કેન્સરના દર્દીઓ માટે સંજીવની: સ્વાદુપિંડના જટિલ કેન્સરને માત આપશે આ નવી દવા, જીવવાની સંભાવના થશે બમણી
પેનક્રિયાટિક કેન્સર એટલે કે સ્વાદુપિંડનું કેન્સર વિશ્વના સૌથી ઘાતક અને જીવલેણ કેન્સરોમાંથી એક માનવામાં આવે છે, કારણ કે આ રોગના લક્ષણો શરૂઆતી સ્ટેજમાં સરળતાથી પકડાતા નથી. જોકે, હવે આ બીમારી સામે ઝૂઝતા દર્દીઓ માટે એક આશાસ્પદ અને રાહતના સમાચાર સામે આવ્યા છે. અમેરિકાની ફૂડ એન્ડ ડ્રગ એડમિનિસ્ટ્રેશન (FDA) એ એડવાન્સ્ડ પેનક્રિયાટિક કેન્સરની સારવાર માટે એક ક્રાંતિકારી નવી દવાને લીલી ઝંડી આપી દીધી છે, જેની શોધ વૈજ્ઞાનિકો અને તબીબો દાયકાઓથી કરી રહ્યા હતા.
કઈ નવી દવાને મળી મંજૂરી?
FDA એ ‘ડારાક્સોનરાસિબ’ (Daraxonarasib) નામની નવી દવાને મંજૂરી આપી છે, જેનું વેચાણ ‘રેવોલ્યુશન મેડિસિન્સ’ કંપની દ્વારા ‘રાસોન્ક’ (Rasonq) બ્રાન્ડ નેમ હેઠળ કરવામાં આવશે. આ પોતાની જાતની પ્રથમ એવી ગોળી (Pill) છે જે કેન્સર પિડિતોમાં મ્યુટેટેડ પ્રોટીનને બ્લોક કરે છે. 90 ટકાથી વધુ પેનક્રિયાટિક કેન્સરના કિસ્સાઓમાં આ જ મ્યુટેટેડ પ્રોટીન ટ્યુમરના ગ્રોથ માટે જવાબદાર હોય છે. દવાની અસાધારણ ક્ષમતાને ધ્યાનમાં રાખીને FDA એ તેને નક્કી સમય કરતા છ મહિના પહેલા જ ઝડપી મંજૂરી (Expedited Approval) આપી દીધી છે.
આ દવા કેવી રીતે કામ કરે છે?
આ ક્રાંતિકારી દવા RAS જીન ફેમિલીમાં થતા મ્યુટેશનને સીધું ટાર્ગેટ કરે છે, જે માનવ શરીરમાં કોષોના વિકાસને નિયંત્રિત કરે છે.
KRAS મ્યુટેશન પર પ્રહાર: સ્વાદુપિંડના કેન્સરને ફેલાવવામાં KRAS મ્યુટેશન સૌથી મોટું કારણ ગણાય છે.
અનડ્રગેબલ પ્રોટીન સોલ્યુશન: આ પ્રોટીનની જટિલ સંરચનાને કારણે અત્યાર સુધી તેના પર અસરકારક દવા બનાવવી અશક્ય માનવામાં આવતી હતી.
મોલેક્યુલર ગ્લુ ટેકનોલોજી: આ નવી દવા એક પ્રકારના ‘મોલેક્યુલર ગ્લુ’ નો ઉપયોગ કરીને વિવિધ KRAS સબટાઈપ્સ સાથે જોડાઈને કેન્સર ગ્રસ્ત કોષોનો નાશ કરે છે.
દર્દીઓ માટે કેમ સંજીવની સમાન છે?
અંતિમ તબક્કાના કેન્સર ધરાવતા 500 થી વધુ દર્દીઓ પર કરવામાં આવેલા ક્લિનિકલ ટ્રાયલમાં આ દવાના ખૂબ જ સકારાત્મક પરિણામો સામે આવ્યા છે. આ પ્રયોગ દરમિયાન જૂની કીમોથેરાપી સામે આ નવી ગોળી આપનાર દર્દીઓનો જીવવાની સંભાવના (Survival Rate) લગભગ બમણી થઈ ગઈ હતી. આ ઉપરાંત, પરંપરાગત કીમોથેરાપીની સરખામણીએ આ દવાની આડઅસરો (Side Effects) પણ ખૂબ જ ઓછી જોવા મળી છે.
દવાની કિંમત અને ભવિષ્યની શક્યતાઓ
કંપનીના જણાવ્યા અનુસાર, આ દવાના એક મહિનાના કોર્સની કિંમત આશરે 39,800 ડોલર (ભારતીય રૂપિયામાં લગભગ ₹33 લાખ) છે. આ દરરોજ લેવાની ઓરલ પિલ (ગોળી) ના રૂપમાં ઉપલબ્ધ થશે. નિષ્ણાતોના મતે, આ દવાની સફળતા બાદ હવે ફેફસાના કેન્સર અને અન્ય જટિલ કેન્સરની સારવાર માટે પણ આ જ ટેકનોલોજી પર આધારિત નવી દવાઓ વિકસાવવાના દરવાજા ખુલી ગયા છે.
