RBI governor : તાજેતરમાં યોજાયેલી લોકસભા ચૂંટણી માટે આદર્શ આચાર સંહિતાના અમલને ધ્યાનમાં રાખીને સરકારી ખર્ચમાં ઘટાડો થવાને કારણે એપ્રિલ-જૂન ક્વાર્ટરમાં ભારતનો આર્થિક વિકાસ દર 15 મહિનાની નીચી સપાટી 6.7 ટકા પર ધીમો પડ્યો હતો. રિઝર્વ બેંક ઓફ ઈન્ડિયા (RBI)ના ગવર્નર શક્તિકાંત દાસે શનિવારે આ વાત કહી. આરબીઆઈએ ચાલુ નાણાકીય વર્ષના એપ્રિલ-જૂન ક્વાર્ટર માટે 7.1 ટકા વૃદ્ધિ દરનો અંદાજ મૂક્યો હતો. દાસે પત્રકારોને જણાવ્યું હતું કે, “રિઝર્વ બેંકે પ્રથમ ત્રિમાસિક ગાળા માટે 7.1 ટકા વૃદ્ધિ દરનો અંદાજ મૂક્યો હતો.” જોકે, નેશનલ સ્ટેટિસ્ટિકલ ઓફિસના પ્રથમ એડવાન્સ અંદાજ ડેટામાં વૃદ્ધિ દર 6.7 ટકા રહ્યો હતો.
ચૂંટણીના કારણે સરકારી ખર્ચમાં ઘટાડો થયો છે.
તેમણે કહ્યું કે વપરાશ, રોકાણ, ઉત્પાદન, સેવાઓ અને બાંધકામ જેવા જીડીપી વૃદ્ધિ માટે જવાબદાર ઘટકો અને મુખ્ય ડ્રાઇવરોએ સાત ટકાથી વધુ વૃદ્ધિ નોંધાવી છે. આરબીઆઈ ગવર્નરે કહ્યું કે માત્ર બે પાસાઓએ વિકાસ દરમાં થોડો ઘટાડો કર્યો છે અને તે છે – સરકારી ખર્ચ (કેન્દ્ર અને રાજ્ય બંને) અને કૃષિ. તેમણે જણાવ્યું હતું કે પ્રથમ ત્રિમાસિક ગાળા દરમિયાન સરકારી ખર્ચ ઓછો રહ્યો હતો અને આ કદાચ ચૂંટણીઓ (એપ્રિલથી જૂન) અને આદર્શ આચાર સંહિતાના અમલને કારણે થયું હતું.
કૃષિ ક્ષેત્રની વૃદ્ધિ નીચી રહી.
“અમે આશા રાખીએ છીએ કે આગામી ક્વાર્ટરમાં સરકારી ખર્ચમાં વધારો થશે અને વૃદ્ધિને જરૂરી ટેકો મળશે,” તેવી જ રીતે, કૃષિ ક્ષેત્રે એપ્રિલથી જૂન ક્વાર્ટરમાં લગભગ બે ટકાનો સૌથી નીચો વૃદ્ધિ દર નોંધ્યો છે. તેમણે કહ્યું કે ચોમાસું ઘણું સારું રહ્યું છે અને તેથી દરેક લોકો કૃષિ ક્ષેત્રને લઈને આશાવાદી અને સકારાત્મક છે. ગવર્નરે ભારપૂર્વક જણાવ્યું હતું કે, “સંજોગોમાં, અમને વિશ્વાસ છે કે RBI દ્વારા અંદાજિત 7.2 ટકાનો વાર્ષિક વૃદ્ધિ દર આગામી ક્વાર્ટરમાં શક્ય બનશે.”
