Google Maps: રોજિંદા જીવન અને પ્રવાસમાં કામ લાગશે ગૂગલ મેપ્સનું ‘લિસ્ટ’ ફીચર, સેવ કરી રાખો તમારી મનપસંદ જગ્યાઓ
આજના ડિજિટલ યુગમાં ગૂગલ મેપ્સ (Google Maps) આપણા જીવનનો એક અનિવાર્ય હિસ્સો બની ગયું છે. ક્યાંક બહાર જવાનું હોય, અજાણ્યો રસ્તો શોધવાનો હોય, કોઈ નવું રેસ્ટોરન્ટ કે પેટ્રોલ પંપ શોધવાનું હોય, લોકો આંખો બંધ કરીને ગૂગલ મેપ્સનો ઉપયોગ કરે છે. નેવિગેશન સિવાય પણ આ એપમાં ઘણા એવા શાનદાર ફીચર્સ છુપાયેલા છે, જેના વિશે મોટાભાગના સામાન્ય યુઝર્સ હજુ પણ અજાણ છે. આવું જ એક સ્માર્ટ ફીચર છે ‘ગૂગલ મેપ્સ લિસ્ટ’ (Google Maps Lists). આ ફીચર તમારા પ્રવાસ (Travel Planning) ને ખૂબ જ સરળ અને વ્યવસ્થિત બનાવી શકે છે.
શું છે ગૂગલ મેપ્સનું આ ‘લિસ્ટ’ ફીચર?
સરળ શબ્દોમાં કહીએ તો, ગુગલ મેપ્સ લિસ્ટ એ એપની અંદર જ મળતું એક ઇન-બિલ્ટ ટૂલ છે. આ ટૂલ તમને તમારી પસંદગીની અથવા ભવિષ્યમાં મુલાકાત લેવા જેવી જગ્યાઓને અલગ-અલગ કેટેગરી પ્રમાણે સેવ (Save) કરવાની સુવિધા આપે છે. જો તમે કોઈ લાંબી ટ્રિપ પર જવાનું વિચારી રહ્યા છો, તો તમે જે-તે શહેરના પ્રખ્યાત સ્થળો, હોટલ્સ અને કેફેની યાદી અગાઉથી જ તૈયાર કરીને આ ફીચરમાં સાચવી શકો છો, જેથી પ્રવાસ દરમિયાન તમારો સમય બગડે નહીં.
પ્રવાસના શોખીનો માટે આશીર્વાદ સમાન
આ ફીચર ખાસ કરીને એવા લોકો માટે ખૂબ જ ઉપયોગી છે જેમને અવારનવાર મુસાફરી કરવી ગમે છે અથવા જેઓ વર્ષમાં એક-બે વાર પરિવાર સાથે વેકેશન ગાળવા બહાર જાય છે.
સ્માર્ટ આયોજન: તમે કોઈ ચોક્કસ શહેર કે દેશ માટે એક અલગ લિસ્ટ બનાવી શકો છો. ઉદાહરણ તરીકે, જો તમે ગોવા કે મનાલી જઈ રહ્યા છો, તો તમે ‘My Goa Trip’ નામનું લિસ્ટ બનાવી તેમાં હોટેલ, જોવાલાયક સ્થળો, બજેટ રેસ્ટોરન્ટ્સ અને શોપિંગ માર્કેટ જેવી તમામ લોકેશન્સ અગાઉથી જ એડ કરી શકો છો.
રોજિંદા જીવનમાં પણ ઉપયોગી (Daily Use)
એવું બિલકુલ નથી કે આ ફીચર માત્ર લાંબી મુસાફરી દરમિયાન જ કામ આવે છે. તમે તમારા પોતાના શહેરમાં પણ તેનો રોજિંદો ઉપયોગ કરી શકો છો. સોશિયલ મીડિયા પર કોઈ નવું કેફે, સુંદર પાર્ક કે નવી ખૂલેલી લાઈબ્રેરી વિશે જાણીને આપણને ત્યાં જવાનું મન થાય છે, પણ વ્યસ્તતાના કારણે આપણે નામ ભૂલી જઈએ છીએ. આવા સમયે તમે તમારા શહેર માટે ‘Local Hangouts’ અથવા ‘Must Visit Cafes’ જેવી લિસ્ટ બનાવીને તેને સેવ રાખી શકો છો અને વિકેન્ડ પર ત્યાં જઈ શકો છો.
મેપ ખોલતા જ આઈકન સ્વરૂપે દેખાશે તમારી લોકેશન
આ ફીચરની સૌથી મોટી ખાસિયત એ છે કે જ્યારે તમે કોઈ પણ લોકેશનને તમારી બનાવેલી લિસ્ટમાં સેવ કરો છો, ત્યારે ગૂગલ મેપ પર તે જગ્યા સામાન્ય ડોટના બદલે એક ખાસ આઈકન કે ઈમોજી (Emoji) સ્વરૂપે લાઈવ દેખાવા લાગે છે. આનાથી ફાયદો એ થાય છે કે જ્યારે તમે પ્રવાસ દરમિયાન મેપ ખોલશો, ત્યારે તમારી સેવ કરેલી તમામ જગ્યાઓ સ્ક્રીન પર સ્પષ્ટ દેખાશે અને તમે સરળતાથી સમજી શકશો કે તમારી નજીક કયું પ્રવાસી સ્થળ આવેલું છે.
ગૂગલ મેપ્સ પર તમારી પોતાની લિસ્ટ કેવી રીતે બનાવશો?
તમારા ફોનમાં આ સ્માર્ટ લિસ્ટ તૈયાર કરવા માટે નીચેના સરળ સ્ટેપ્સ ફોલો કરો:
૧. એપ ઓપન કરો: તમારા સ્માર્ટફોનમાં Google Maps એપ્લિકેશન ખોલો.
૨. ‘You’ ટેબ પર જાઓ: સ્ક્રીનની નીચેની બાજુએ આપેલા ‘You’ (અથવા સેવ્ડ) ટેબ પર ક્લિક કરો.
૩. નવી લિસ્ટ બનાવો: અહીં તમને ‘New List’ નો ઓપ્શન જોવા મળશે, તેના પર ટેપ કરો.
૪. નામ અને ઈમોજી સેટ કરો: તમારી લિસ્ટને ઓળખવા માટે એક સરસ નામ આપો (દા.ત., ‘દિલ્હી ફૂડ ટૂર’) અને તેની સાથે કોઈ મેચિંગ આઈકન કે ઈમોજી જોડી દો.
૫. જગ્યાઓ ઉમેરો (Add Places): હવે તમે જે જગ્યાએ જવા માંગો છો તેને મેપ પર સર્ચ કરો અને ‘Save’ બટન પર ક્લિક કરીને તમારી બનાવેલી નવી લિસ્ટમાં એડ કરી દો.
