TIME મેગેઝિનના પ્રતિષ્ઠિત લિસ્ટમાં ભારતીયોનો દબદબો વધશે
વિશ્વની સૌથી પ્રતિષ્ઠિત મેગેઝિન પૈકીની એક ‘TIME’ એ ભારતમાં પોતાની ‘TIME100 Next’ ફ્રેન્ચાઈઝીના વિસ્તરણની જાહેરાત કરી છે. ‘TIME100 Next India’ નામે લોન્ચ થનારી આ વિશેષ શ્રેણી દેશના એવા ઉભરતા નેતાઓ અને પ્રતિભાઓને પ્રોત્સાહિત કરશે જેઓ પોતાના કાર્યોથી ભવિષ્યને નવી દિશા આપી રહ્યા છે.
નવી દિલ્હીથી ન્યૂયોર્ક સુધી ગુંજશે ભારતનું નામ
આ મહત્વપૂર્ણ પહેલની જાહેરાત ન્યૂયોર્ક સિટીમાં આયોજિત ‘TIME 100 ગાલા’ દરમિયાન કરવામાં આવી હતી. આ પ્રસંગે TIME ના CEO જેસિકા સિબલી અને રિલાયન્સ ફાઉન્ડેશનના સ્થાપક અને ચેરપર્સન નીતા અંબાણી એ સંયુક્ત રીતે આ જાહેરાત કરી હતી. આ ભાગીદારી ભારતીય કૌશલ્યને આંતરરાષ્ટ્રીય સ્તરે નવી ઊંચાઈઓ પર લઈ જવામાં મદદરૂપ થશે.
100 પ્રતિભાશાળી ભારતીયોની થશે પસંદગી
TIME ના એડિટર્સ દ્વારા તૈયાર કરવામાં આવનારી આ યાદીમાં ભારત અને વિદેશમાં વસતા 100 ઉભરતા ભારતીય નેતાઓનો સમાવેશ કરવામાં આવશે. જેમાં કલા, વિજ્ઞાન, બિઝનેસ, રમતગમત અને સામાજિક ક્ષેત્રના તેજસ્વી યુવાનોને સ્થાન મળશે. જેઓ આવનારા સમયમાં વિશ્વમાં મોટું પરિવર્તન લાવવાની ક્ષમતા ધરાવે છે તેમને અહીં સન્માનિત કરાશે.
મુંબઈમાં યોજાશે ભવ્ય કાર્યક્રમ
આ યાદી ઓનલાઈન પ્રસિદ્ધ કર્યા બાદ, ડિસેમ્બર 2026 માં મુંબઈમાં એક ભવ્ય સમારોહનું આયોજન કરવામાં આવશે. આ કાર્યક્રમ ‘નીતા મુકેશ અંબાણી કલ્ચરલ સેન્ટર’ (NMACC) ખાતે યોજાશે, જેમાં દેશ-વિદેશની જાણીતી હસ્તીઓ હાજરી આપશે. ભારત માટે આ એક ગૌરવપૂર્ણ ક્ષણ હશે કારણ કે પ્રથમ વખત આ પ્રકારનો પ્રતિષ્ઠિત ગ્લોબલ ઈવેન્ટ ભારતીય ભૂમિ પર યોજાશે.
