Telegram CEO Networth: ૧૦૦થી વધુ બાળકો અને ૬.૬ અબજ ડોલરની સંપત્તિ! રશિયાના ગંભીર આરોપો બાદ ચર્ચામાં આવ્યા ટેલિગ્રામ ફાઉન્ડર પાવેલ દુરોવ
પ્રખ્યાત મેસેજિંગ એપ ‘ટેલિગ્રામ’ના સહ-સ્થાપક અને સીઈઓ પાવેલ દુરોવ તાજેતરમાં ફરી એકવાર વૈશ્વિક ચર્ચાના કેન્દ્રમાં આવ્યા છે. રશિયાની સિક્યોરિટી એજન્સી ‘ફેડરલ સિક્યોરિટી સર્વિસ’ (FSB) દ્વારા તેમના પર કથિત રીતે આતંકવાદી પ્રવૃત્તિઓમાં મદદ કરવાનો અને સહયોગ આપવાનો અત્યંત ગંભીર આરોપ લગાવવામાં આવ્યો છે. રશિયન સરકારી ન્યૂઝ એજન્સી TASS ના અહેવાલ મુજબ, અધિકારીઓએ દુરોવને આંતરરાષ્ટ્રીય સ્તરે વોન્ટેડ લિસ્ટમાં સામેલ કરવાની તૈયારીઓ પણ શરૂ કરી દીધી છે. આ સમાચાર વાયરલ થયા બાદથી દુરોવની સંપત્તિ અને તેમની રહસ્યમય જીવનશૈલી ફરી ચર્ચામાં આવી ગઈ છે.
કોણ છે પાવેલ દુરોવ?
પાવેલ દુરોવનો જન્મ રશિયામાં થયો હતો. તેઓ વિશ્વના સૌથી લોકપ્રિય ફ્રી મેસેજિંગ પ્લેટફોર્મ ‘ટેલિગ્રામ’ના સ્થાપક અને માલિક છે, જે ગ્લોબલ લેવલે મેટાના વોટ્સએપ (WhatsApp) જેવા પ્લેટફોર્મ સાથે સીધી સ્પર્ધા કરે છે.
દુરોવના પિતા યુનિવર્સિટીમાં પ્રોફેસર હતા. રસપ્રદ વાત એ છે કે, પાવેલ દુરોવ પાસે કમ્પ્યુટર સાયન્સ કે ટેકનોલોજીની કોઈ ઔપચારિક ડિગ્રી નથી. તેમ છતાં, કોલેજ કાળથી જ કોડિંગ અને સોફ્ટવેરમાં ભારે રસ હોવાને કારણે તેમણે ટેલિગ્રામ જેવી વિશાળ એપ બનાવી અને તેને વિશ્વભરમાં સફળ બનાવી.
પાવેલ દુરોવની નેટવર્થ કેટલી છે?
વિશ્વ પ્રસિદ્ધ ફોબ્સ (Forbes) મેગેઝિનના ડેટા અનુસાર, વર્ષ ૨૦૨૬માં પાવેલ દુરોવની અંદાજિત સંપત્તિ આશરે ૬.૬ અબજ ડોલર (ભારતીય ચલણમાં આશરે ₹૬૩,૧૩૫ કરોડ) છે. આ અથાહ સંપત્તિ સાથે તેઓ વિશ્વના સૌથી ધનિક ટેક-ફાઉન્ડર્સની યાદીમાં સ્થાન ધરાવે છે.
તેમની મોટાભાગની સંપત્તિ ટેલિગ્રામમાં તેમની ૧૦૦% માલિકીને આભારી છે. ટેલિગ્રામના હાલમાં વિશ્વભરમાં ૧ અબજ (૧૦૦ કરોડ)થી પણ વધુ સક્રિય યુઝર્સ છે, જેના કારણે તેમની નેટવર્થમાં સતત વધારો થઈ રહ્યો છે.
૧૦૦થી વધુ બાળકો અને સંપત્તિની વહેંચણીનો વિવાદ
પાવેલ દુરોવ માત્ર પોતાની ટેકનોલોજી માટે જ નહીં, પરંતુ પોતાની અંગત જિંદગીના ચોંકાવનારા ખુલાસાઓને કારણે પણ અવારનવાર ચર્ચામાં રહે છે. વર્ષ ૨૦૨૫માં તેમણે એક એવું નિવેદન આપ્યું હતું જેનાથી સમગ્ર વિશ્વમાં મોટો હંગામો મચી ગયો હતો.
દુરોવે દાવો કર્યો હતો કે તેઓ સ્પર્મ ડોનેશન દ્વારા ૧૨થી વધુ દેશોમાં ૧૦૦થી પણ વધુ બાળકોના બાયોલોજિકલ પિતા બન્યા છે. તેમણે વધુમાં જણાવ્યું હતું કે તેઓ પોતાની કરોડો ડોલરની સંપત્તિ પોતાના આ તમામ ૧૦૦થી વધુ બાળકો વચ્ચે સમાન રીતે વહેંચવા માંગે છે, જેથી તેમના મૃત્યુ પછી સંપત્તિને લઈને બાળકો વચ્ચે કોઈ કાનૂની કે પારિવારિક વિવાદ ન થાય.
