Jio Prime Membership ની પુનઃ વાપસી: ₹300 માં મળશે પ્રાઇસ લોક, કેશબેક અને સસ્તા 3-in-1 પ્લાન્સ
રિલાયન્સ જીઓ (Reliance Jio) એ ભારતીય ટેલિકોમ ક્ષેત્રે પોતાના સફળ ૧૦ વર્ષ પૂર્ણ થવાની ખુશીમાં દેશભરના કરોડો ગ્રાહકો માટે એક ધમાકેદાર ભેટ આપી છે. કમ્પનીએ પોતાના ગ્રાહકો માટે ફરી એકવાર ‘જીઓ પ્રાઇમ મેમ્બરશિપ’ (Jio Prime Membership) રજૂ કરવાની મોટી જાહેરાત કરી છે. આ પ્રાઇમ મેમ્બરશિપ લેનારા યુઝર્સ માટે આગામી એક વર્ષ સુધી રિચાર્જ પ્લાનની કિંમતોમાં કોઈ જ વધારો થશે નહીં. આ સિવાય કમ્પનીએ ₹૨૯૯ વાળા પોપ્યુલર પ્લાનને ચાલુ રાખવાની સાથે આકર્ષક કેશબેક ઓફર્સ અને નવા ૩-ઇન-૧ રિચાર્જ પ્લાન્સની પણ ઘોષણા કરી છે. ઉલ્લેખનીય છે કે જીઓએ સૌથી પહેલી વાર વર્ષ ૨૦૧૭માં પ્રાઇમ મેમ્બરશિપ લોન્ચ કરી હતી.
નવી જીઓ પ્રાઇમ મેમ્બરશિપ અને તેના લાભો
જીઓની આ નવી પ્રાઇમ મેમ્બરશિપ મેળવવા માટે ગ્રાહકોએ ₹૩૦૦ નો વન-ટાઇમ ચાર્જ ચૂકવવો પડશે. આ મેમ્બરશિપ પ્રીપેડ અને પોસ્ટપેડ બંને પ્રકારના યુઝર્સ માટે ઉપલબ્ધ રહેશે. આ મેમ્બરશિપનો સૌથી મોટો ફાયદો એ છે કે ગ્રાહકોને આગામી વર્ષે ૫ સપ્ટેમ્બર સુધી ‘પ્રાઇસ લોક’ (Price Lock) નો લાભ મળશે. એટલે કે જો આ એક વર્ષ દરમિયાન કમ્પની પોતાના ટેરિફ પ્લાનની કિંમતોમાં વધારો કરશે, તો પણ પ્રાઇમ યુઝર્સને જૂના અને સસ્તા દરો પર જ રિચાર્જ કરવાનો લાભ મળતો રહેશે.
આ ઉપરાંત પ્રાઇમ મેમ્બરશિપ લેનારા ગ્રાહકોને ₹૩૦૦ નું પૂર્ણ કેશબેક પણ ઓફર કરવામાં આવી રહ્યું છે. આ કેશબેકનો ઉપયોગ ગ્રાહકો નવા JioHome અથવા JioPC કનેક્શન લેતી વખતે કરી શકશે. એટલું જ નહીં, નવું જીઓ સિમ લેનારા ગ્રાહકોને ₹૩૦૦ નું કેશબેક વાઉચર પણ મળશે, જેને MyJio એપ, જીઓ સ્ટોર અથવા કમ્પનીની સત્તાવાર વેબસાઇટ (Jio.com) પર સરળતાથી રિડીમ કરી શકાશે.
₹૨૯૯ વાળો પોપ્યુલર રિચાર્જ પ્લાન
ગ્રાહકોની પસંદગીને ધ્યાનમાં રાખીને જીઓએ ₹૨૯૯ વાળા પ્લાનને યથાવત રાખવાની જાહેરાત કરી છે. આ પ્લાનમાં યુઝર્સને ૨૮ દિવસની વેલિડિટી મળે છે. સુવિધાઓની વાત કરીએ તો દેશભરમાં કોઈપણ નેટવર્ક પર અનલિમિટેડ વોઇસ કોલિંગ અને ફ્રી નેશનલ રોમિંગનો લાભ મળે છે. આ સાથે ગ્રાહકોને દૈનિક ૧.૫ GB હાઇ-સ્પીડ ડેટા અને રોજ ૧૦૦ ફ્રી SMS મળે છે. OTT અને ડિજિટલ બેનિફિટ્સ અંતર્ગત આ પ્લાનમાં JioHotstar નું સબ્સ્ક્રિપ્શન, Google Pro Gemini એઆઈ ટૂલનો એક્સેસ અને ૫૦૦ GB સુધીનું ક્લાઉડ સ્ટોરેજ બિલકુલ ફ્રી આપવામાં આવી રહ્યું છે.
જીઓના નવા ૩-ઇન-૧ ધમાકા પ્લાન્સ
ગ્રાહકોને એક જ રિચાર્જમાં તમામ સુવિધાઓ પૂરી પાડવા માટે જીઓએ તાજેતરમાં ત્રણ નવા આર્થિક ‘૩-ઇન-૧’ રિચાર્જ પ્લાન પણ લોન્ચ કર્યા છે. આ પ્લાન્સમાં ડેટા, ઓટીટી (OTT) એપ્સ અને લાઇવ ટીવી ચેનલ્સનું શ્રેષ્ઠ કોમ્બિનેશન રજૂ કરવામાં આવ્યું છે. આ પ્લાન્સ અનુક્રમે ૨૮ દિવસ, ૮૪ દિવસ અને ૩૬૫ દિવસ (૧ વર્ષ) ની વેલિડિટી સાથે આવે છે.
આ પ્લાન્સમાં ગ્રાહકોને JioHotstar, Prime Video, YouTube Premium, Zee5 અને SonyLIV સહિત કુલ ૧૫ થી વધુ લોકપ્રિય OTT એપ્સનો એક્સેસ મળે છે. આ સિવાય યુઝર્સને વર્ષ દરમિયાન ૩૬૫ GB સુધીનો બલ્ક ડેટા પણ આપવામાં આવે છે. આ આકર્ષક ૩-ઇન-૧ પ્લાન્સની કિંમત ₹૨૦૦, ₹૫૫૦ અને ₹૨૦૦૦ રાખવામાં આવી છે, જે ભારતીય ટેલિકોમ બજારમાં ખૂબ જ સ્પર્ધાત્મક સાબિત થશે.
