Instagram: સોશિયલ મીડિયામાં નવો ટ્રેન્ડ: ઇન્સ્ટાગ્રામ લાવ્યું ગાયબ થઈ જાય તેવા ફોટાવાળી સ્પેશિયલ એપ
ઇન્સ્ટાગ્રામ દ્વારા સોશિયલ મીડિયાના યુગમાં એક નવું કદમ ઉઠાવવામાં આવ્યું છે. સ્નેપચેટ (Snapchat) અને બીરીયલ (BeReal) જેવી એપ્સની લોકપ્રિયતાને ધ્યાનમાં રાખીને, મેટા માલિકીના ઇન્સ્ટાગ્રામ દ્વારા ‘Instants’ નામની નવી એપ ગ્લોબલી લોન્ચ કરવામાં આવી છે. આ એપનો મુખ્ય ઉદ્દેશ્ય યુઝર્સને વધુ ઓથેન્ટિક અને રિયલ-ટાઇમ ફોટો શેરિંગનો અનુભવ કરાવવાનો છે.
ઇન્સ્ટાગ્રામ હવે માત્ર રીલ્સ કે ફિલ્ટર કરેલા ફોટા પૂરતું મર્યાદિત નથી રહ્યું. કંપનીએ હવે ‘Instants’ એપ લોન્ચ કરી છે, જે સીધી રીતે સ્નેપચેટને ટક્કર આપશે. આ એપમાં શેર કરવામાં આવેલી તસવીરો એકવાર જોયા પછી આપમેળે ગાયબ થઈ જશે અને ૨૪ કલાક પછી તેને એક્સેસ કરી શકાશે નહીં.
૧. સ્ટેન્ડઅલોન અને ઇન્ટિગ્રેટેડ એપ
Instants ની સૌથી મોટી ખાસિયત એ છે કે તે એક સ્ટેન્ડઅલોન એપ તરીકે પણ ઉપલબ્ધ છે અને તેને મુખ્ય ઇન્સ્ટાગ્રામ એપની અંદરથી પણ વાપરી શકાય છે. જ્યારે તમે આ એપ ખોલો છો, ત્યારે તે સીધી કેમેરામાં ખુલે છે, જે યુઝરને વિલંબ કર્યા વિના તરત જ ફોટો લેવાની સુવિધા આપે છે.
૨. એડિટિંગ વગરના ‘ઓથેન્ટિક’ ફોટા
આ એપનો કન્સેપ્ટ અન્ય એપ્સ કરતા અલગ છે. અહીં તમે તમારી ગેલેરીમાંથી જૂના ફોટા અપલોડ કરી શકતા નથી.
નો ફિલ્ટર, નો એડિટ: તમે જે ફોટો લો છો તેને એડિટ કરી શકાતો નથી.
માત્ર કેપ્શન: ફોટો ક્લિક કર્યા પછી તમારી પાસે માત્ર કેપ્શન લખવાનો વિકલ્પ હશે. આનો હેતુ એ છે કે લોકો ગ્લોસી અને એડિટ કરેલી ઈમેજને બદલે વાસ્તવિક પળોને શેર કરે.
૩. પ્રાઇવસી અને સુરક્ષા: સ્ક્રીનશોટ બ્લોક
ઇન્સ્ટાગ્રામે આ એપમાં સુરક્ષા પર ખાસ ભાર મૂક્યો છે.
સ્ક્રીનશોટ પ્રોટેક્શન: Instants પર મોકલવામાં આવેલા ફોટાનો સામેવાળો વ્યક્તિ સ્ક્રીનશોટ લઈ શકશે નહીં.
સ્ક્રીન રેકોર્ડિંગ બ્લોક: એપમાં સ્ક્રીન રેકોર્ડિંગ પર પણ પ્રતિબંધ છે.
અનડૂ (Undo) ફીચર: જો તમે ભૂલથી કોઈને ફોટો મોકલી દીધો હોય, તો તે વ્યક્તિ તેને ખોલે તે પહેલાં તમે તેને ‘Undo’ કરીને કેન્સલ કરી શકો છો.
૪. આર્કાઇવ અને સ્ટોરી રિકેપ
ભલે આ ફોટા ૨૪ કલાકમાં ગાયબ થઈ જાય, પરંતુ ઇન્સ્ટાગ્રામ યુઝર્સને એક ખાસ સુવિધા આપે છે. તમે મોકલેલા ‘Instants’ એક વર્ષ સુધી તમારા પ્રાઇવેટ આર્કાઇવમાં સચવાયેલા રહેશે. વર્ષના અંતે તમે આ ફોટાઓનો ઉપયોગ કરીને તમારી યાદોને ‘સ્ટોરી રિકેપ’ તરીકે ફરીથી શેર કરી શકશો.
૫. ટીન સેફ્ટી (Teen Safety) ફીચર્સ
યુવા યુઝર્સની સુરક્ષા માટે ઇન્સ્ટાગ્રામે આમાં ‘ફેમિલી સેન્ટર કંટ્રોલ’ અને ‘શેયર્ડ સ્ક્રીન ટાઈમ લિમિટ’ જેવા ફીચર્સ ઉમેર્યા છે. આનાથી વાલીઓ મોનિટર કરી શકશે કે તેમના બાળકો આ એપ પર કેટલો સમય વિતાવે છે.
