Union Bank of India : જાહેર ક્ષેત્રની યુનિયન બેન્ક ઓફ ઈન્ડિયાએ શનિવારે જણાવ્યું હતું કે માર્ચ ક્વાર્ટરમાં તેનો કોન્સોલિડેટેડ ચોખ્ખો નફો 18.36 ટકા વધીને રૂ. 3,328 કરોડ થયો છે. બેંકે કહ્યું કે બેડ લોન માટે ઓછી જોગવાઈને કારણે તેનો નફો વધ્યો છે. યુનિયન બેંક ઓફ ઈન્ડિયાનો નાણાકીય વર્ષ 2023-24 માટે સંચિત ચોખ્ખો નફો રૂ. 13,797 કરોડ હતો, જે અગાઉના નાણાકીય વર્ષમાં રૂ. 8,512 કરોડ હતો.
સમીક્ષા હેઠળના ત્રિમાસિક ગાળામાં બેન્કનો સ્ટેન્ડઅલોન ચોખ્ખો નફો વધીને રૂ. 3,311 કરોડ થયો હતો જે ગયા વર્ષના સમાન ગાળામાં રૂ. 2,782 કરોડ હતો. મુખ્ય ચોખ્ખી વ્યાજ આવક 14.38 ટકા વધીને રૂ. 9,437 કરોડ થઈ છે, જે એડવાન્સિસમાં 11.7 ટકાની વૃદ્ધિ અને ચોખ્ખી વ્યાજ માર્જિન એક વર્ષ અગાઉના 2.97 ટકાથી વધીને 3.10 ટકા થઈ છે.
બેંકના મેનેજિંગ ડિરેક્ટર અને ચીફ એક્ઝિક્યુટિવ ઓફિસર એ મણિમેખલાઈએ જણાવ્યું હતું કે નાણાકીય વર્ષ 2024-25 દરમિયાન ધિરાણ વૃદ્ધિ 11-13 ટકા અને ડિપોઝિટ વૃદ્ધિ 9-11 ટકા રહેવાની અપેક્ષા છે. બેડ લોન માટેની કુલ જોગવાઈ વાર્ષિક ધોરણે રૂ. 4,041 કરોડથી ઘટીને રૂ. 3,222 કરોડ થઈ છે.
