Wi-Fi Speed Tips: ઘરમાં રાઉટર ક્યાં મૂકવું જોઈએ? રોકેટ જેવી સ્પીડ મેળવવા માટે અનુસરો આ સોશિયલ ટિપ્સ
આજના ડિજિટલ યુગમાં ઘરમાં સારું અને હાઈ-સ્પીડ ઈન્ટરનેટ પ્લાન હોવા છતાં જો વારંવાર સ્પીડ ધીમી થઈ જતી હોય કે વિડીયો બફરિંગ થવા લાગતો હોય, તો દર વખતે ઈન્ટરનેટ પ્રોવાઈડર કંપનીને દોષ આપવો યોગ્ય નથી. ઘણી વખત આ સમસ્યા કોઈ ટેકનિકલ ખામીને કારણે નહીં, પરંતુ તમારા ઘરના Wi-Fi Router ની ખોટી જગ્યા (Placement) ને કારણે ઊભી થતી હોય છે.
જો રાઉટર ઘરના કોઈ ખોટા ખૂણામાં કે ખોટી જગ્યાએ રાખવામાં આવ્યું હોય, તો તેનો સિગ્નલ ઘરના તમામ રૂમ સુધી યોગ્ય રીતે પહોંચી શકતો નથી. આ સમસ્યા ઉકેલવા માટે તમારે તરત જ નવું કે મોંઘું રાઉટર ખરીદવાની જરૂર નથી. માત્ર રાઉટરનું સ્થાન બદલીને અને કેટલીક નાની-નાની બાબતોનું ધ્યાન રાખીને તમે ઘરે બેઠા જ Wi-Fi ની સ્પીડ અને કવરેજ બમણી કરી શકો છો.
૧. રાઉટરને હંમેશા ઘરના મધ્ય ભાગમાં (Center Location) રાખો
ઘરમાં વાઈ-ફાઈ સિગ્નલ સમાન રીતે અને શ્રેષ્ઠ રીતે ફેલાય તે માટે રાઉટરને શક્ય હોય ત્યાં સુધી ઘરના બિલકુલ વચ્ચેના ભાગમાં (Central Area) રાખવું જોઈએ. જ્યારે રાઉટર મધ્યમાં હોય છે, ત્યારે તેના રેડિયો સિગ્નલ્સ ચારેય તરફ 360 ડિગ્રીમાં સરળતાથી પહોંચી શકે છે, જેનાથી ઘરના મોટાભાગના વિસ્તારોમાં મજબૂત કનેક્શન મળે છે.
જો તમે રાઉટરને ઘરના કોઈ ખૂણામાં, બારી પાસે કે બહારની દીવાલ સાથે અડીને મૂકી રાખશો, તો સિગ્નલનો મોટો ભાગ ઘરની બહાર જતો રહેશે. ઉપરાંત, ઘરના બીજા છેડે આવેલા રૂમ સુધી સિગ્નલ પહોંચવામાં વચ્ચે વધુ અંતર અને મોટી દીવાલો આવશે, જેનાથી તે રૂમમાં Wi-Fi નો સિગ્નલ અત્યંત નબળો થઈ જશે.
૨. રાઉટરને જમીન કે ફ્લોર પર રાખવાનું ટાળો
ઘણા લોકો રાઉટરને વાયરના ગોટાળાથી બચવા માટે સીધા જમીન કે ફ્લોર (Floor) પર મૂકી દેતા હોય છે, જે ટેકનિકલ દ્રષ્ટિએ બિલકુલ ખોટું છે. રાઉટરને હંમેશા સોફા, ટેબલ, શેલ્ફ કે દીવાલ પર અમુક ઊંચાઈએ રાખવું જોઈએ.
મોટાભાગના વાઈ-ફાઈ રાઉટર પોતાના સિગ્નલ્સ નીચેની તરફ અને આજુબાજુમાં ફેંકે છે. તેથી જો રાઉટર જમીન પર હશે, તો તેના સિગ્નલ્સનો મોટો હિસ્સો ફ્લોરિંગ દ્વારા જ શોષાઈ જશે. રાઉટરને જમીનથી થોડી ઊંચાઈ પર (ઓછામાં ઓછું ૪ થી ૫ ફીટની ઊંચાઈએ) અને ખુલ્લી જગ્યાએ રાખવાથી સિગ્નલને તમારા મોબાઈલ કે લેપટોપ સુધી પહોંચવામાં ઓછી અડચણો નડે છે.
૩. અલમારી કે કબાટમાં છુપાવીને ન રાખો
ઘરનો લુક કે ડેકોરેશન બગાડવા ન દેવાના ચક્કરમાં કેટલાક લોકો રાઉટરને કબાટ, ડ્રોઅર કે ટીવી કેબિનેટની અંદર બંધ કરીને રાખી દે છે. આનાથી રાઉટર નજરે તો નથી પડતું, પરંતુ તેની કામગીરી અને સ્પીડ પર ગંભીર અસર પડે છે.
લાકડું, કાચ, ધાતુ (Metal) અને કોંક્રિટની દીવાલો વાઈ-ફાઈના સિગ્નલ માટે મોટા અવરોધક (Blockers) તરીકે કામ કરે છે. તેથી રાઉટરને હંમેશા ખુલ્લી અને હવાદાર જગ્યાએ રાખવું જ હિતાવહ છે. તેની આસપાસ ઈલેક્ટ્રોનિક વસ્તુઓ કે વધુ પડતો સામાન પણ ન હોવો જોઈએ.
સ્પીડ વધારવા માટેની અન્ય ઉપયોગી ટિપ્સ
ઈલેક્ટ્રોનિક ઉપકરણોથી દૂર રાખો: માઈક્રોવેવ ઓવન, વાયરલેસ ફોન, બ્લૂટૂથ સ્પીકર અને ટીવી જેવા ઉપકરણો રાઉટરના સિગ્નલમાં દખલ (Interference) ઊભી કરે છે. તેથી રાઉટરને આ સાધનોથી થોડું દૂર રાખવું.
એન્ટેનાની દિશા યોગ્ય કરો: જો તમારા રાઉટરમાં બહાર દેખાતા એન્ટેના હોય, તો એક એન્ટેનાને ઊભું (Vertical) અને બીજાને આડું (Horizontal) રાખો. આનાથી સિગ્નલ કવરેજ વધુ સારું મળે છે.
સમયસર રીસ્ટાર્ટ કરો: અઠવાડિયામાં એકવાર રાઉટરને થોડી સેકન્ડ માટે બંધ કરીને ફરી ચાલુ (Reboot) કરવાથી તેની કેશ મેમરી ક્લિયર થાય છે અને ઈન્ટરનેટ સ્પીડ સ્થિર રહે છે.
