ટેક જગતમાં નોકરીઓનું સંકટ: એક જ મહિનામાં 46,000 થી વધુ કર્મચારીઓની થઈ છટણી
માત્ર એક મહિનાના ટૂંકા ગાળામાં ટેક ક્ષેત્રની જાયન્ટ કંપનીઓએ આશરે 46,750 કર્મચારીઓને કામ પરથી છૂટા કરી દીધા છે. નવાઈની વાત એ છે કે આ કંપનીઓ એક તરફ AI પાછળ અબજો ખર્ચી રહી છે અને બીજી તરફ કર્મચારીઓની સંખ્યામાં ધરખમ ઘટાડો કરી રહી છે.
કઈ કંપનીમાં કેટલી છટણી?
મેટા (Meta): ફેસબુકની પેરેન્ટ કંપની મેટા તેના કુલ વર્કફોર્સના ૧૦ ટકા એટલે કે આશરે 8,000 કર્મચારીઓને છૂટા કરવાની તૈયારીમાં છે. માર્ક ઝકરબર્ગે અગાઉ જ સંકેત આપ્યો હતો કે AI ને કારણે હવે મોટી ટીમોની જરૂરિયાત ઓછી થઈ શકે છે.
ઓરેકલ (Oracle): રિપોર્ટ્સ અનુસાર, ઓરેકલે એકસાથે 30,000 કર્મચારીઓને છૂટા કર્યા હોવાનું મનાય છે. જોકે કંપનીએ સત્તાવાર આંકડો જાહેર કર્યો નથી, પરંતુ કર્મચારીઓના નિવેદનો આ ગંભીર સ્થિતિ તરફ ઈશારો કરે છે.
માઈક્રોસોફ્ટ (Microsoft): માઈક્રોસોફ્ટે સીધી છટણીને બદલે અલગ રસ્તો અપનાવ્યો છે. કંપનીએ તેના 51 વર્ષના ઈતિહાસમાં પહેલીવાર અમેરિકામાં તેના 7 ટકા કર્મચારીઓને (આશરે 8,750 લોકો) સ્વૈચ્છિક નિવૃત્તિ (Voluntary Buyout) ની ઓફર આપી છે.
કર્મચારીઓ અને માર્કેટ પર અસર
આટલા મોટા પાયે છટણી થવાને કારણે આઈટી સેક્ટરમાં નોકરી મેળવવા માટેની સ્પર્ધા ખૂબ વધી જશે. તેની સીધી અસર કર્મચારીઓના સેલેરી પેકેજ પર પણ પડી શકે છે. ભારત જેવા દેશો, જ્યાં આ કંપનીઓના મોટા ઓપરેશનલ યુનિટ્સ આવેલા છે, ત્યાં પણ આની માઠી અસર જોવા મળી શકે છે. નિષ્ણાતો માને છે કે 2026 એવું વર્ષ સાબિત થશે જ્યાં AI ટેકનોલોજી કામ કરવાની પરંપરાગત રીતોને સંપૂર્ણપણે બદલી નાખશે.
