દલાલ સ્ટ્રીટ પર સુગર સેક્ટરનો દબદબો: અવધ સુગરમાં ૫૯% નો ઉછાળો, ઇથેનોલ અને ગ્લોબલ સપ્લાયથી વધી કમાણી
દલાલ સ્ટ્રીટ પર ઓગસ્ટ મહિનો સુગર સ્ટોક્સ માટે અત્યંત ઉત્સાહજનક અને નફાકારક સાબિત થયો છે. શેરબજારના અન્ય ક્ષેત્રોની સરખામણીએ સુગર સેક્ટરે બજારના સૌથી મજબૂત હિસ્સા તરીકે પોતાની જગ્યા બનાવી લીધી છે. વૈશ્વિક અને સ્થાનિક બજારમાં ખાંડના ભાવ રેકોર્ડ સ્તરે પહોંચવાના કારણે વિવિધ સુગર મિલોના શેરોમાં જંગી ઉછાળો જોવા મળ્યો છે.
સ્થાનિક બજારની સાથે આંતરરાષ્ટ્રીય સ્તરે ખાંડના પુરવઠા (સપ્લાય) અંગે ઊભી થયેલી ચિંતાઓને કારણે ભારતીય સુગર મિલોની કમાણીમાં મોટો વધારો થવાની ધારણાઓ મજબૂત બની છે.
અવધ સુગર અને દ્વારિકેશ સુગરે માર્યો બાજી
આ તેજીના મોજામાં ‘અવધ સુગર એન્ડ એનર્જી’ના શેરે સૌથી વધુ રિટર્ન આપીને બાજી મારી છે. ગત ૩૧ જુલાઈએ આ શેર ₹૫૦૪.૬૫ પર હતો, જે ઓગસ્ટના અંત સુધીમાં ૫૯.૩૫% ના ઉછાળા સાથે ₹૮૦૪.૧૫ ના સ્તરે પહોંચી ગયો હતો.
તે જ રીતે, દ્વારિકેશ સુગર ઈન્ડસ્ટ્રીઝમાં ૩૮.૦૧% અને દાલમિયા ભારત સુગરમાં ૩૫.૬૩% ની જોરદાર તેજી નોંધાઈ છે. ઉત્તમ સુગર મિલ્સ, મવાના સુગર્સ અને ધામપુર સુગર મિલ્સ જેવા શેરોએ પણ પોતાના રોકાણકારોને ૨૫% થી ૩૩% સુધીનું શ્રેષ્ઠ વળતર આપ્યું છે. ક્ષેત્રની દિકગ્જ કંપની બલરામપુર ચીની મિલ્સનો શેર ૧૦.૬૩% વધીને ₹૬૪૮.૯૦ પર બંધ થયો હતો. જોકે, ગોદાવરી બાયોરિફાઈનરીઝના શેરમાં ૮.૫૧% નો ઘટાડો જોવા મળ્યો હતો.
શું સુગર સ્ટોક્સનું વેલ્યુએશન મોંઘું થઈ ગયું છે?
ટૂંકા ગાળામાં આવેલી આ તીવ્ર તેજી બાદ બજારમાં વેલ્યુએશનને લઈને ચર્ચાઓ શરૂ થઈ ગઈ છે. માર્કેટ નિષ્ણાતોના મતે, આ રેલી સુગર સેક્ટરની ‘રી-રેટિંગ’ દર્શાવે છે. રોકાણકારો હવે આ કંપનીઓને માત્ર પરંપરાગત કૃષિ સાહસ તરીકે નહીં, પરંતુ ‘ગ્રીન એનર્જી’ (ઇથેનોલ) ઉત્પાદક તરીકે જોઈ રહ્યા છે.
જોકે, કેટલાક એનાલિસ્ટ્સનું માનવું છે કે ૨૦% ઇથેનોલ બ્લેન્ડિંગથી થનારી કમાણીનો મોટો હિસ્સો પહેલાથી જ શેરોની કિંમતમાં સમાવિષ્ટ (Priced-in) થઈ ચૂક્યો છે. બજાર આગામી બે ક્વાર્ટરના સંભવિત નફાની કિંમત ચૂકવી ચૂક્યું હોવાથી હવે સાવચેતી જરૂરી છે.
આગામી તેજી માટે કયા ટ્રિગર્સ જરૂરી?
નિષ્ણાતોના જણાવ્યા અનુસાર, આ તેજીની ગતિ જાળવી રાખવા માટે બજારને નવા સકારાત્મક સમાચાર (Triggers) ની જરૂર પડશે:
ઇથેનોલના ભાવ: જો કેન્દ્ર સરકાર દ્વારા ઇથેનોલના ખરીદ ભાવો વધારવામાં આવે, તો આ શેરોમાં ફરી નવી તેજી જોવા મળી શકે છે.
વૈશ્વિક પુરવઠો: બ્રાઝિલ અને થાઈલેન્ડ જેવા મોટા ખાંડ ઉત્પાદક દેશોમાં ખરાબ હવામાનને કારણે વૈશ્વિક સપ્લાય ખોરવાયો છે. જો આંતરરાષ્ટ્રીય સ્તરે ખાંડના ભાવ ઊંચા રહેશે, તો ભારતીય મિલોને નિકાસનો સીધો લાભ મળશે.
સરકારી નીતિઓ: સરકાર દ્વારા નિકાસ પર નિયંત્રણો કે કોટા લાગુ કરવા જેવા કડક પગલાં આ તેજી પર બ્રેક લગાવી શકે છે.
મજબૂત બેલેન્સ શીટ વાળી કંપનીઓ પર નજર
આગામી સમયમાં માત્ર ખાંડનું ઉત્પાદન જ નહીં, પરંતુ કંપનીઓની ઇથેનોલ ક્ષમતા તેમનું ભવિષ્ય નક્કી કરશે. જે કંપનીઓ દેવામુક્ત છે અને ઇથેનોલ ઉત્પાદન પર વધુ ધ્યાન કેન્દ્રિત કરી રહી છે તે વધુ સુરક્ષિત માનવામાં આવે છે.
બજાર વિશ્લેષકો બલરામપુર ચીની મિલ્સને આ ક્ષેત્રની ટોપ પિક ગણાવી રહ્યા છે. આ કંપની ૭૭,૫૦૦ TCD ની પિલાણ ક્ષમતા અને ૫૬૦ KLD ની ડિસ્ટિલરી ક્ષમતા સાથે માર્કેટ લીડર છે. એકંદરે, ઇથેનોલની કિંમતો અને સરકારી નીતિઓ જ આ ક્ષેત્રના શેરોની આગળની દિશા નક્કી કરશે.
