Akhilesh Yadav: NEET પેપર લીક પર લોકસભામાં ગરમાવો: બોલવાની તક ન મળતા ભડક્યા અખિલેશ યાદવ, આપી રસ્તા પર ઉતરવાની ચેતવણી
દેશભરમાં ચર્ચાનો વિષય બનેલી નીટ (NEET) પરીક્ષામાં ગડબડી અને પેપર લીકના મુદ્દે લોકસભામાં ભારે હોબાળો જોવા મળ્યો હતો. બુધવારે ગૃહમાં આ સંવેદનશીલ મુદ્દા પર ચર્ચા દરમિયાન ત્યારે સ્થિતિ વધુ વણસી, જ્યારે માત્ર કોંગ્રેસ અને ભાજપને જ બોલવાની તક આપવામાં આવી. આ બાબતથી નારાજ થઈને સમાજવાદી પાર્ટી (SP)ના અધ્યક્ષ અખિલેશ યાદવે સ્પીકર ઓમ બિરલા સમક્ષ ભારે વિરોધ નોંધાવ્યો હતો અને ગૃહમાં પોતાનો અસંતોષ વ્યક્ત કર્યો હતો.
અખિલેશ યાદવનો સ્પીકર પર આક્ષેપ: ‘શું તમારી વચ્ચે સમજૂતી થઈ છે?’
લોકસભાની કાર્યવાહી દરમિયાન અખિલેશ યાદવે સ્પીકર ઓમ બિરલાને સીધો સવાલ કરતા કહ્યું કે, “તમે માત્ર કોંગ્રેસ અને ભાજપને જ બોલવાનો મોકો આપ્યો, શું તમે બંને પક્ષો વચ્ચે કોઈ અંદરખાને સમજૂતી કરી લીધી છે? સમાજવાદી પાર્ટીને શા માટે બોલવા દેવામાં ન આવી?”
તેમણે પક્ષપાતનો આરોપ લગાવતા ઉમેર્યું કે, “અધ્યક્ષ જી, આ વલણ બિલકુલ યોગ્ય નથી. નીટનો મુદ્દો કોઈ એક પક્ષનો નથી, આ દેશના લાખો યુવાનો અને વિદ્યાર્થીઓના ભવિષ્યનો સવાલ છે. અમે બધા જ આ દેશના ભવિષ્ય એવા વિદ્યાર્થીઓ માટે લડાઈ લડી રહ્યા છીએ.”
‘વિદ્યાર્થીઓ માટે અમે રસ્તા પર ઉતરીશું’ – અખિલેશ યાદવની ચેતવણી
નીટ પેપર લીક પ્રકરણ પર આકરા પ્રહારો કરતા અખિલેશ યાદવે સ્પષ્ટ કર્યું કે આ વિષયને રાજકીય ચશ્માથી ન જોવો જોઈએ. તેમણે કહ્યું કે જો સરકાર વિદ્યાર્થીઓનો અવાજ નહીં સાંભળે તો સમાજવાદી પાર્ટી રસ્તા પર ઉતરીને આંદોલન કરશે.
સરકાર દ્વારા વિરોધ કરી રહેલા વિદ્યાર્થીઓ પર કરવામાં આવેલા બળપ્રયોગની સખત શબ્દોમાં નિંદા કરતા તેમણે કહ્યું કે, “સરકારે આંદોલનકારી વિદ્યાર્થીઓ સાથે જે વર્તન કર્યું છે તે શરમજનક છે. વિદ્યાર્થીઓના હાથ-માથા તોડી નાખવામાં આવ્યા, તેમના કપડાં ફાડી નાખવામાં આવ્યા. શું સરકાર હવે આપણી દીકરીઓના કપડાં ફાડવાનું કામ કરશે?”
સ્પીકર ઓમ બિરલાનો વળતો જવાબ
અખિલેશ યાદવના આકરા વિરોધ અને આરોપો સામે સ્પીકર ઓમ બિરલાએ ગૃહમાં સ્થિતિ સંભાળવાનો પ્રયાસ કર્યો હતો. તેમણે સ્પષ્ટતા કરતા કહ્યું કે, “તમારા પક્ષો વચ્ચેના આંતરિક વિવાદોને હું આ આસન પર બેસીને ઉકેલી શકું નહીં. ગૃહમાં તમામ પક્ષોનો પક્ષ આવી ચૂક્યો છે.”
ઓમ બિરલાએ વધુમાં જણાવ્યું કે સમાજવાદી પાર્ટી ચર્ચા કરવા માંગે છે, કોંગ્રેસ પણ ચર્ચા ઈચ્છે છે અને સરકાર પણ વાતચીત માટે તૈયાર છે. પરંતુ સંસદની મર્યાદાઓ હોય છે અને ગૃહની ગેલેરીમાં ઊભા રહીને આવી રીતે ચર્ચા થઈ શકે નહીં. આ હોબાળા બાદ લોકસભાની કાર્યવાહી સ્થગિત કરી દેવામાં આવી હતી.
‘મજબૂરીમાં પીએમ આવાસ જવું પડ્યું’
વડાપ્રધાન આવાસ તરફ કરવામાં આવેલા વિપક્ષના પ્રદર્શન અંગે અખિલેશ યાદવે ચોખવટ કરી હતી. તેમણે કહ્યું કે, “હું અને રાહુલ ગાંધી મજબૂરીમાં વડાપ્રધાન આવાસ તરફ ગયા હતા. જો સરકારે સંસદની અંદર જ વિપક્ષ અને વિદ્યાર્થીઓની વાત સાંભળી લીધી હોત, તો અમારે રસ્તા પર જઈને પીએમ આવાસ ઘેરવાની નૌબત જ ન આવી હોત.”
તેમણે સવાલ ઉઠાવ્યો હતો કે સરકાર જો યુવાનોના મુદ્દાઓ પર સંસદની બહાર નિવેદનો આપી શકતી હોય, તો સંસદની અંદર જવાબ આપવાથી કેમ ભાગી રહી છે?
સંસદીય બાબતોના મંત્રીની સ્પષ્ટતા
આ અગાઉ કોંગ્રેસ સાંસદ કે.સી. વેણુગોપાલે લોકસભામાં નીટનો મુદ્દો ઉઠાવીને તાત્કાલિક વિસ્તૃત ચર્ચાની માંગ કરી હતી. તેના જવાબમાં કન્દ્રીય સંસદીય બાબતોના મંત્રી કિરન રિજિજૂએ સરકારનો પક્ષ મૂકતા સ્પષ્ટ કર્યું હતું કે સરકાર આ ગંભીર મુદ્દા પર તમામ પાસાઓ પર ચર્ચા કરવા માટે સંપૂર્ણપણે તૈયાર છે.
