H-1B Visa Update: અમેરિકામાં વેતન સ્તરના નિયમોનું ઉલ્લંઘન કરનારી IT કન્સલ્ટિંગ કંપની સામે USCIS ની મોટી કાર્યવાહી
અમેરિકામાં નોકરી કરવાનું સપનું જોતા અને ત્યાં કાર્યરત આઇટી પ્રોફેશનલ્સ (IT Professionals) માટે એક મહત્વના સમાચાર સામે આવ્યા છે. યુનાઇટેડ સ્ટેટ્સ સિટિઝનશિપ એન્ડ ઇમિગ્રેશન સર્વિસિઝ (USCIS) એ એક અગ્રણી આઇટી કન્સલ્ટિંગ કંપની સામે કડક પગલાં લેતા તેના ઘણા H-1B વિઝા અરજીઓને ફગાવી દીધી છે અને કેટલાક મંજૂર થયેલા વિઝા પણ રદ (Revoke) કરી દીધા છે.
USCIS ના જણાવ્યા અનુસાર, કંપનીએ ઉચ્ચ કૌશલ્ય ધરાવતા ટેક પ્રોફેશનલ્સને તેમની વાસ્તવિક જવાબદારીઓ અને અનુભવના બદલામાં નિયમો કરતાં ખૂબ જ નીચા વેતન સ્તર (Wage Level) પર રજીસ્ટર કર્યા હતા. જો તમે પણ અમેરિકન આઇટી સેક્ટરમાં કામ કરી રહ્યા છો અથવા H-1B વિઝા દ્વારા યુએસ જવાની યોજના બનાવી રહ્યા છો, તો ઇમિગ્રેશન વિભાગની આ નવી કાર્યવાહી વિશે વિગતવાર જાણવું જરૂરી છે.
શા માટે કરવામાં આવી આ મોટી કાર્યવાહી?
USCIS ના વર્મોન્ટ (Vermont) ઓફિસ દ્વારા કરવામાં આવેલી તપામમાં જાણવા મળ્યું કે આઇટી કન્સલ્ટિંગ ફર્મે H-1B અરજીઓમાં ગંભીર ગેરરીતિઓ આચરી હતી. કંપનીએ વિઝા અરજીમાં ગ્રાફિક્સ, જોબ પ્રોફાઇલ અને અનુભવ ઉચ્ચ સ્તરનો દર્શાવ્યો હતો, પરંતુ તેની સરખામણીમાં કર્મચારીઓનું વેતન સ્તર (Wage Level) ઘણું નીચું રાખ્યું હતું.
USCIS ના મતે, આ રીતે વેતન સ્તર ઘટાડવાથી માત્ર વિદેશી કર્મચારીઓને યોગ્ય પગારથી વંચિત નથી રખાતા, પરંતુ તેનાથી અમેરિકન સ્થાનિક વર્કર્સ (US Workers) માટે પણ અસમાન અને અયોગ્ય સ્પર્ધા (Unfair Competition) ઊભી થાય છે. એજન્સીએ સ્પષ્ટ કર્યું કે વિઝા નિયમોના દુરુપયોગને રોકવા અને રોજગાર-આધારિત ઇમિગ્રેશન સિસ્ટમમાં પારદર્શિતા જાળવી રાખવા માટે આ કડક પગલું ભરવામાં આવ્યું છે. જોકે, USCIS એ કંપનીનું નામ કે અસરગ્રસ્ત કર્મચારીઓની ચોક્કસ સંખ્યા જાહેર કરી નથી.
વેતન સ્તર (Wage Level) નો ખેલ શું છે?
અમેરિકામાં H-1B વિઝા માટે યુએસ ડિપાર્ટમેન્ટ ઓફ લેબર દ્વારા ૪ વેજ લેવલ (૧ થી ૪) નક્કી કરવામાં આવ્યા છે. લેવલ-૧ એન્ટ્રી-લેવલના કર્મચારીઓ માટે હોય છે, જેમાં સૌથી ઓછો પગાર ચૂકવવાનો રહે છે, જ્યારે લેવલ-૪ અનુભવી અને સિનિયર એક્સપર્ટ્સ માટે હોય છે. ઘણી કન્સલ્ટિંગ કંપનીઓ ખર્ચ ઘટાડવા માટે સિનિયર આઇટી એન્જિનિયર્સ પાસે લેવલ-૪ નું કામ કરાવે છે પરંતુ વિઝા પેપર્સમાં તેમને લેવલ-૧ કે લેવલ-૨ પર દર્શાવે છે. હવે USCIS આ બાબતે અત્યંત સખત વલણ અપનાવી રહ્યું છે.
ભારતીય IT પ્રોફેશનલ્સ પર શું અસર પડશે?
આ કાર્યવાહીની સીધી અસર ભારતીય ટેક પ્રોફેશનલ્સ પર પડી શકે છે. USCIS ના તાજેતરના આંકડા મુજબ, નાણાકીય વર્ષ ૨૦૨૪ માં મંજૂર થયેલા કુલ H-1B વિઝામાંથી ૭૧ ટકા એટલે કે ૨,૮૩,૩૯૭ વિઝા ધારકો ભારતીય નાગરિકો હતા.
અમેરિકામાં ભારતીય આઇટી એન્જિનિયરોનો એક મોટો વર્ગ કન્સલ્ટિંગ અને આઉટસોર્સિંગ કંપનીઓ મારફતે કામ કરે છે. ટ્રમ્પ પ્રશાસન અને ઇમિગ્રેશન સત્તાવાળાઓ દ્વારા હવે જોબ રોલ અને વેતન સ્તરના મેચિંગની ઝીણવટભરી તપાસ (Strict Scrutiny) કરવામાં આવી રહી છે. જો કોઈ કંપનીના કાગળોમાં વિસંગતતા જણાશે, તો વિઝા રદ થવાનું જોખમ વધી જશે.
H-1B યુઝર્સ અને અરજદારો માટે સલાહ
આઇટી ક્ષેત્રના નિષ્ણાતો અનુસાર, જે ભારતીય એન્જિનિયરો થર્ડ-પાર્ટી કન્સલ્ટિંગ ફેસિિલિટીઝ દ્વારા કામ કરી રહ્યા છે તેમણે પોતાના જોબ ઓફર લેટર, લેબર કન્ડીશન એપ્લિકેશન (LCA) અને વાસ્તવિક વેતનની ચકાસણી કરી લેવી જોઈએ. કંપનીઓ દ્વારા કરવામાં આવતી આવી નાની ભૂલો કે ગેરરીતિઓ ગ્રાઉન્ડ લેવલ પર કામ કરતા ટેક પ્રોફેશનલ્સના સ્ટેટસ પર વિપરીત અસર પાડી શકે છે.
