ગુજરાતથી દિલ્હી સુધી PM મોદીની 25 વર્ષની સફર: દુનિયાના નેતાઓએ પાઠવી શુભેચ્છાઓ
પ્રધાનમંત્રી નરેન્દ્ર મોદીએ સરકારના વડા તરીકે 25 વર્ષ પૂર્ણ કર્યા છે. આ મહત્વપૂર્ણ રાજકીય સફર નિમિત્તે વિશ્વના અનેક દેશોના નેતાઓએ તેમને શુભેચ્છાઓ પાઠવી છે અને તેમના લાંબા જાહેર જીવનની પ્રશંસા કરી છે. બેલ્જિયમના વડાપ્રધાન બાર્ટ ડી વેવરે સોશિયલ મીડિયા પર સંદેશો આપીને નરેન્દ્ર મોદીને અભિનંદન આપ્યા. ગુજરાતથી શરૂ થયેલી તેમની રાજકીય સફર હવે દિલ્હીમાં દેશના નેતૃત્વ સુધી પહોંચી હોવાનું તેમણે જણાવ્યું હતું. બાર્ટ ડી વેવરે ભારતની પોતાની તાજેતરની મુલાકાતને પણ યાદ કરી હતી. તેમણે કહ્યું કે મુલાકાત ખૂબ જ ફળદાયી રહી હતી અને હવે ભારત તથા બેલ્જિયમ વચ્ચેની મજબૂત ભાગીદારીને વધુ ઊંડી બનાવવા તેઓ ઉત્સુક છે.
ડોમિનિકાના વડાપ્રધાન રૂઝવેલ્ટ સ્કેરિટે પણ નરેન્દ્ર મોદીને અભિનંદન આપતાં તેમની સાથેનો ફોટો શેર કર્યો હતો. તેમણે મોદીને પોતાનો પ્રિય મિત્ર ગણાવીને સતત 25 વર્ષના જાહેર નેતૃત્વ બદલ શુભેચ્છા પાઠવી હતી. સ્કેરિટે જણાવ્યું કે નરેન્દ્ર મોદીની રાજકીય સફર ગુજરાતથી શરૂ થઈ અને ત્યારબાદ તેઓ ભારતના વડાપ્રધાન બન્યા. ડોમિનિકા પ્રત્યે મોદીએ દર્શાવેલી મિત્રતા અને ત્યાંના લોકો માટેની ઉદારતા બદલ તેમણે આભાર માન્યો હતો. ડોમિનિકાના વડાપ્રધાને ભારત અને ડોમિનિકા વચ્ચેના સંબંધોને મહત્વપૂર્ણ ગણાવ્યા હતા. તેમણે આશા વ્યક્ત કરી કે બંને દેશો વચ્ચેની મિત્રતા આગામી વર્ષોમાં વધુ મજબૂત બનશે અને મોદીને સારા સ્વાસ્થ્ય તથા સફળતાની શુભેચ્છા આપી.
નાઇજીરિયાના રાષ્ટ્રપતિ બોલા અહમદ ટિનૂબુએ પણ ભારત સરકાર અને નાઇજીરિયાની જનતા તરફથી નરેન્દ્ર મોદીને અભિનંદન પાઠવ્યા. તેમણે 25 વર્ષના નેતૃત્વને લોકશાહી વ્યવસ્થામાં એક દુર્લભ અને ઐતિહાસિક સિદ્ધિ ગણાવી હતી. ટિનૂબુએ પોતાના સંદેશામાં જણાવ્યું કે 7 ઓક્ટોબર 2026ના રોજ નરેન્દ્ર મોદીને ગુજરાતના મુખ્યમંત્રી અને સરકારના વડા તરીકે જવાબદારી સંભાળ્યાને 25 વર્ષ પૂર્ણ થઈ રહ્યા છે. તેમની જાહેર સેવાની સફર સતત આગળ વધી છે. નાઇજીરિયાના રાષ્ટ્રપતિએ ગુજરાતમાં લાંબા સમય સુધી સેવા આપ્યા બાદ 2014થી ભારતના વડાપ્રધાન તરીકે મોદીના નેતૃત્વનો ઉલ્લેખ કર્યો. વિશ્વના સૌથી વધુ વસ્તી ધરાવતા દેશનું સતત નેતૃત્વ કરવું જનવિશ્વાસનું પ્રતિબિંબ હોવાનું તેમણે કહ્યું.
