‘દિલ્હી હિંસા માટે ગૃહમંત્રાલય જવાબદાર’: ‘ધ હિન્દુ’ના લેખમાં રાહુલ ગાંધીએ સરકારને ઘેરી
કોંગ્રેસના ભૂતપૂર્વ પ્રમુખ રાહુલ ગાંધીએ ૨૦ જુલાઈના રોજ વિરોધ પ્રદર્શન કરી રહેલા વિદ્યાર્થીઓ સામે થયેલી કથિત હિંસા માટે કેન્દ્રીય ગૃહમંત્રી અમિત શાહને જવાબદાર ઠેરવ્યા છે. સોમવારે તેમણે ગૃહમંત્રીના રાજીનામાની માંગ ફરી એકવાર દોહરાવી હતી. તેમણે જણાવ્યું હતું કે, જે સરકાર પોતાની ‘કેન્દ્રીયકૃત નિયંત્રણ’ (Centralised Control) પ્રણાલી પર ગર્વ અનુભવે છે, તે સરકારમાં જવાબદારી પણ ઉચ્ચ સ્તરે જ નક્કી થવી જોઈએ.
‘ધ હિન્દુ’ લેખમાં રાહુલ ગાંધીના ગંભીર આક્ષેપો
લોકસભામાં વિરોધ પક્ષના નેતા રાહુલ ગાંધીએ ‘ધ હિન્દુ’ અખબાર માટે લખેલા એક વિશેષ લેખમાં આરોપ લગાવ્યો હતો કે શાંતિપૂર્ણ પ્રદર્શનકારીઓ સામે અશ્રુવાયુના ગોળા, ખીલી જડેલી લાકડીઓ અને પેલેટ ગન (છરરા વાળી બંદૂક) નો ઉપયોગ કરવામાં આવ્યો હતો.
તેમણે ૧૯ વર્ષીય વિદ્યાર્થી સાહિલ લોચબનો ઉલ્લેખ કરતા દાવો કર્યો કે તેના શરીરના ઉપરના ભાગમાં અનેક છરરા વાગ્યા છે અને એક છરરો તેની આંખમાં વાગવાને કારણે તેની દૃષ્ટિ જવાની ભારે આશંકા સેવાઈ રહી છે.
મહિલાઓ અને સગીરો પર લાઠીચાર્જ: આદેશ કોણે આપ્યો?
કોંગ્રેસ નેતાએ દાવો કર્યો હતો કે પોલીસકર્મીઓએ યુવાન મહિલાઓ પર પણ નિર્દયતાથી લાઠીઓ વરસાવી હતી અને સગીર વયના પ્રદર્શનકારીઓ સાથે મારપીટ કરવામાં આવી હતી. તેમણે અણીયાળો સવાલ ઉઠાવ્યો હતો કે, “આ ગેરકાયદેસર અને ગેરબંધારણીય હિંસા માટેનો આદેશ આખરે કોણે આપ્યો હતો?”
ગાંધીએ યાદ અપાવ્યું હતું કે દિલ્હી પોલીસ અને રેપિડ એક્શન ફોર્સ (RAF) સીધા કેન્દ્રીય ગૃહ મંત્રાલય હેઠળ આવે છે અને આ સમગ્ર ઘટના સંસદ ભવનથી માત્ર ૫૦૦ મીટરના અંતરે જ બની હતી.
સરકારની જવાબદારી અને તીખો કટાક્ષ
તેમણે લખ્યું કે વર્તમાન કેન્દ્ર સરકાર પોતાના કેન્દ્રીયકૃત નિયંત્રણ પર ગર્વ લે છે, તેથી આ ઘટનાની જવાબદારી ગૃહમંત્રીના સ્તરેથી જ નક્કી થવી જોઈએ. રાહુલ ગાંધીએ તીખો કટાક્ષ કરતા કહ્યું કે મંગળ મિશનની સફળતાથી લઈને ઓલિમ્પિક મેડલ સુધીનો શ્રેય લેનારા પ્રધાનમંત્રી નરેન્દ્ર મોદી અને ગૃહમંત્રી અમિત શાહની પરવાનગી વગર આ સરકારમાં કંઈપણ શક્ય બનતું નથી.
તેમના જણાવ્યા અનુસાર, જો અમિત શાહે આ પોલીસ કાર્યવાહીને મંજૂરી આપી હતી તો તેઓ આ ગુના માટે સીધા દોષી છે, અને જો તેમને આ બાબતની જાણ જ નહોતી તો તે તેમની ઘોર અક્ષમતા દર્શાવે છે.
બંને પરિસ્થિતિઓમાં રાજીનામું અનિવાર્ય
રાહુલ ગાંધીએ સ્પષ્ટ શબ્દોમાં કહ્યું કે, “આ બંનેમાંથી કોઈપણ પરિસ્થિતિ હોય, ગૃહમંત્રી તરીકે અમિત શાહે તાત્કાલિક રાજીનામું આપવું જોઈએ.”
કોંગ્રેસ નેતાએ વધુમાં આક્ષેપ કર્યો હતો કે સરકારે આટલી ગંભીર ઘટનાની કોઈ તટસ્થ તપાસના આદેશ આપ્યા નથી. એટલું જ નહીં, ગૃહમંત્રીએ સંસદમાં પણ આ સંવેદનશીલ મુદ્દા પર ચર્ચા થવા દીધી નહોતી. વિપક્ષ દ્વારા ગૃહમાં ચર્ચા માટે રજૂ કરવામાં આવેલા તમામ પ્રસ્તાવને સતત ફગાવી દેવામાં આવ્યા હતા.
યુવાનોના અવાજને દબાવવાનો પ્રયાસ
પ્રધાનમંત્રી નરેન્દ્ર મોદી પર નિશાન સાધતા રાહુલ ગાંધીએ જણાવ્યું કે સરકારે દેશના યુવાનોના આંદોલનને કચડી નાખવા માટે FIR, ગેરકાયદે કસ્ટડી અને સોશિયલ મીડિયા દ્વારા ભયનું વાતાવરણ ઊભું કરવાનો પૂરતો પ્રયાસ કર્યો છે.
તેમણે ઉમેર્યું કે પ્રધાનમંત્રી દ્વારા યુવાનોને વિરોધ પ્રદર્શન માટે “માફી આપતો” વીડિયો જાહેર કરવો એ પણ પોતાનામાં એક મોટો વિરોધાભાસ અને મજાક સમાન છે.
