UAE Social Media: બાળકો અને સોશિયલ મીડિયા: UAE ના નવા કાયદાઓથી કંપનીઓની મુશ્કેલી વધશે?
સંયુક્ત આરબ અમીરાત (UAE) એ ડિજિટલ સુરક્ષા અને બાળકોના માનસિક સ્વાસ્થ્યને ધ્યાનમાં રાખીને એક ક્રાંતિકારી નિર્ણય લીધો છે. હવે UAE માં 15 વર્ષથી ઓછી વયના બાળકો સોશિયલ મીડિયાનો ઉપયોગ કરી શકશે નહીં. આ સાથે UAE આવું કડક પગલું લેનાર પ્રથમ આરબ દેશ બની ગયો છે. આ નિર્ણય એવા સમયે લેવામાં આવ્યો છે જ્યારે સમગ્ર વિશ્વમાં બાળકો પર સોશિયલ મીડિયાની નકારાત્મક અસરોને લઈને ચિંતા વધી રહી છે.
નવા નિયમોની મુખ્ય જોગવાઈઓ
ગુરુવારે મંજૂર કરાયેલા આ નવા પ્રસ્તાવ મુજબ, 15 વર્ષથી ઓછી વયના બાળકો માટે સોશિયલ મીડિયા એકાઉન્ટ બનાવવું, તેને ચલાવવું કે તેનો ઉપયોગ કરવો ગેરકાયદેસર રહેશે. સરકારી મીડિયા ઓફિસના જણાવ્યા અનુસાર, આ વય મર્યાદા હેઠળના બાળકો સોશિયલ મીડિયા પર કોઈ પણ પ્રકારનું કન્ટેન્ટ પોસ્ટ કરી શકશે નહીં, કોઈ પોસ્ટ પર કોમેન્ટ કરી શકશે નહીં, કંઈ પણ શેર કરી શકશે નહીં કે પબ્લિક ગ્રુપનો ભાગ બની શકશે નહીં.
15 અને 16 વર્ષના કિશોરો માટે પણ નિયમો કડક બનાવવામાં આવ્યા છે. તેમને સોશિયલ મીડિયા વાપરવાની મંજૂરી તો હશે, પરંતુ તેમની સુરક્ષા માટે કડક નિયમો લાગુ કરવામાં આવશે. આ નિયમોમાં વય-આધારિત કન્ટેન્ટ ફિલ્ટરિંગ, અજાણ્યા લોકો સાથેની વાતચીત પર પ્રતિબંધ, સ્ક્રીન ટાઈમ કંટ્રોલ ટૂલ્સ અને માતા-પિતાની સીધી દેખરેખ (Parental Control) ફરજિયાત હશે.
સોશિયલ મીડિયા કંપનીઓ માટે કડક સૂચનાઓ
UAE સરકારના નવા નિયમો સોશિયલ મીડિયા પ્લેટફોર્મ ચલાવતી તમામ કંપનીઓ માટે છે. કંપનીઓએ યુઝર્સની ઉંમર તપાસવા માટે અત્યંત મજબૂત સિસ્ટમ લાવવી પડશે. માત્ર યુઝર દ્વારા આપવામાં આવેલી માહિતી પર વિશ્વાસ કરવાને બદલે, કંપનીઓએ ડિજિટલ આઈડી વેરિફિકેશન અને આર્ટિફિશિયલ ઈન્ટેલિજન્સ (AI) આધારિત ટેકનોલોજીનો ઉપયોગ કરવો પડશે.
સરકારે સ્પષ્ટ કર્યું છે કે સોશિયલ મીડિયા કંપનીઓએ 15 વર્ષથી ઓછી વયના બાળકોના તમામ એકાઉન્ટ્સ બંધ કરવા પડશે. આ ઉપરાંત, તેઓએ એ પણ સુનિશ્ચિત કરવું પડશે કે કોઈ પણ યુઝર એજ વેરિફિકેશન સિસ્ટમ સાથે છેડછાડ ન કરી શકે. બાળકોના પર્સનલ ડેટાનો ઉપયોગ ટાર્ગેટેડ જાહેરાતો માટે અથવા તેમની ઓનલાઈન આદતો પ્રોફાઇલ કરવા માટે કરી શકાશે નહીં. આ નિયમોને સંપૂર્ણપણે લાગુ કરવા માટે સોશિયલ મીડિયા કંપનીઓને 12 મહિનાનો સમય આપવામાં આવ્યો છે.
આ પગલા પાછળનો હેતુ
UAE સરકારનું માનવું છે કે આ નવું માળખું બાળકોની ઓનલાઈન સુરક્ષાને મજબૂત બનાવવાની દિશામાં એક મોટું પગલું છે. આનો મુખ્ય ઉદ્દેશ્ય બાળકોને હાનિકારક કન્ટેન્ટથી બચાવવા, ઓનલાઈન સુરક્ષિત વાતાવરણ પૂરું પાડવું, સોશિયલ મીડિયાના અતિશય વપરાશને રોકવો અને ડેટાની ગોપનીયતા જાળવવાનો છે.