ટિનૂબુએ ભારત અને નાઇજીરિયાને લોકશાહી દેશો ઉપરાંત ગ્લોબલ સાઉથના મહત્વપૂર્ણ અવાજ ગણાવ્યા. બંને દેશો વધુ ન્યાયી, સમાવેશી અને પ્રતિનિધિત્વ ધરાવતી આંતરરાષ્ટ્રીય વ્યવસ્થા માટે સમાન પ્રતિબદ્ધતા ધરાવે છે તેમ તેમણે જણાવ્યું. આ વચ્ચે ભુટાનના વડાપ્રધાન શેરિંગ તોબગેએ નરેન્દ્ર મોદીને લખેલો ભાવુક પત્ર ખાસ ચર્ચામાં રહ્યો છે. તેમણે મોદીને પોતાના મોટા ભાઈ ગણાવ્યા અને તેમના પ્રત્યેના વ્યક્તિગત સ્નેહ તથા આદરને શબ્દોમાં વ્યક્ત કર્યો. તોબગેએ 27 જુલાઈ 2019ની દિલ્હીમાં થયેલી મુલાકાત યાદ કરી હતી. તે સમયે તેમની પાર્ટી ભુટાનની ચૂંટણી હારી ગઈ હતી અને સંસદમાં કોઈ પ્રતિનિધિત્વ નહોતું. તેઓ પોતે પણ વડાપ્રધાન કે સાંસદ નહોતા. તેમ છતાં નરેન્દ્ર મોદીએ તેમની સાથે આત્મીયતા દર્શાવી હતી. તોબગેએ જણાવ્યું કે આ મુલાકાત દરમિયાન તેમણે મોદીને મોટા ભાઈ ગણાવ્યા હતા, કારણ માત્ર ઉંમર નહીં પરંતુ મળેલા સ્નેહ અને માર્ગદર્શનનું પણ હતું.
તોબગેએ વધુમાં જણાવ્યું કે તે મુલાકાત દરમિયાન તેમણે નરેન્દ્ર મોદીને ‘વિષ્ણુનો અવતાર’ પણ ગણાવ્યા હતા. બાદમાં તેમણે પોતાની જ વાત અંગે વિચાર્યું કે શું તેઓ લાગણીઓમાં વહી ગયા હતા. પરંતુ લાંબા વિચાર બાદ તોબગેને લાગ્યું કે મોદીને આ ઉપમા આપવી યોગ્ય હતી. તેમણે પોતાના પ્રદેશની પરંપરાનો ઉલ્લેખ કરતાં કહ્યું કે જ્ઞાન અને કુશળતા ધરાવતા શાસકોને વિશેષ આધ્યાત્મિક દૃષ્ટિથી જોવામાં આવે છે.
ભુટાનના વડાપ્રધાને ગુજરાતમાં મોદીના લાંબા કાર્યકાળની પણ પ્રશંસા કરી હતી. તેમના જણાવ્યા અનુસાર વિકાસ, માળખાગત સુવિધાઓ, રોકાણ અને યોજનાઓને પૂર્ણ કરવાની દિશામાં ગુજરાતે એક અલગ ઉદાહરણ ઊભું કર્યું હતું. તોબગેએ કહ્યું કે બાદમાં તેમણે મોદીને આ જ અભિગમને સમગ્ર ભારતમાં આગળ વધારતા જોયા. ઉત્પાદન, વિદેશી રોકાણ, નાણાકીય સમાવેશ, સ્વચ્છતા, ટેક્નોલોજી અને ઇન્ફ્રાસ્ટ્રક્ચર જેવા ક્ષેત્રોમાં તેમણે કામની પ્રશંસા કરી.
તેમણે નરેન્દ્ર મોદીને શિસ્તબદ્ધ, ઊર્જાવાન અને મહેનતુ જનસેવક ગણાવ્યા. તોબગેના મતે સૌથી વધુ પ્રભાવિત કરનારી બાબત દેશ અને લોકોની સેવા પ્રત્યેનું તેમનું સતત સમર્પણ છે, જે તેમની નેતૃત્વશૈલીને અલગ બનાવે છે. તોબગેએ એવો પણ દાવો કર્યો કે મોદીના નેતૃત્વથી ભારતીયોમાં દેશ પ્રત્યે ગૌરવ, ભવિષ્ય માટે મહત્વાકાંક્ષા અને વિશ્વમાં ભારતની ભૂમિકા અંગે આત્મવિશ્વાસ વધ્યો છે. તેમણે આ ગુણોને સમજદાર શાસકની વિશેષતા સાથે જોડ્યા.પત્રના અંતિમ ભાગમાં ભુટાનની બૌદ્ધ પરંપરાનો ઉલ્લેખ કરતાં તોબગેએ ‘રિગસુમ ગોનપો’ની વાત કરી. તેમાં મંજુશ્રીને જ્ઞાન, અવલોકિતેશ્વરને કરુણા અને વજ્રપાણિને સાહસના પ્રતીક તરીકે સમજાવવામાં આવ્યા છે.
તોબગેના મતે સારા નેતૃત્વનો અર્થ માત્ર સત્તાનું સંચાલન નથી, પરંતુ જ્ઞાન, કરુણા અને સાહસ સાથે નિસ્વાર્થ સેવા કરવી છે. નરેન્દ્ર મોદીના 25 વર્ષના જાહેર જીવનને તેમણે આ દૃષ્ટિકોણ સાથે જોડ્યું.
