છે. હવે આ મામલે સુપ્રીમ કોર્ટનું વલણ શું રહેશે અને અરજી પર આગળ કઈ કાર્યવાહી થશે તેના પર સૌની નજર રહેશે.
