Asaduddin Owaisi: રાજકારણમાં ભૂકંપ: ઓવૈસીએ TMC બળવાખોરોને ગણાવ્યા ભાજપની કઠપૂતળી
AIMIM ચીફ અસદુદ્દીન ઓવૈસીએ આયોજિત એક વિશાળ જનસભાને સંબોધતા રાજકીય ગરમાવો વધારી દીધો છે. તેમણે તૃણમૂલ કોંગ્રેસ (TMC) માં ચાલી રહેલી ઉથલપાથલ અને પક્ષપલટા પર આકરી પ્રતિક્રિયા આપતા બળવાખોર નેતાઓ પર જોરદાર નિશાન સાધ્યું હતું. ઓવૈસીએ આક્ષેપ કર્યો હતો કે જે લોકો અગાઉ ‘દિલમાં મદીના અને આંખમાં કાબા’હોવાની વાતો કરતા હતા, તેઓ આજે સત્તાના લોભમાં ભાજપ અને રાષ્ટ્રીય સ્વયંસેવક સંઘ (RSS) સાથે બેસીને ચા પી રહ્યા છે.
‘ભાજપ-RSS ની કઠપૂતળીઓ’
ઓવૈસીએ પોતાના ભાષણમાં ખૂબ જ તીખા શબ્દોનો પ્રયોગ કરતા કહ્યું કે, “આ લોકોએ બેશરમીની હદ વટાવી દીધી છે. જે લોકો કાલે કહેતા હતા કે અમારું ઈમાન મદીના અને કાબા સાથે છે, તેઓ હવે ‘બાબા’ સાથે જોડાઈ ગયા છે અને જેઓ બંગાળને કાબાની ધરતી નહીં બનવા દેવાની વાતો કરતા હતા, તેમના શરણે બેસી ગયા છે. હું પહેલેથી જ જાણતો હતો કે આ તમામ લોકો ભાજપ અને RSS ની કઠપૂતળીઓ છે.” તેમણે વધુમાં ઉમેર્યું કે, તેઓ ગમે તેટલા દબાણ વચ્ચે પણ પોતાના ઈમાનનો સોદો ક્યારેય નહીં કરે.
અખિલેશ યાદવ પર નિશાન
સમાજવાદી પાર્ટીના નેતા અખિલેશ યાદવ પર પ્રહાર કરતા ઓવૈસીએ કહ્યું કે, “આ લોકો હંમેશા મારા પર આરોપો લગાવે છે, પરંતુ અસલી કામ તો કોઈ બીજું જ કરી રહ્યું છે. અખિલેશ યાદવ, તમે એ જણાવો કે TMC ના સાંસદો જે ભાજપમાં ગયા, તેમના વિશે તમે કેમ મૌન છો? જ્યારે અસદુદ્દીન ઓવૈસી મુસ્લિમ સમુદાયના હક અને તેમની રાજકીય ભાગીદારીની વાત કરવા આવે છે, ત્યારે બધાને કેમ ડર લાગે છે? હવે ડરવું જ પડશે, કારણ કે ઉત્તર પ્રદેશનો યુવાન જાગૃત થઈ ગયો છે.”
ઓવૈસીએ જનતાને અપીલ કરી કે તેઓ હવે પોતાની અલગ રાજકીય ઓળખ ઊભી કરે. તેમણે સ્થાનિક નેતા યાસર શાહ અને તેમના પરિવાર પર નિશાન સાધતા કહ્યું કે, છેલ્લા ૨૦-૨૫ વર્ષથી તમે આ લોકોને વફાદારીથી વોટ આપ્યા છે, પરંતુ તેમણે આ વિસ્તારમાં એક હોસ્પિટલ પણ બનાવી નથી. ઓવૈસીએ દાવો કર્યો કે આવનારી વિધાનસભા ચૂંટણીમાં ઉત્તર પ્રદેશમાં ઈત્તેહાદ (એકતા) નો ઇન્કલાબ આવશે અને જનતા પોતાની મહેનતથી પોતાના પ્રતિનિધિઓને વિધાનસભા સુધી પહોંચાડશે.
