સૌદી અરબના એરપોર્ટ પર ડ્રોન અને મિસાઈલ હુમલાથી તણાવ: ભારતે કરી સખત નિંદા

સૌદી એરપોર્ટ પર હુમલામાં ૩ નાગરિકોના મોત, યમનના હુતી વિદ્રોહીઓએ સ્વીકારી જવાબદારી

હાલમાં જ મધ્ય પૂર્વના દેશ સૌદી અરબમાં સુરક્ષાની સ્થિતિને લઈને એક મોટો અને ગંભીર મામલો સામે આવ્યો છે. દેશના બે મહત્વપૂર્ણ અંતરાષ્ટ્રીય એરપોર્ટ પર સતત બે દિવસમાં થયેલા ઘાતક હુમલાઓના કારણે આ ક્ષેત્રમાં તણાવની સ્થિતિ ચરમસીમા પર પહોંચી ગઈ છે. આ કાયરતાપૂર્ણ હુમલાઓમાં નિર્દોષ નાગરિકોના ભોગ લેવાયા છે અને ભારત સહિતના આંતરરાષ્ટ્રીય સમુદાયે આ ઘટના સામે ઊીંડા દુઃખ અને રોષની લાગણી વ્યક્ત કરી છે.

સૌદી અરબના એરપોર્ટ પર બે દિવસમાં બે ભયાનક હુમલા

સૌદી અરબની રાજધાની રિયાદ સ્થિત ‘કિંગ ખાલિદ ઇન્ટરનેશનલ એરપોર્ટ’ અને દક્ષિણ સૌદીમાં આવેલ ‘અભા ઇન્ટરનેશનલ એરપોર્ટ’ પર અચાનક થયેલા હુમલાઓએ સૌને ચોંકાવી દીધા છે. આ હુમલાઓની શૃંખલામાં કુલ 3 લોકોના કરુણ મોત નિપજ્યા છે, જ્યારે આશરે 36 જેટલા નાગરિકો ગંભીર રીતે ઘાયલ થયા છે.

હુમલાની આ ઘટનાની શરૂઆત મંગળવારે થઈ હતી, જ્યારે સૌપ્રથમ ‘અભા ઇન્ટરનેશનલ એરપોર્ટ’ને નિશાન બનાવવામાં આવ્યું હતું. આ પહેલા હુમલામાં મોરોક્કો અને અલ્જીરિયાની બે મહિલા નાગરિકોના દુઃખદ અવસાન થયા હતા. આ ઉપરાંત, આ હુમલાની ચપેટમાં આવીને અંદાજે 28 લોકો ઘાયલ થયા હતા, જેમાં કેટલાકની સ્થિતિ અત્યંત નાજુક હોવાનું જણાવવામાં આવ્યું હતું. ઘટનાસ્થળે તાત્કાલિક રાહત અને બચાવ કામગીરી હાથ ધરીને તમામ ઘાયલોને તાત્કાલિક નજીકની હોસ્પિટલમાં સારવાર માટે ખસેડવામાં આવ્યા હતા.

બીજા દિવસે રિયાદ પર ડ્રોન હુમલો

મંગળવારની આણ હજી ઓસરી નહોતી ત્યાં જ બુધવારે બીજો મોટો હુમલો દેશની રાજધાની રિયાદ ખાતે આવેલા ‘કિંગ ખાલિદ ઇન્ટરનેશનલ એરપોર્ટ’ પર થયો. આ બીજા હુમલામાં સુદાનના એક નાગરિકનું મૃત્યુ થયું છે અને અન્ય 8 લોકો ગંભીર રીતે ઈજાગ્રસ્ત થયા છે. આ ઘટના બાદ રાજધાનીમાં સુરક્ષા વ્યવસ્થા સઘન કરી દેવામાં આવી છે અને એરપોર્ટ પર હાઇ એલર્ટ જાહેર કરવામાં આવ્યું છે.

યમનના હુતી દ્વારા હુમલાની જવાબદારી સ્વીકાર 

આ હુમલાઓ પાછળ કઈ તાકાત છે તેની પુષ્ટિ કરતાં યમનના ‘હુતી વિદ્રોહીઓએ’ આ બંને એરપોર્ટ પર થયેલા હુમલાઓની સત્તાવાર જવાબદારી સ્વીકારી લીધી છે. હુતી સૈન્ય પ્રવક્તા યાહ્યા સારેએ નિવેદન આપતા જણાવ્યું કે રિયાદના કિંગ ખાલિદ ઇન્ટરનેશનલ એરપોર્ટ પર ઘણા બધા ડ્રોન દ્વારા સચોટ નિશાન સાધીને હુમલો કરવામાં આવ્યો હતો. આ સાથે જ અભા ઇન્ટરનેશનલ એરપોર્ટ અને ખમીસ મુશૈત એરબેઝ પર અત્યાધુનિક બેલેસ્ટિક મિસાઇલો અને વિસ્ફોટક ડ્રોનથી હુમલો કર્યાનો દાવો પણ તેમણે કર્યો છે. આ હુમલાઓના કારણે સૌદી અરબમાં હવાઈ ટ્રાફિક અને ઉડાનો પણ મોટા પ્રમાણમાં પ્રભાવિત થઈ છે.

ભારત સરકાર દ્વારા હુમલાની સખત શબ્દોમાં નિંદા

સૌદી અરબના નાગરિક અને વ્યૂહાત્મક ઠેકાણાઓ પર થયેલા આ આતંકવાદી હુમલાઓની ભારતે સખત શબ્દોમાં આકરી નિંદા કરી છે. ભારતના વિદેશ મંત્રાલય દ્વારા એક અધિકૃત નિવેદન જાહેર કરીને આંતરરાષ્ટ્રીય શાંતિ અને માનવતા વિરુદ્ધના આ પગલા સામે કડક વાંધો ઉઠાવવામાં આવ્યો છે.

વિદેશ મંત્રાલયના નિવેદનમાં સ્પષ્ટપણે જણાવવામાં આવ્યું છે કે, “ભારત સરકાર રિયાદ અને અભા ઇન્ટરનેશનલ એરપોર્ટ પર પાછલા દિવસોમાં થયેલા કાયરતાપૂર્ણ હુમલાઓની સખત નિંદા કરે છે. આ હુમલાઓમાં અનેક નિર્દોષ નાગરિકોએ પોતાના પ્રાણ ગુમાવ્યા છે અને ઘણા લોકો ઈજાગ્રસ્ત થયા છે. નાગરિકોના જીવન અને મહત્ત્વપૂર્ણ સિવિલ ઇન્ફ્રાસ્ટ્રક્ચર (માળખાકીય સુવિધાઓ)ને નિશાન બનાવવું એ કોઈપણ સંજોગોમાં સ્વીકારી શકાય તેમ નથી.”