Blinkit પરથી મંગાવ્યું દહીં, રિફંડની લાલચમાં ગુમાવ્યા ₹98,000! જાણો કેવી રીતે થઈ ઓનલાઈન છેતરપિંડી
ઓનલાઈન શોપિંગમાં ખરાબ કે ક્ષતિગ્રસ્ત સામાન મળે ત્યારે ગ્રાહકો સામાન્ય રીતે પૈસા પરત મેળવવા માટે કંપનીનો સંપર્ક કરે છે. પરંતુ સાયબર ઠગો હવે આવી જ ફરિયાદોને નિશાન બનાવી લોકોને છેતરતા હોવાના કિસ્સા સામે આવી રહ્યા છે. બેંગલુરુમાં એક મહિલાને દહીંનું પેકેટ ખરાબ મળ્યું હતું, પરંતુ રિફંડ મેળવવાની કોશિશ દરમિયાન તેમના બેંક ખાતામાંથી ₹98,000 ઉપડી ગયા.
બ્લિંકિટમાંથી મંગાવેલું દહીંનું પેકેટ નીકળ્યું ખરાબ
અહેવાલ મુજબ, બેંગલુરુના વસંત નગરમાં રહેતી 56 વર્ષીય ગૃહિણીને 17 ઑક્ટોબરે ક્વિક કોમર્સ પ્લેટફોર્મ બ્લિંકિટ પરથી દહીંનો ઓર્ડર આપ્યો હતો. ડિલિવરી મળ્યા બાદ તેમને પેકેટ ફાટેલું જોવા મળ્યું. મહિલાએ આ અંગે ડિલિવરી એજન્ટને ફરિયાદ કરી હતી. એજન્ટે તેમને ગ્રાહક સેવા વિભાગનો સંપર્ક કરવાની સલાહ આપી, ત્યારબાદ તેમણે ઇન્ટરનેટ પર સંપર્ક નંબર શોધવાનું શરૂ કર્યું.
નકલી કસ્ટમર કેરનો સંપર્ક કરતાં ઠગાઈનો ભોગ બન્યાં
મહિલાએ ઇન્ટરનેટ પર મળેલા એક ફોન નંબર પર સંપર્ક કર્યો હતો. સામેની વ્યક્તિએ પોતાને ગ્રાહક સેવા પ્રતિનિધિ તરીકે રજૂ કરીને રિફંડ અપાવવાની ખાતરી આપી. ત્યારબાદ તેને વોટ્સએપ પર એક લિંક મોકલી અને ફાટેલા દહીંના પેકેટનો ફોટો અપલોડ કરવા જણાવ્યું. મહિલાને આ પ્રક્રિયા સામાન્ય લાગી અને તેમણે અજાણ્યા વ્યક્તિની સૂચના પ્રમાણે આગળની કાર્યવાહી કરી.
પાસવર્ડ નાખતાં જ એપ ગાયબ, ખાતામાંથી ₹98 હજાર કપાયા
ફોટો અપલોડ કર્યા પછી અન્ય એક વ્યક્તિએ મહિલાનો સંપર્ક કર્યો અને રિફંડની પ્રક્રિયા પૂરી કરવાના બહાને તેમને ડિજિટલ પેમેન્ટ એકાઉન્ટ ખોલીને બેલેન્સ તપાસવાનું કહ્યું. મહિલાના જણાવ્યા પ્રમાણે, તેમણે એકાઉન્ટનો પાસવર્ડ દાખલ કર્યો ત્યારબાદ એપ તેમની સ્ક્રીન પરથી ગાયબ થઈ ગઈ. થોડા જ સમયમાં તેમને જાણ થઈ કે તેમના બેંક ખાતામાંથી ₹98,000ની રકમ ઉપાડી લેવામાં આવી છે.
રિફંડ મેળવતી વખતે આ સાવચેતી રાખવી જરૂરી
આવી છેતરપિંડીથી બચવા માટે હંમેશાં બ્લિંકિટની સત્તાવાર એપમાં ઉપલબ્ધ સપોર્ટ વિકલ્પોનો ઉપયોગ કરવો જોઈએ. કંપનીની વેબસાઇટ પર આપવામાં આવેલી માહિતી મુજબ, તેનું કોઈ સત્તાવાર કસ્ટમર કેર ફોન નંબર નથી. તેથી સર્ચ એન્જિન પર મળતા અજાણ્યા નંબરો પર આંખ બંધ કરીને વિશ્વાસ ન કરવો. અજાણી લિંક ખોલવી નહીં અને OTP, UPI PIN, પાસવર્ડ કે બેંકિંગની ગુપ્ત માહિતી કોઈની સાથે શેર કરવી નહીં.
સાયબર પોલીસની તપાસ શરૂ, છેતરપિંડી થાય તો તાત્કાલિક પગલાં લો
ઠગાઈની જાણ થતાં મહિલાએ પોલીસનો સંપર્ક કર્યો હતો. ત્યારબાદ સાયબર ક્રાઇમ પોલીસે ફરિયાદના આધારે કેસ નોંધી તપાસ શરૂ કરી હોવાનું અહેવાલમાં જણાવાયું છે. જો તમારા ખાતામાંથી પણ અનધિકૃત રીતે પૈસા ઉપડી જાય, તો તાત્કાલિક બેંકને જાણ કરો અને ભારતની સાયબર ક્રાઇમ હેલ્પલાઇન 1930 પર ફરિયાદ નોંધાવો. વહેલી ફરિયાદથી નાણાં અટકાવવા કે પાછાં મેળવવાની શક્યતા વધી શકે છે. રિફંડ માટે ક્યારેય અજાણ્યા વ્યક્તિની સૂચના મુજબ સંવેદનશીલ માહિતી દાખલ કરશો નહીં.
