કેન્દ્રીય કર્મચારીઓ માટે મોટા સમાચાર: 8મા પગાર પંચમાં ફિટમેન્ટ ફેક્ટર અને પેન્શન વધારા પર નિર્ણય ટૂંક સમયમાં
દેશના 1 કરોડથી વધુ કેન્દ્રીય કર્મચારીઓ અને પેન્શનરો માટે પગાર ધોરણ (Salary Structure), ભથ્થાં અને પેન્શન સુધારણાને આખરી ઓપ આપવા તરફ 8મા પગાર પંચે (8th Pay Commission) એક અત્યંત મહત્વપૂર્ણ કદમ ઉઠાવ્યું છે. સુપ્રીમ કોર્ટના પૂર્વ જસ્ટિસ રંજના પ્રકાશ દેસાઈની અધ્યક્ષતામાં રચાયેલી આ સમિતિ હવે દેશના વિવિધ અગ્રણી શહેરો જેવાં કે જયપુર, ચેન્નઈ, પુડુચેરી અને ચંદીગઢમાં કર્મચારી સંગઠનો અને હિતધારકો સાથે મહત્ત્વની બેઠકો યોજવા જઈ રહી છે. આ ઉપરાંત આયોગ મુંબઈની વિશેષ મુલાકાત પણ લેશે.
આગામી બેઠકો અને મુલાકાતોનું સંપૂર્ણ શેડ્યૂલ
આયોગે કેન્દ્રીય કર્મચારીઓની માંગણીઓ અને સૂચનો સાંભળવા માટે નીચે મુજબના કાર્યક્રમો નક્કી કર્યા છે:
જયપુર: અહીં 31 ઓગસ્ટ અને 1 સપ્ટેમ્બરના રોજ મહત્વપૂર્ણ બેઠકો યોજાશે. આ બેઠક માટે હિતધારકો પાસેથી અરજીઓ મેળવવાની છેલ્લી તારીખ 18 ઓગસ્ટ રાખવામાં આવી છે.
ચેન્નઈ અને પુડુચેરી: ચેન્નઈમાં 7 અને 8 સપ્ટેમ્બરના રોજ પરામર્શ બેઠકો યોજાશે. ત્યારબાદ તુરંત જ 9 સપ્ટેમ્બરના રોજ પુડુચેરીમાં સુનાવણી હાથ ધરવામાં આવશે.
મુંબઈ: આયોગ મુંબઈમાં સેન્ટ્રલ રેલ્વે ઝોનના રેલ્વે વિભાગોની ગ્રાઉન્ડ લેવલે વિશેષ મુલાકાત લેશે. બંધ રૂમમાં બેઠક કરવાને બદલે આયોગના સભ્યો પ્રત્યક્ષ રીતે રેલ્વે કર્મચારીઓની કામ કરવાની પરિસ્થિતિઓ અને તેમની સમસ્યાઓનું નિરીક્ષણ કરશે. મુંબઈ પ્રવાસની ચોક્કસ તારીખો ટૂંક સમયમાં જાહેર થશે.
ચંદીગઢ: અહીં 16 થી 18 સપ્ટેમ્બર દરમિયાન કર્મચારી યુનિયનો સાથે રૂબરૂ ચર્ચા થશે, જેના માટે 25 ઓગસ્ટ સુધી અરજી કરવાની રહેશે.
કઈ માંગણીઓ પર થશે મુખ્ય ચર્ચા? (Fitment Factor)
કેન્દ્રીય કર્મચારીઓમાં હાલ સૌથી વધુ ચર્ચાનો વિષય ‘ફિટમેન્ટ ફેક્ટર’ (Fitment Factor) છે. NCJCM સહિતના વિવિધ કર્મચારી સંગઠનોએ 7મા પગાર પંચના 2.57 થી વધારીને 8મા પગાર પંચ હેઠળ ફિટમેન્ટ ફેક્ટર 3.83 કરવાની જોરદાર માંગ કરી છે. જો આ માંગણી સ્વીકારાય તો ન્યૂનતમ મૂળ પગારમાં (Basic Pay) મોટો ઉછાળો આવશે. આર્થિક નિષ્ણાતોનું માનવું છે કે જો સરકાર ફિટમેન્ટ ફેક્ટરને 2.6 થી 2.85 ની રેન્જમાં પણ મંજૂરી આપે છે, તો પણ બેઝિક પેમાં 25% થી 30% સુધીનો સીધો વધારો થઈ શકે છે.
પેન્શન અને ગ્રેચ્યુઈટીની મર્યાદામાં પણ વધારાની શક્યતા
8મા પગાર પંચની ભલામણો લાગુ થતાં ન્યૂનતમ પેન્શન (Minimum Pension) માં પણ મોટો વધારો જોવા મળી શકે છે. હાલમાં મહિને મળતું ₹9,000 નું લઘુત્તમ પેન્શન વધીને ₹22,500 થી ₹25,200 સુધી પહોંચવાનો અંદાજ છે. આ સિવાય, NCJCM એ નિવૃત્તિ સમયે મળતી મહત્તમ ગ્રેચ્યુઈટી મર્યાદાને હાલના ₹25 લાખથી વધારીને સીધી ₹75 લાખ કરવાની દરખાસ્ત કરી છે. જોકે, કેટલાક અન્ય સંગઠનોએ આ મર્યાદા ₹50 લાખ સુધી કરવાની રજૂઆત પણ કરી છે.
