ટેલિકોમ સેક્ટરમાં 20 વર્ષનો સૌથી મોટો ફેરફાર: કોલિંગ અને SMS માટે હવે નહીં ખર્ચવા પડે વધુ રૂપિયા
ટેલિકોમ રેગ્યુલેટર TRAI એ તમામ ટેલિકોમ કંપનીઓ (Jio, Airtel, Vi) ને 28 એપ્રિલ 2026 સુધીની સમયમર્યાદા આપી છે. આ સમય સુધીમાં કંપનીઓએ તેમના દરેક વેલિડિટી પીરિયડ માટે ‘વોઈસ અને SMS-ઓનલી’ પ્લાન રજૂ કરવા પડશે. અત્યાર સુધી ગ્રાહકોએ ફરજિયાતપણે ડેટા સાથેના મોંઘા બંડલ પ્લાન ખરીદવા પડતા હતા, પરંતુ હવે આ સ્થિતિ બદલાશે.
કેમ લેવાયો આ નિર્ણય?
TRAI ના મતે દેશમાં મોટી સંખ્યામાં એવા ગ્રાહકો છે (ખાસ કરીને વરિષ્ઠ નાગરિકો, ગ્રામીણ વિસ્તારો અને ઓછી આવક ધરાવતા લોકો) જેમને ઇન્ટરનેટ કે ડેટાની જરૂર હોતી નથી. તેમ છતાં, તેમણે કોલિંગ ચાલુ રાખવા માટે મોંઘા ડેટા પ્લાન લેવા પડે છે. નવા નિયમ મુજબ, ડેટા વગરના આ પ્લાન પ્રમાણસર સસ્તા હશે.
ગ્રાહકોને શું ફાયદો થશે?
ખર્ચમાં ઘટાડો: જેમને ડેટા નથી જોઈતો તેમને હવે સસ્તા ભાવે કોલિંગની સુવિધા મળશે.
પસંદગીની આઝાદી: ગ્રાહક પોતાની જરૂરિયાત મુજબ માત્ર કોલિંગ અથવા ડેટા-કોલિંગ કોમ્બો પસંદ કરી શકશે.
પારદર્શિતા: કંપનીઓએ તેમની વેબસાઇટ અને એપ પર આ પ્લાન્સને સ્પષ્ટપણે દર્શાવવા પડશે.
શું ડેટા પ્લાન મોંઘા થશે?
આ સિક્કાની બીજી બાજુ છે. ટેલિકોમ એક્સપર્ટ્સ માને છે કે જો વોઈસ પ્લાન સસ્તા થશે, તો કંપનીઓ તેમની આવક જાળવી રાખવા માટે ડેટા પ્લાનની કિંમતમાં વધારો કરી શકે છે. જે ગ્રાહકો ઇન્ટરનેટ અને કોલિંગ બંનેનો ઉપયોગ કરે છે, તેમના માટે માસિક ખર્ચ વધી શકે છે.
20 વર્ષ પછી પહેલીવાર સીધો હસ્તક્ષેપ
ભારતમાં 2004 થી “ટેરિફ ફોરબીયરન્સ” (Tariff Forbearance) ની નીતિ અમલમાં છે, જે અંતર્ગત કંપનીઓને પ્લાનની કિંમતો નક્કી કરવાની આઝાદી હતી. પરંતુ 20 વર્ષ બાદ TRAI એ ગ્રાહકોના હિતમાં આઝાદી પર લગામ લગાવીને સીધો હસ્તક્ષેપ કર્યો છે. આ નિર્ણયથી ડિજિટલ ઇન્ડિયાના વિસ્તાર અને ટેલિકોમ કંપનીઓના રોકાણ પર શું અસર પડશે તે આવનારો સમય જ કહેશે.
