Flight Ticket મોંઘી થશે! Air India, Air India Express અને Akasa Airનો મોટો નિર્ણય
હવાઈ મુસાફરી કરતા મુસાફરો માટે મહત્વપૂર્ણ સમાચાર સામે આવ્યા છે. એર ઈન્ડિયા અને એર ઈન્ડિયા એક્સપ્રેસે ઘરેલુ તેમજ આંતરરાષ્ટ્રીય ફ્લાઈટ્સ માટે ફ્યુઅલ સરચાર્જમાં વધારો કરવાનો નિર્ણય લીધો છે. એરલાઇન્સ દ્વારા જણાવ્યા અનુસાર નવા સરચાર્જના દર 9 ઓક્ટોબરથી લાગુ કરવામાં આવશે. બીજી તરફ અકાસા એર પણ ઘરેલુ ફ્લાઈટ્સ માટે ફ્યુઅલ સરચાર્જ ફરીથી લાગુ કરશે અને આંતરરાષ્ટ્રીય રૂટ પર અગાઉના દરની સરખામણીએ વધારો કરશે. અકાસા એર માટે પણ સુધારેલા ચાર્જ 9 ઓક્ટોબરથી અમલમાં આવશે.
ATFના ભાવથી ખર્ચ વધ્યો
એર ઈન્ડિયા અને એર ઈન્ડિયા એક્સપ્રેસે વિમાનમાં ઉપયોગમાં લેવાતા એવિએશન ટર્બાઇન ફ્યુઅલ એટલે કે ATFના ભાવમાં થયેલા વધારાને ધ્યાનમાં રાખીને સરચાર્જમાં ફેરફાર કર્યો છે. એર ઈન્ડિયા એક્સપ્રેસના નવા દર 9 ઓક્ટોબરની મધરાતથી કરવામાં આવતી નવી બુકિંગ પર લાગુ થશે, જ્યારે એર ઈન્ડિયાના સુધારેલા ચાર્જ 9 ઓક્ટોબરે સવારે 11 વાગ્યાથી કરવામાં આવતી નવી બુકિંગ માટે લાગુ થશે. એટલે કે આ તારીખ અને સમય બાદ ટિકિટ બુક કરનારા મુસાફરોના કુલ ભાડામાં ફ્યુઅલ સરચાર્જના કારણે વધારો જોવા મળી શકે છે.
વૈશ્વિક પરિસ્થિતિની પણ અસર
એર ઈન્ડિયાના જણાવ્યા મુજબ છેલ્લા કેટલાક મહિનાઓ દરમિયાન ATFના ભાવમાં સતત વધઘટ જોવા મળી રહી છે. ભૂ-રાજકીય પરિસ્થિતિમાં આવેલા ફેરફારો અને વૈશ્વિક એનર્જી માર્કેટ પર રહેલા દબાણને કારણે ઈંધણના ભાવમાં અનિશ્ચિતતા વધી છે. એરલાઇનના જણાવ્યા પ્રમાણે તાજેતરમાં ઈંધણની કિંમતમાં થયેલા વધારાથી ઓપરેશનલ ખર્ચ પર સીધી અસર પડી છે. એરલાઇન્સના કુલ સંચાલન ખર્ચમાં ફ્યુઅલનો હિસ્સો નોંધપાત્ર હોવાથી ATFના ભાવ વધે ત્યારે તેનો પ્રભાવ ટિકિટના ભાડા અને સરચાર્જમાં ફેરફારના રૂપમાં મુસાફરો સુધી પહોંચે છે.
અંતર પ્રમાણે ચાર્જ નક્કી થશે
એર ઈન્ડિયા અને એર ઈન્ડિયા એક્સપ્રેસની ઘરેલુ ફ્લાઈટ્સમાં ફ્યુઅલ સરચાર્જ હવે મુસાફરીના અંતર પ્રમાણે અલગ રહેશે. 0થી 500 કિલોમીટર સુધીની ફ્લાઈટ માટે ₹400 સરચાર્જ રહેશે, જ્યારે 501થી 1,000 કિલોમીટર માટે ₹600 ચૂકવવા પડશે. 1,001થી 1,500 કિલોમીટર સુધીની મુસાફરી માટે ₹850 અને 1,501થી 2,000 કિલોમીટર સુધીના રૂટ માટે ₹1,200 સરચાર્જ નક્કી કરવામાં આવ્યો છે. 2,000 કિલોમીટરથી વધુ અંતરની ઘરેલુ ફ્લાઈટ માટે પણ ₹1,200નો ચાર્જ રહેશે. આંતરરાષ્ટ્રીય રૂટ પર વિસ્તાર અને દેશ પ્રમાણે સરચાર્જ 55થી 215 અમેરિકન ડોલર સુધી હોઈ શકે છે.
અન્ય એરલાઇન્સે પણ વધાર્યા
ફ્યુઅલ સરચાર્જમાં આ ફેરફાર એવા સમયે કરવામાં આવ્યો છે જ્યારે દેશની મોટી એરલાઇન ઇન્ડિગોએ પણ થોડા દિવસો અગાઉ પોતાના સરચાર્જમાં વધારો કર્યો હતો. બીજી તરફ અકાસા એર ઘરેલુ રૂટ પર ફ્યુઅલ સરચાર્જ ફરી શરૂ કરવાની સાથે આંતરરાષ્ટ્રીય મુસાફરી માટેના ચાર્જમાં પણ વધારો કરી રહી છે. આ નિર્ણયોના કારણે આગામી દિવસોમાં હવાઈ ટિકિટના કુલ ખર્ચ પર અસર થવાની શક્યતા છે. ખાસ કરીને લાંબા અંતરની ઘરેલુ અને આંતરરાષ્ટ્રીય મુસાફરી કરતા મુસાફરો માટે વધારાનો સરચાર્જ બજેટને અસર કરી શકે છે, તેથી ટિકિટ બુક કરતી વખતે નવા ચાર્જની વિગતો તપાસવી જરૂરી રહેશે.
