શું તમારા પાર્ટનરને આવે છે મોટેથી નસકોરાં? આ સ્લીપ એપનિયા (OSA) નું લક્ષણ હોઈ શકે છે
રાત્રે સારી અને ઘેરી ઊંઘ લેવી એ આપણા શારીરિક અને માનસિક સ્વાસ્થ્ય માટે અત્યંત જરૂરી છે. પરંતુ જો તમારી બાજુમાં સૂતેલો તમારો પાર્ટનર સતત અને મોટેથી નસકોરાં (Snoring) બોલાવતો હોય, તો તેનાથી તમારી આખી રાતની ઊંઘ બગાડી શકે છે. સામાન્ય રીતે નસકોરાં બોલાવવા એ એક સામાન્ય બાબત ગણાય છે, પરંતુ કેટલીકવાર તેનો અવાજ એટલો તીવ્ર હોય છે કે સામે વાળી વ્યક્તિ આખી રાત સરખી રીતે સૂઈ શકતી નથી.
આ સમસ્યા માત્ર રાત પૂરતી મર્યાદિત રહેતી નથી, પરંતુ તેની પ્રતિકૂળ અસર બીજા દિવસે થાક, આળસ અને ચીડિયાપણા સ્વરૂપે દેખાવા લાગે છે. તબીબી દ્રષ્ટિએ, સતત અને તીવ્ર નસકોરાં એ ઊંઘ સંબંધિત કોઈ ગંભીર બીમારીનો સંકેત પણ હોઈ શકે છે, તેથી તેને માત્ર રમુજ કે ટેવ ગણીને અવગણવું યોગ્ય નથી.
પાર્ટનરના નસકોરાં તમારા સ્વાસ્થ્ય પર પાડી શકે છે વિપરીત અસર
જો તમારો પાર્ટનર આખી રાત મોટેથી નસકોરાં બોલાવે છે, તો તેની અસર માત્ર તેની ઊંઘ પર જ નહીં પરંતુ તમારા પોતાના સ્વાસ્થ્ય પર પણ પડે છે. નસકોરાંના સતત આવતા અવાજને કારણે તમારી ઊંઘ વારંવાર ઊડી જાય છે અથવા તો ઊંઘ કાચી રહે છે. આના પરિણામે સવારે ઊઠતી વખતે શરીરમાં ભારેપણું, સુસ્તી અને સ્વભાવમાં ચીડિયાપણું અનુભવાય છે.
જો આ પરિસ્થિતિ લાંબા સમય સુધી જળવાઈ રહે, તો ઊંઘની આ સતત અછત તમારી રોજિંદી કાર્યક્ષમતા, નિર્ણયશક્તિ અને એકાગ્રતા પર ગંભીર અસર કરી શકે છે. તેથી, આને માત્ર રાતની એક નાની મુશ્કેલી ગણીને નજરઅંદાજ ન કરવી જોઈએ.
અપૂરતી ઊંઘથી દિવસભર થાક અને કામમાં અડચણ
રાત્રે વારંવાર ઊંઘ બગડવાને કારણે શરીરને જરૂરી આરામ અને રિકવરી મળતી નથી. પરિણામે, પૂરતા કલાક પથારીમાં વિતાવ્યા પછી પણ સવારે અસ્વસ્થતા અને થાક જળવાઈ રહે છે. દિવસ દરમિયાન ઓફિસનું કામ કરવું, અભ્યાસ કરવો કે વાહન ચલાવતી વખતે પણ પૂરતું ધ્યાન કેન્દ્રિત કરવું મુશ્કેલ બને છે.
લાંબા ગાળે આ સ્થિતિ તણાવ અને માનસિક થાક તરફ દોરી જાય છે. આથી, જો પાર્ટનરના નસકોરાં તમારી દૈનિક દિનચર્યાને ખોરવી રહ્યા હોય, તો આ સમસ્યાનું સમયસર નિવારણ લાવવું જરૂરી છે.
દરેક નસકોરું બીમારીનો સંકેત નથી હોતું
અહીં એ સમજવું પણ જરૂરી છે કે નસકોરાં બોલાવતી દરેક વ્યક્તિ કોઈ ગંભીર બીમારીથી પીડાય છે એવું નથી હોતું. ઘણીવાર સૂવાની ખોટી પોઝિશન (જેમ કે પીઠના બળે સૂવું), શરદી-સદીર્ને કારણે નાક બંધ હોવું, વજન વધારે હોવું કે થાક જેવા સામાન્ય કારણોસર પણ નસકોરાં આવી શકે છે.
પરંતુ જો નસકોરાંનો અવાજ અસામાન્ય રીતે મોટો હોય અને તે દરરોજ આવતા હોય, તો ચોક્કસપણે તપાસ કરાવવી જોઈએ. ખાસ કરીને જો સૂતી વખતે વ્યક્તિનો શ્વાસ અટકી જતો હોય, દમ ઘૂંટાતો હોય કે અચાનક ઉધરસ સાથે ઊંઘ ઊડી જતી હોય તો તબીબી સલાહ લેવી અનિવાર્ય બની જાય છે.
સ્લીપ એપનિયા (OSA) નું ગંભીર જોખમ
કેટલાક કિસ્સાઓમાં તીવ્ર અને સતત આવતા નસકોરાં એ ‘ઓબ્સ્ટ્રક્ટિવ સ્લીપ એપનિયા’ (Obstructive Sleep Apnea – OSA) નામની ગંભીર બીમારીનું લક્ષણ હોઈ શકે છે. આ શ્વસન સંબંધિત વિકારમાં સૂતી વખતે શ્વાસનળીમાં ક્ષણિક અવરોધ ઊભો થાય છે, જેનાથી મગજ અને શરીર સુધી ઓક્સિજનનો પુરવઠો ઘટી જાય છે અને વ્યક્તિની ઊંઘ વારંવાર તૂટે છે.
આ રોગના અન્ય લક્ષણોમાં દિવસ દરમિયાન અતિશય ઊંઘ આવવી, સવારે માથાનો દુખાવો થવો, મોં સુકાઈ જવું અને રાત્રે ગભરામણ થવી વગેરેનો સમાવેશ થાય છે. જો તમારા પાર્ટનરમાં આમાંથી કોઈ લક્ષણ જણાય, તો તેને સામાન્ય ગણીને છોડી દેવાને બદલે સ્લીપ સ્પેશિયાલિસ્ટ કે ડોક્ટર પાસે યોગ્ય તપાસ કરાવવી હિતાવહ છે.
