WhatsApp: વોટ્સએપ એકાઉન્ટ થશે વધુ સુરક્ષિત: ટુ-સ્ટેપ વેરિફિકેશનમાં મોટો બદલાવ, PIN ની જગ્યા લેશે મજબૂત પાસવર્ડ
વિશ્વના સૌથી લોકપ્રિય મેસેજિંગ પ્લેટફોર્મ WhatsApp પોતાના કરોડો યુઝર્સની પ્રાઈવસી અને એકાઉન્ટ સિક્યુરિટીને વધુ મજબૂત બનાવવા માટે એક મોટો ફેરફાર કરવા જઈ રહ્યું છે. અત્યાર સુધી વોટ્સએપમાં એકાઉન્ટની સુરક્ષા માટે ટુ-સ્ટેપ વેરિફિકેશન (Two-Step Verification) અંતર્ગત ૬ અંકનો ન્યૂમેરિક PIN વાપરવો પડતો હતો. પરંતુ, કંપની હવે આ જૂના PIN ના સ્થાને આલ્ફાન્યૂમેરિક પાસવર્ડ (Password) સિસ્ટમ લાવવા પર કામ કરી રહી છે.
આ નવા અપગ્રેડથી યુઝર્સનું વોટ્સએપ એકાઉન્ટ પહેલા કરતા પણ વધુ સુરક્ષિત અને હેકિંગ-પ્રૂફ બની જશે. વર્તમાન ટુ-સ્ટેપ વેરિફિકેશન સેટિંગ્સની જેમ જ આ આવનારું નવું ફીચર પણ સંપૂર્ણપણે મરજિયાત (Optional) રહેશે.
PIN ની જગ્યા લેશે મજબૂત પાસવર્ડ
વોટ્સએપના આગામી ફીચર્સ અને અપડેટ્સ પર નજર રાખતી વિશ્વસનીય વેબસાઈટ WABetaInfo ના અહેવાલ મુજબ, મેટા (Meta) ની માલિકી ધરાવતી કંપની આ નવા સુરક્ષા ફીચર પર સઘન કામ કરી રહી છે.
હાલમાં યુઝર્સને ટુ-સ્ટેપ વેરિફિકેશન માટે માત્ર ૬ અંકનો આંકડાકીય PIN સેટ કરવાનો વિકલ્પ મળે છે, જેને ક્યારેક ગેસ (અંદાજ) કરવો સરળ બની જાય છે. પરંતુ આ નવું અપડેટ આવ્યા પછી યુઝર્સ અક્ષરો (Alphabets), અંકો (Numbers) અને સ્પેશિયલ કેરેક્ટર્સને મિક્સ કરીને એક અત્યંત મજબૂત અને જટિલ પાસવર્ડ બનાવી શકશે.
ખાસ કરીને એવા યુઝર્સ માટે આ ફીચર આશીર્વાદરૂપ સાબિત થશે, જેઓ વોટ્સએપ દ્વારા નાણાકીય વ્યવહારો (Financial Transactions) કરે છે અથવા બિઝનેસ અને ગોપનીય ડેટા (Confidential Data) ની આપ-લે કરે છે.
હાલમાં ડેવલપમેન્ટ સ્ટેજ પર છે ફીચર
ટુ-સ્ટેપ વેરિફિકેશન એ એક ઓપ્શનલ ફીચર હોવાથી, જે યુઝર્સ તેને ઓન (ON) કરવા માંગતા નથી તેમના પર આ બદલાવની કોઈ અસર પડશે નહીં.
રિપોર્ટ્સ અનુસાર, આ ફીચર હાલમાં ડેવલપમેન્ટના પ્રારંભિક તબક્કામાં છે અને બેટા ટેસ્ટર્સ (Beta Testers) માટે પણ ઉપલબ્ધ કરાયું નથી. સત્તાવાર રોલઆઉટ પહેલાં કંપની તેના ટેસ્ટિંગના આધારે આ ફીચરમાં જરૂરી ફેરફારો કરી શકે છે અથવા તેને વધુ સુધારી શકે છે.
WhatsApp માં ટુ-સ્ટેપ વેરિફિકેશન કેવી રીતે સેટ કરવું?
વોટ્સએપ યુઝર્સ પોતાની સુવિધા મુજબ એકાઉન્ટમાં ટુ-સ્ટેપ વેરિફિકેશન સેટિંગ્સને મેનેજ કરી શકે છે. તેના માટે નીચે મુજબના સરળ સ્ટેપ્સ અનુસરવાના રહે છે:
૧. સૌથી પહેલાં વોટ્સએપ ઓપન કરી Settings માં અથવા તમારી પ્રોફાઈલ પિક્ચર પર ટેપ કરો.
૨. ત્યાં આપેલા Account ઓપ્શન પર ક્લિક કરો.
૩. હવે Two-Step Verification પસંદ કરીને તેને ‘Turn On’ અથવા ‘Turn Off’ કરી શકો છો.
૪. યુઝર્સ અહીંથી પોતાનો PIN કે પાસવર્ડ બદલી શકે છે તેમજ ઈમરજન્સી રિકવરી માટે પોતાનું ઈમેલ એડ્રેસ પણ અપડેટ કરી શકે છે.
ડિજિટલ ફ્રોડ અને એકાઉન્ટ હેકિંગના વધતા કિસ્સાઓ વચ્ચે વોટ્સએપનો આ સિક્યુરિટી અપગ્રેડ યુઝર્સના ડેટાને વધુ સુરક્ષિત બનાવવાની દિશામાં એક મહત્વપૂર્ણ કદમ સાબિત થશે.
