ICMR Cholesterol Study: કોલેસ્ટ્રોલ અંગે મોટો ચેતવણીરૂપ રિપોર્ટ: યુવાનો અને ફિટ દેખાતા લોકો પણ હૃદયરોગના જોખમ હેઠળ
જો તમે એમ માનતા હોવ કે કોલેસ્ટ્રોલ વધવાની સમસ્યા માત્ર મોટી ઉંમરના લોકો કે માત્ર સ્થૂળતા (મોટાપો) ધરાવતી વ્યક્તિઓને જ થાય છે, તો તાજેતરમાં સામે આવેલો એક તબીબી અહેવાલ તમારી ધારણા બદલી નાખશે. ઈન્ડિયન કાઉન્સિલ ઓફ મેડિકલ રિસર્ચ (ICMR) ના એક વ્યાપક અભ્યાસ અનુસાર, ભારતમાં આશરે 10 માંથી 9 પુખ્ત વયના લોકો (Adults) માં કોલેસ્ટ્રોલનું પ્રમાણ સામાન્ય સ્તર પર નથી.
આ ગંભીર આરોગ્ય સમસ્યા હવે માત્ર વૃદ્ધો સુધી મર્યાદિત નથી રહી, પરંતુ યુવાનો અને બહારથી સંપૂર્ણપણે ફિટ અને સ્વસ્થ દેખાતા લોકો પણ તેનો ભોગ બની રહ્યા છે.
કઈ બીમારીઓનું જોખમ સતત વધી રહ્યું છે?
ICMR દ્વારા આ સંશોધન દેશભરના 23,665 લોકો પર કરવામાં આવ્યું હતું. રિપોર્ટ મુજબ, 87.3 ટકા ભારતીય પુખ્ત વયના લોકો લોહીમાં અસામાન્ય ફેટ (Lipid Imbalance) ની સમસ્યાથી પીડાઈ રહ્યા છે.
આનો અર્થ એ થાય છે કે લોકોના શરીરમાં ખરાબ કોલેસ્ટ્રોલ (LDL) અથવા ટ્રાઈગ્લિસરાઈડ્સનું પ્રમાણ વધી ગયું છે, અથવા તો હૃદયનું રક્ષણ કરતા સારા કોલેસ્ટ્રોલ (HDL) નું પ્રમાણ જરૂરી મર્યાદા કરતા ઘટી ગયું છે. લોહીની ધમનીઓમાં જમા થતું આ ફેટ લાંબા ગાળે હાર્ટ એટેક, ગંભીર હૃદયરોગ અને બ્રેઈન સ્ટ્રોકનું જોખમ અનેક ગણું વધારી દે છે.
કયા લોકોને છે સૌથી વધુ જોખમ?
અભ્યાસના આંકડા દર્શાવે છે કે આ સમસ્યા હવે ગ્રામીણ અને શહેરી બંને વિસ્તારોમાં વ્યાપકપણે ફરી વળી છે:
શહેરી અને ગ્રામીણ સરખામણી: શહેરોમાં રહેતા 89 ટકા લોકોમાં કોલેસ્ટ્રોલ અસામાન્ય મળ્યું છે, તો બીજી તરફ ગ્રામીણ વિસ્તારોમાં પણ આ આંકડો 86.5 ટકા જેટલો ઊંચો નોંધાયો છે.
પુરુષો કરતા મહિલાઓમાં વધુ પ્રમાણ: રિપોર્ટ અનુસાર 91.1 ટકા મહિલાઓમાં કોલેસ્ટ્રોલ સંબંધિત ગડબડ જોવા મળી છે, જ્યારે પુરુષોમાં આ પ્રમાણ 83.5 ટકા છે.
યુવાનોમાં ચિંતાજનક વધારો: સૌથી ચોંકાવનારી બાબત એ છે કે ભારતમાં 30 થી 39 વર્ષની વયના યુવાનોમાં આ સમસ્યા સૌથી વધુ જોવા મળી રહી છે. એટલે કે નાની ઉંમરે જ મોટા પ્રમાણમાં લોકો હૃદયરોગના જોખમ તરફ ધકેલાઈ રહ્યા છે.
ફિટ દેખાતા લોકો માટે પણ ખતરાની ઘંટડી
સામાન્ય રીતે એવું માનવામાં આવે છે કે જેમને ડાયાબિટીસ, હાઈ બ્લડ પ્રેશર કે સ્થૂળતા હોય તેમને જ કોલેસ્ટ્રોલની તકલીફ થાય છે. પરંતુ આ સ્ટડીમાં સામે આવ્યું છે કે આવી કોઈ પણ બીમારી ન ધરાવતા હોય તેવા આશરે 40 ટકા લોકોમાં પણ કોલેસ્ટ્રોલ અસામાન્ય હતું.
“માત્ર વજન સામાન્ય હોવું કે શારીરિક રીતે ફિટ દેખાવું એ તમારું હૃદય સંપૂર્ણપણે સ્વસ્થ હોવાની ગેરંટી નથી. આ એક ‘સાયલન્ટ કિલર’ સમસ્યા છે જે લક્ષણો વિના શરીરને નુકસાન પહોંચાડે છે.”
બચાવ અને નિવારણના ઉપાયો
આરોગ્ય નિષ્ણાતોના મતે, સમયસર જાગૃતિ અને યોગ્ય જીવનશૈલી દ્વારા આ જોખમથી બચી શકાય છે:
લિપિડ પ્રોફાઈલ ટેસ્ટ (Lipid Profile Test): વર્ષમાં ઓછામાં ઓછું એકવાર લોહીની આ સામાન્ય તપાસ કરાવવી જોઈએ, જેથી શરીરમાં ગુડ, બેડ કોલેસ્ટ્રોલ અને ટ્રાઈગ્લિસરાઈડ્સના સ્તરની સાચી માહિતી મળે.
આહારમાં સુધારો: પ્રોસેસ્ડ ફૂડ, વધુ પડતું તેલ-ઘી, તળેલું અને જંક ફૂડ ખાવાનું ટાળવું જોઈએ અને લીલા શાકભાજી તથા ફળોનું સેવન વધારવું જોઈએ.
નિયમિત વ્યાયામ: દરોજજ ઓછામાં ઓછું 30 મિનિટ ઝડપી ચાલવું (Brisk Walking), યોગ કે કસરત કરવી અત્યંત જરૂરી છે.
ડિજિટલ અને મેડિકલ માર્ગદર્શન: જો લિપિડ પ્રોફાઈલમાં ગડબડ જણાય તો ડોક્ટરની સલાહ મુજબ આહારમાં ફેરફાર અને જરૂર પડે દવાઓ શરૂ કરવી જોઈએ.
