અઠવાડિયામાં માત્ર 4 દિવસ કામ અને ઓનલાઈન શિક્ષણ: તેલના તંગી વચ્ચે પાકિસ્તાન લેશે કડક નિર્ણય
પશ્ચિમ એશિયામાં સતત વધી રહેલા લશ્કરી સંઘર્ષ અને સાઉદી અરેબિયાના ઊર્જા માળખા પર હૂથી વિદ્રોહીઓના ભીષણ હુમલાઓને કારણે પાકિસ્તાનમાં ઈંધણની તીવ્ર અછત અને આર્થિક સંકટ ઘેરૂ બન્યું છે. આંતરરાષ્ટ્રીય બજારમાં કાચા તેલના વધતા ભાવને લીધે પાકિસ્તાનના અગાઉથી જ તળિયાઝાટક વિદેશી હૂંડિયામણ ભંડાર (Foreign Exchange Reserves) પર ભારે દબાણ આવી ગયું છે. આ વધતા આર્થિક બોજને નિયંત્રિત કરવા અને દેશમાં ઈંધણનો વપરાશ ઘટાડવા માટે વડાપ્રધાન શહબાઝ શરીફની સરકાર દેશભરમાં ‘પેટ્રોલિયમ સ્માર્ટ લોકડાઉન’ લાગુ કરવાની ગંભીર વિચારણા કરી રહી છે.
વડાપ્રધાન શહબાઝ શરીફની અધ્યક્ષતામાં તાજેતરમાં યોજાયેલી ઉચ્ચ સ્તરીય બેઠકમાં એક ઈમરજન્સી પ્લાનના ડ્રાફ્ટ પર વિગતવાર ચર્ચા કરવામાં આવી હતી. આ યોજના હેઠળ દેશમાં બળતણ અને વીજળીની બચત કરવા માટે તાત્કાલિક અસરથી કેટલાક અત્યંત કડક પગલાં લેવાની યોજના ઘડી કાઢવામાં આવી છે.
પ્રસ્તાવિત સ્માર્ટ લોકડાઉન હેઠળના કડક નિયંત્રણો
સરકારી અને ખાનગી ક્ષેત્રની ઓફિસો તેમજ તમામ શાળાઓ અને કોલેજોને અઠવાડિયામાં માત્ર ૪ દિવસ જ ખુલ્લી રાખવાનો પ્રસ્તાવ મૂકવામાં આવ્યો છે. આ નિયમ હેઠળ શુક્રવાર, શનિવાર અને રવિવાર એમ સતત ત્રણ દિવસ જાહેર રજા જાહેર થઈ શકે છે.
શાળાઓ બંધ રાખવાની સાથે કોલેજો અને યુનિવર્સિટીઓના શિક્ષણ કાર્યને તાત્કાલિક ધોરણે ઓનલાઈન મોડ પર શિફ્ટ કરવાનો આદેશ આપવામાં આવી શકે છે.
કોર્પોરેટ અને આઈટી ક્ષેત્રની કંપનીઓના કર્મચારીઓને અઠવાડિયામાં ઓછામાં ઓછા બે દિવસ ‘વર્ક ફ્રોમ હોમ’ (WFH) આપવાની અને સરકારી કર્મચારીઓ માટે રોટેશનલ ડ્યુટી સિસ્ટમ દાખલ કરવાની ભલામણ કરવામાં આવી છે.
વીજળીની વપરાશમાં ઘટાડો કરવા માટે તમામ કોમર્શિયલ માર્કેટો અને શોપિંગ મોલ્સને સાંજે ૮:૦૦ વાગ્યે જ બંધ કરવાનો આદેશ અપાઈ શકે છે. આ ઉપરાંત, રેસ્ટોરન્ટ્સ અને મેરેજ હોલ્સને રાત્રે ૧૦:૦૦ વાગ્યા સુધીમાં કામગીરી સમેટી લેવી પડશે. માત્ર મેડિકલ સ્ટોર્સ અને આવશ્યક સેવાઓને જ આ નિયમોમાંથી મુક્તિ આપવામાં આવશે.
સરકારી વિભાગોના અધિકારીઓ અને મંત્રીઓને મળતા માસિક પેટ્રોલ ભથ્થા (Fuel Allocations) માં ૫૦ ટકા સુધીનો મોટો કાપ મૂકવામાં આવી શકે છે.
પાકિસ્તાનમાં લોકડાઉન જેવી સ્થિતિ કેમ સર્જાઈ?
પાકિસ્તાન હાલના તબક્કે ઈંધણના ગંભીર સંકટમાંથી પસાર થઈ રહ્યું છે. અમેરિકા અને ઈરાન વચ્ચે વધી રહેલા યુદ્ધના લીધે હોર્મુઝની સામુદ્રધુની (Strait of Hormuz) દ્વારા થતો પુરવઠો ખોરવાઈ ગયો છે. પાકિસ્તાન પોતાની જરૂરિયાતનું લગભગ ૭૦ ટકા જેટલું પેટ્રોલિયમ મધ્ય પૂર્વના દેશોમાંથી આયાત કરે છે. હાલના ભૌગોલિક-રાષ્ટ્રીય તણાવને કારણે અંદાજ છે કે પાકિસ્તાન પાસે હવે માત્ર ૨૮ દિવસ ચાલે તેટલો જ પેટ્રોલ અને ડીઝલનો સ્ટોક બચ્યો છે.
આ સિવાય આંતરરાષ્ટ્રીય બજારમાં કાચા તેલના ઊંચા ભાવને કારણે પાકિસ્તાનનું બાકી રહેલું વિદેશી હૂંડિયામણ પણ ઝડપથી ખાલી થઈ જવાનો ભય સતાવી રહ્યો છે. આવી સ્થિતિમાં પરિસ્થિતિને વધુ વણસતી અટકાવવા માટે સરકાર પાસે કડક નિયંત્રણો લાગુ કરવા સિવાય અન્ય કોઈ વિકલ્પ બચ્યો નથી.
