LPG Rate Today: યુદ્ધની અસર ગેસના ભાવ પર: ત્રીજી વખત વધ્યા કોમર્શિયલ ગેસના ભાવ, જાણો શા માટે શહેરો મુજબ ભાવ બદલાય છે
દેશમાં મોંઘવારીનો વધુ એક ડામ લાગ્યો છે. તેલ કંપનીઓએ કોમર્શિયલ એલપીજી (LPG) સિલિન્ડરના ભાવમાં મોટો વધારો ઝીંક્યો છે, જોકે સામાન્ય જનતા માટે રાહતના સમાચાર એ છે કે ઘરેલું ગેસ સિલિન્ડરના ભાવ હાલ પૂરતા સ્થિર રાખવામાં આવ્યા છે. 1 મેથી અમલી બનેલા નવા દરો મુજબ, 19 કિલોના કોમર્શિયલ સિલિન્ડરની કિંમતમાં અધધ ₹993નો વધારો કરવામાં આવ્યો છે, જેના કારણે હવે તેનો ભાવ ₹3,071.5 સુધી પહોંચી ગયો છે.
કોમર્શિયલ અને FTL સિલિન્ડર મોંઘા થયા
માત્ર 19 કિલોના સિલિન્ડર જ નહીં, પણ નાના વેપારીઓ દ્વારા ઉપયોગમાં લેવાતા 5 કિલોના ફ્રી ટ્રેડ એલપીજી (FTL) સિલિન્ડરની કિંમતમાં પણ ₹261નો તોતિંગ વધારો કરવામાં આવ્યો છે. ઈન્ડિયન ઓઈલ કોર્પોરેશન (IOC) એ સ્પષ્ટ કર્યું છે કે આ વધારો માત્ર વ્યવસાયિક ઉપયોગ માટેના ગેસ પર જ લાગુ પડશે.
નોંધનીય છે કે 28 ફેબ્રુઆરીથી ઈરાન અને અન્ય દેશો વચ્ચે ચાલી રહેલા યુદ્ધની અસરોને કારણે વૈશ્વિક સ્તરે ઈંધણના ભાવ વધ્યા છે. આ ત્રીજી વખત છે જ્યારે કોમર્શિયલ ગેસના ભાવ વધારવામાં આવ્યા હોય. અગાઉ માર્ચમાં ₹115 અને એપ્રિલમાં ₹200નો વધારો કરવામાં આવ્યો હતો.
મુખ્ય શહેરોમાં આજના લેટેસ્ટ ભાવ (કોષ્ટક)
| શહેર | ઘરેલું સિલિન્ડર (14.2 kg) | કોમર્શિયલ સિલિન્ડર (19 kg) |
| દિલ્હી | ₹913.0 | ₹3071.5 |
| મુંબઈ | ₹912.5 | ₹3024.0 |
| અમદાવાદ/સુરત | ₹922.0 (આશરે) | ₹3055.0 (આશરે) |
| કોલકાતા | ₹939.0 | ₹3202.5 |
| ચેન્નાઈ | ₹928.5 | ₹3237.0 |
| બેંગલુરુ | ₹915.5 | ₹3152.0 |
| પટના | ₹1002.5 | ₹3347.0 |
| રાંચી | ₹970.5 | ₹3252.0 |
શા માટે દરેક શહેરમાં ભાવ અલગ-અલગ હોય છે?
ઘણા લોકોના મનમાં પ્રશ્ન થાય છે કે જ્યારે જીએસટી (GST) આખા દેશમાં સમાન છે, તો ભાવ કેમ અલગ હોય છે? તેના મુખ્ય કારણો નીચે મુજબ છે:
પરિવહન ખર્ચ (Transportation Cost): ગેસ બોટલિંગ પ્લાન્ટથી તમારા શહેર સુધી પહોંચાડવાનો ખર્ચ અંતર મુજબ બદલાય છે. મુંબઈ જેવા બંદર ધરાવતા શહેરોમાં ટ્રાન્સપોર્ટ સસ્તું હોવાથી ત્યાં ભાવ ઓછા હોય છે, જ્યારે પહાડી કે અંતરિયાળ વિસ્તારોમાં આ ખર્ચ વધી જાય છે.
ડિસ્ટ્રિબ્યુશન માર્જિન: અલગ-અલગ શહેરોની ગેસ એજન્સીઓના પોતાના સંચાલન ખર્ચ અને માર્જિન અલગ હોય છે, જેની અસર અંતિમ કિંમત પર પડે છે.
સ્થાનિક ટેક્સ અને VAT: જોકે 5% GST નિશ્ચિત છે, પરંતુ કેટલાક રાજ્યોમાં સ્થાનિક સંસ્થાઓ દ્વારા લેવામાં આવતા નજીવા ચાર્જ કે વેટ (VAT) માં તફાવતને કારણે ભાવમાં થોડો ફેરફાર જોવા મળે છે.
સામાન્ય માણસ પર શું અસર પડશે?
જોકે ઘરેલું ગેસના ભાવ વધ્યા નથી, પરંતુ કોમર્શિયલ ગેસ મોંઘો થવાથી હોટલ, રેસ્ટોરન્ટ અને બહારનું ખાવાનું મોંઘું થઈ શકે છે. લગ્ન પ્રસંગો અને કેટરિંગના બજેટ પર પણ આ વધારાની સીધી અસર પડશે.
