BJP: ચૂંટણી ગણિતમાં મોટો ફેરફાર: આસામ અને બંગાળની અનામત બેઠકો પર ભાજપનું વર્ચસ્વ
તાજેતરમાં જાહેર થયેલા આસામ અને પશ્ચિમ બંગાળના ચૂંટણી પરિણામોમાં ભારતીય જનતા પાર્ટી (BJP) એ એક નવો અને મજબૂત ટ્રેન્ડ પ્રસ્થાપિત કર્યો છે. પરંપરાગત રીતે અન્ય પક્ષોની વોટબેંક ગણાતા અનુસૂચિત જાતિ (SC) અને અનુસૂચિત જનજાતિ (ST) મતદારોએ આ વખતે ભાજપ પર વિશ્વાસ મૂક્યો છે. આસામ અને બંગાળ બંને રાજ્યોમાં અનામત બેઠકો પર ભાજપના શાનદાર પ્રદર્શને વિરોધ પક્ષોના ગણિત બગાડી નાખ્યા છે.
પશ્ચિમ બંગાળ: ઐતિહાસિક જીત અને દલિત મતોનું ધ્રુવીકરણ
પશ્ચિમ બંગાળમાં ભાજપે અત્યાર સુધીનું સર્વશ્રેષ્ઠ પ્રદર્શન કરતા 207 બેઠકો હાંસલ કરી છે. આ જીતમાં અનામત બેઠકોનો ફાળો નિર્ણાયક રહ્યો છે.
SC બેઠકો: રાજ્યની કુલ 68 એસસી અનામત બેઠકોમાંથી ભાજપે 51 બેઠકો જીતીને વિજય પતાકા લહેરાવી છે, જ્યારે સત્તાધારી TMC માત્ર 17 બેઠકો પર સમેટાઈ ગઈ છે.
ST બેઠકો: ભાજપે આદિવાસી મતદારોમાં પોતાની પકડ મજબૂત કરી છે, જેના પરિણામે તમામ 16 એસટી અનામત બેઠકો પર ભાજપનો વિજય થયો છે.
કુલ સમીકરણ: 84 SC/ST બેઠકોમાંથી ભાજપે 67 બેઠકો જીતી છે, જે દર્શાવે છે કે મતુઆ સમુદાય અને સરહદી વિસ્તારોમાં વસતા દલિતોએ ભાજપના પક્ષમાં એકતરફી મતદાન કર્યું છે.
આસામ: પરિસીમન અને ગઠબંધનનો ફાયદો
આસામમાં પરિસીમન (Delimitation) પછી અનામત બેઠકોની સંખ્યામાં વધારો થયો હતો, જેનો સીધો લાભ ભાજપ અને NDA ગઠબંધનને મળ્યો છે.
SC બેઠકો: અનામત બેઠકોની સંખ્યા 8 થી વધીને 9 થઈ છે, જેમાંથી ભાજપે 5 અને ગઠબંધને કુલ 8 બેઠકો જીતી છે. કોંગ્રેસને માત્ર 1 બેઠકથી સંતોષ માનવો પડ્યો છે.
ST બેઠકો: અહીં પણ એસટી બેઠકો 16 થી વધીને 19 થઈ છે. NDA ગઠબંધને તમામ 19 બેઠકો પર વિજય મેળવ્યો છે, જેમાં ભાજપે એકલે હાથે 13 બેઠકો જીતી છે.
ગઠબંધનની ભૂમિકા: બોડોલેન્ડ પીપલ્સ ફ્રન્ટ (BPF) અને AGP સાથેના ગઠબંધને પહાડી વિસ્તારોમાં ભાજપના વિસ્તરણમાં મહત્વની ભૂમિકા ભજવી છે.
દક્ષિણ ભારત અને પુડુચેરીમાં અસર
ભાજપના પ્રભાવની અસર દક્ષિણના રાજ્યોમાં પણ જોવા મળી છે. તમિલનાડુમાં NDA સહયોગી AIADMK એ 46 SC બેઠકોમાંથી 9 અને 2 ST બેઠકોમાંથી 1 બેઠક જીતી છે. પુડુચેરીમાં ઓલ ઈન્ડિયા એનઆર કોંગ્રેસે 5 માંથી 2 SC બેઠકો પર વિજય મેળવ્યો છે.
