Donald Trump: મ્પ-નેતન્યાહૂ આમને-સામને: ઈરાન સાથેની સમજૂતી માટે અમેરિકાનું આક્રમક દબાણ
ઈરાન અને ઈઝરાયેલ વચ્ચે વધતા સંઘર્ષની વચ્ચે અમેરિકી રાષ્ટ્રપતિ ડોનાલ્ડ ટ્રમ્પ અને ઈઝરાયેલના વડાપ્રધાન બેન્જામિન નેતન્યાહૂ હવે સામસામે આવી ગયા છે. ઈરાન દ્વારા ઈઝરાયેલ પર કરવામાં આવેલા તાજેતરના બેલેસ્ટિક મિસાઈલ હુમલા બાદ સ્થિતિ અત્યંત ગંભીર બની છે, પરંતુ અમેરિકા આ દરમિયાન પોતાની શાંતિ સમજૂતીને લઈને મક્કમ છે.
ટ્રમ્પનો કડક આદેશ: ‘નિર્ણય મારો હશે’
‘ફાઈનાન્શિયલ ટાઈમ્સ’ને આપેલા એક ઈન્ટરવ્યુમાં રાષ્ટ્રપતિ ટ્રમ્પે અત્યંત આક્રમક વલણ અપનાવતા કહ્યું કે, મધ્ય-પૂર્વમાં યુદ્ધ સમાપ્ત કરવા માટે વોશિંગ્ટન જે કોઈ પણ સમજૂતી કરે, તેને સ્વીકારવા સિવાય નેતન્યાહૂ પાસે બીજો કોઈ વિકલ્પ નથી. ટ્રમ્પે સ્પષ્ટ કર્યું કે, “હું જ બધું નક્કી કરું છું. નેતન્યાહૂ પાસે કોઈ વિકલ્પ નથી.” ટ્રમ્પનું માનવું છે કે તેહરાન સામેની આક્રમકતામાં અંતિમ નિર્ણય માત્ર અમેરિકાનો જ રહેશે.
નેતન્યાહૂ પર દબાણ
‘એક્સિઓસ’ના અહેવાલ મુજબ, ટ્રમ્પે નેતન્યાહૂ સાથે ટેલિફોનિક વાતચીતમાં તેમને હાલ પૂરતું રોકાઈ જવા આદેશ આપ્યો છે. ટ્રમ્પનું કહેવું છે કે, “આપણે સમજૂતીના ખૂબ નજીક છીએ, તેથી કોઈ પણ લશ્કરી કાર્યવાહી ન કરો.” જોકે, શરૂઆતમાં ઈઝરાયેલી નેતન્યાહૂએ આનો વિરોધ કર્યો હતો, પરંતુ રિપોર્ટ અનુસાર, તેઓ ટ્રમ્પના દબાણ હેઠળ હાલ પીછેહઠ કરવા અને રાહ જોવા માટે સંમત થયા છે.
શું મિસાઈલ હુમલાની અસર થશે?
ટ્રમ્પનું માનવું છે કે ઈરાન દ્વારા કરવામાં આવેલા આ મિસાઈલ હુમલાઓ અમેરિકા-ઈરાન વચ્ચેની શાંતિ મંત્રણા પર કોઈ અસર કરશે નહીં. ટ્રમ્પે આ ઘટનાઓને ૩,૦૦૦ વર્ષ જૂના સંઘર્ષોનો એક ભાગ ગણાવીને તેમને નજીવી ગણાવી છે. તેમણે કહ્યું કે, “આ હુમલાઓથી આપણી સમજૂતીની પ્રક્રિયા બદલાશે નહીં.”
ઈઝરાયેલ અને ઈરાન વચ્ચેનો આ સંઘર્ષ હવે બે શક્તિશાળી નેતાઓની કૂટનીતિના રણમેદાનમાં ફેરવાઈ ગયો છે. એક તરફ નેતન્યાહૂ છે જેઓ પોતાની સુરક્ષા અને સાર્વભૌમત્વ માટે આક્રમક જવાબ આપવા ઈચ્છે છે, તો બીજી તરફ ટ્રમ્પ છે જેઓ કોઈપણ કિંમતે એક મોટી વૈશ્વિક સમજૂતી કરવા માંગે છે. શું નેતન્યાહૂ અમેરિકી દબાણ સામે ઝૂકી જશે? કે પછી ઈઝરાયેલ પોતાની વ્યૂહરચના બદલશે? તે આવનારા દિવસોમાં સ્પષ્ટ થશે. સમગ્ર વિશ્વ આ શાંતિ પ્રક્રિયાના પરિણામોની રાહ જોઈ રહ્યું છે.
