મોંઘી બ્રાન્ડેડ દવાઓમાંથી મુક્તિ: સરકારની આ ખાસ એપથી ઘરબેઠાં શોધો નજીકનું જન ઔષધિ કેન્દ્ર
આજના સમયમાં મેડિકલ સારવારથી લઈને દવાઓનો ખર્ચ સામાન્ય માણસના બજેટને ખોરવી નાખે છે. ખાસ કરીને બ્રાન્ડેડ દવાઓ એટલી મોંઘી હોય છે કે દરેક વ્યક્તિ માટે તેને ખરીદવી મુશ્કેલ બની જાય છે. લોકોની આ જ મુશ્કેલી અને આર્થિક બોજને દૂર કરવા માટે ભારત સરકારની વિશેષ મોબાઈલ એપ અત્યંત ઉપયોગી સાબિત થઈ રહી છે, જેના ઉપયોગથી દવાઓ પર થતો માસિક ખર્ચ 50% થી 80% સુધી ઘટાડી શકાય છે.
શું છે ‘જન ઔષધિ સુગમ’ એપ?
અહીં વાત થઈ રહી છે ‘જન ઔષધિ સુગમ’ (Jan Aushadhi Sugam) એપની. આ એક મફત મોબાઈલ એપ્લિકેશન છે, જેને ભારત સરકારના રસાયણ અને ખાતર મંત્રાલય દ્વારા વિકસાવવામાં આવી છે. આ એપનો મુખ્ય ઉદ્દેશ્ય નાગરિકોને તેમના ઘરની આસપાસ સ્થિત સરકારી ‘જન ઔષધિ કેન્દ્રો’ વિશે માહિતી આપવાનો અને તેમને અત્યંત સસ્તા દરે ગુણવત્તાસભર જેનરિક દવાઓ સરળતાથી ઉપલબ્ધ કરાવવાનો છે.
ઘેરબેઠાં જ થશે નાણાંની મોટી બચત
આ એપ જીપીએસ (GPS) અને ગૂગલ મેપની મદદથી તમારા સૌથી નજીકના ‘પ્રધાનમંત્રી ભારતીય જન ઔષધિ કેન્દ્ર’નું સરનામું અને રસ્તો બતાવે છે. તમે એપમાં કોઈપણ બીમારી અથવા દવાના સોલ્ટનું નામ (જેમ કે Paracetamol) ટાઈપ કરીને સરકારી મેડિકલ સ્ટોરમાં તેની ઉપલબ્ધતા ચકાસી શકો છો. આ ઉપરાંત, એપમાં એક ખાસ સરખામણી ફિચર પણ આપવામાં આવ્યું છે, જેનાથી તમે જોઈ શકો છો કે બજારમાં મળતી મોંઘી બ્રાન્ડેડ દવાની સરખામણીમાં જન ઔષધિની જેનરિક દવા કેટલી સસ્તી છે અને તમે કેટલા રૂપિયા બચાવી રહ્યા છો.
દવાઓના ખર્ચમાં થશે મોટો ઘટાડો અને ઉત્તમ ગુણવત્તા
જન ઔષધિ કેન્દ્રો પર મળતી જેનરિક દવાઓ ખુલ્લા બજારમાં મળતી સામાન્ય બ્રાન્ડેડ દવાઓ કરતાં 50% થી 90% સુધી સસ્તી હોય છે. આનાથી પરિવારનું માસિક મેડિકલ બિલ ખૂબ જ ઘટી જાય છે. સસ્તી હોવાની સાથે આ દવાઓની ગુણવત્તા સાથે કોઈ સમાધાન કરવામાં આવતું નથી, કારણ કે આ એપમાં દવાઓના લેબ ટેસ્ટિંગ અને WHO-GMP સર્ટીફિકેશન સંબંધિત તમામ વિગતો દર્શાવવામાં આવે છે. સરકાર દ્વારા સંચાલિત હોવાને કારણે દવાઓની કિંમત અને ગુણવત્તા સંપૂર્ણપણે વિશ્વસનીય હોય છે.
એપ કેવી રીતે ડાઉનલોડ કરવી?
આ ઉપયોગી એપને તમે ગૂગલ પ્લે સ્ટોર (Google Play Store) અથવા એરેપલ એપ સ્ટોર (Apple App Store) પરથી સરળતાથી ડાઉનલોડ કરી શકો છો. આ સિવાય જો તમે સરકારી સેવાઓ માટે ‘UMANG’ એપનો ઉપયોગ કરતા હોવ, તો તેમાંથી પણ જન ઔષધિ સુગમની સેવાઓ મેળવી શકાય છે.
