Gold Silver Rate Today: ચાંદીમાં ₹16,000નો ઉછાળો, સોનું ₹1.62 લાખને પાર; જાણો અમદાવાદ-વડોદરાના નવા ભાવ
કેન્દ્ર સરકારે સોના અને ચાંદી પરના ઈમ્પોર્ટ ટેરિફમાં 6 ટકાથી વધારીને સીધો 15 ટકાનો વધારો કરવાનો મોટો નિર્ણય લીધો છે. આ પગલાનો મુખ્ય ઉદ્દેશ્ય સોનાની આયાત ઘટાડવી, કરન્ટ એકાઉન્ટ ડેફિસિટ (CAD) ને નિયંત્રિત કરવી અને નબળા પડતા ભારતીય રૂપિયાને ટેકો આપવાનો છે. અત્યારે રૂપિયો દર અઠવાડિયે નવી ઐતિહાસિક નીચી સપાટીએ પહોંચી રહ્યો છે, જેને રોકવા માટે આ આકરો નિર્ણય લેવામાં આવ્યો છે.
બજારમાં ભાવનો ભડકો
સરકારની આ જાહેરાત બાદ તરત જ MCX (મલ્ટી કોમોડિટી એક્સચેન્જ) પર ચાંદીની કિંમત પ્રતિ કિલોગ્રામ ₹2,95,805 સુધી પહોંચી ગઈ છે, જ્યારે સોનું પ્રતિ 10 ગ્રામ ₹1,62,648ના સ્તરે પહોંચ્યું છે. ચાંદીની કિંમતમાં 6 ટકાની અપર સર્કિટ લાગી હતી, જે વૈશ્વિક સ્તરે ચાલી રહેલા ભૌગોલિક-રાજકીય તણાવ અને મોંઘવારીની ગંભીરતા દર્શાવે છે.
સોનાના આજના લેટેસ્ટ ભાવ (શહેર મુજબ)
| શહેર | 24 કેરેટ સોનું (પ્રતિ ગ્રામ) | 22 કેરેટ સોનું (પ્રતિ ગ્રામ) |
| અમદાવાદ | ₹16,794 | ₹15,395 |
| વડોદરા | ₹16,794 | ₹15,395 |
| મુંબઈ | ₹16,789 | ₹15,390 |
| દિલ્હી | ₹16,804 | ₹14,331 |
| ચેન્નાઈ | ₹15,634 | ₹14,331 |
| બેંગલુરુ | ₹16,789 | ₹15,390 |
ચાંદીની કિંમતમાં અધધ ₹16,675નો વધારો
ઈમ્પોર્ટ ડ્યુટી વધારવાના નિર્ણય બાદ રિટેલ માર્કેટમાં ચાંદી પ્રતિ કિલોગ્રામ આશરે ₹16,675 મોંઘી થઈ છે. MCX પર ચાંદીનો જુલાઈ કોન્ટ્રાક્ટ 7.25 ટકાની તેજી સાથે ₹2,99,283 ની આસપાસ ટ્રેડ થઈ રહ્યો છે. ચેન્નાઈ જેવા શહેરોમાં ચાંદી ₹3,00,100 ના ઐતિહાસિક સ્તરે પહોંચી ગઈ છે, જ્યારે દિલ્હી અને મુંબઈમાં ભાવ ₹2,90,100 ની આસપાસ છે.
સરકારે કેમ લેવો પડ્યો આ નિર્ણય?
ભારત તેની જરૂરિયાતનું લગભગ તમામ સોનું અને ચાંદી વિદેશથી આયાત કરે છે, જેનું ચૂકવણું ડોલરમાં કરવું પડે છે. પશ્ચિમ એશિયા (ઈરાન-ઇઝરાયેલ) સંકટને કારણે આંતરરાષ્ટ્રીય બજારમાં કાચા તેલના ભાવ વધ્યા છે, જેનાથી ભારતનો વિદેશી મુદ્રા ભંડાર (Forex Reserve) ઝડપથી ઘટી રહ્યો છે. ડોલરનો આ બહાર જતો પ્રવાહ રોકવા માટે સરકારે બિન-જરૂરી ચીજોની આયાત પર અંકુશ લગાવ્યો છે.
આર્થિક આંકડાઓ શું કહે છે?
નાણાકીય વર્ષ 2025-26માં ભારતની સોનાની આયાત 24 ટકા વધીને $71.98 અબજની ઐતિહાસિક રેકોર્ડ સપાટીએ પહોંચી હતી. તેના કારણે દેશની કુલ વ્યાપાર ખાધ (Trade Deficit) વધીને $333.2 અબજ થઈ અને કરન્ટ એકાઉન્ટ ડેફિસિટ (CAD) જીડીપીના 1.3 ટકા સુધી પહોંચી ગઈ. આ આર્થિક ખાડાને પૂરવા અને રૂપિયાની કિંમત જાળવી રાખવા માટે ટેક્સમાં વધારો કરવો સરકાર માટે અનિવાર્ય બન્યો હતો.
