તમિળનાડુ સરકારનો મોટો નિર્ણય: ધારાસભ્યોને સુવિધા સાથે સ્વાસ્થ્ય વીમા કવચ વધીને ₹25 લાખ કરાયું
તમિળનાડુના મુખ્યમંત્રી સી. જોસેફ વિજયે બુધવારે વિધાનસભામાં રાજ્યના ધારાસભ્યો અને સામાન્ય જનતા માટે કેટલીક મહત્વપૂર્ણ અને મોટી યોજનાઓની જાહેરાત કરી છે. વિધાનસભાના સત્ર દરમિયાન નિયમ 110 હેઠળ આ નિર્ણયોની જાહેરાત કરતી વખતે મુખ્યમંત્રીએ જણાવ્યું હતું કે, જનપ્રતિનિધિઓ પોતાના વિસ્તારની જનતા સાથે વધુ સારી રીતે જોડાઈ શકે અને સરકારી યોજનાઓનું યોગ્ય નિરીક્ષણ કરી શકે તે માટે તેમને વિશેષ સુવિધાઓ આપવામાં આવશે. આ સાથે જ સામાન્ય નાગરિકોની સ્વાસ્થ્ય સુરક્ષાને ધ્યાન માં રાખીને આરોગ્ય વીમા યોજનાની મર્યાદામાં પણ અભૂતપૂર્વ વધારો કરવામાં આવ્યો છે.
ધારાસભ્યો માટે સરકારી વાહન અને માસિક ભથ્થાની જોગવાઈ
મુખ્યમંત્રી વિજયે જાહેરાત કરી હતી કે રાજ્યના તમામ ધારાસભ્યોને તેમના વિધાનસભ ક્ષેત્રમાં ભ્રમણ કરવા માટે એક સરકારી વાહન ઉપલબ્ધ કરાવવામાં આવશે. આ વાહનના ઈંધણ અને જાળવણીના ખર્ચ માટે દર મહિને ₹75,000નું વાહન ભથ્થું પણ આપવામાં આવશે. આ સુવિધાનો મુખ્ય ઉદ્દેશ્ય એ છે કે ધારાસભ્યો કોઈપણ સંકોચ કે નિર્ભરતા વિના પોતાના વિસ્તારના છેવાડાના વિસ્તારો સુધી પહોંચી શકે, લોકોની ફરિયાદો સાંભળી શકે અને ચાલી રહેલા સરકારી પ્રોજેક્ટ્સની પ્રગતિ પર સીધી નજર રાખી શકે.
ઓફિસ કામગીરી માટે વધારાનું મદદનીશ ભથ્થું
ધારાસભ્યોની દૈનિક કામગીરી અને કાર્યાલયના સંચાલનને સરળ બનાવવા માટે સરકાર દ્વારા વધારાની નાણાકીય સહાય પૂરી પાડવામાં આવશે. જે મુજબ, દરેક ધારાસભ્યને તેમની ઓફિસના કામકાજ માટે દર મહિને ₹25,000નું મદદનીશ (ઓફિસ) ભથ્થું આપવામાં આવશે. આ રીતે, વાહન ભથ્થું (₹75,000) અને મદદનીશ ભથ્થું (₹25,000) મળીને ધારાસભ્યોને દર મહિને કુલ ₹1 લાખની નાણાકીય સહાય સુવિધાઓ માટે મળશે.
તમામ પક્ષના ધારાસભ્યોને મળશે આ સુવિધા
વિધાનસભામાં ચર્ચા દરમિયાન પીએમકે (PMK) ના ધારાસભ્ય એ. ગણેશકુમારે આ સુવિધા અંગે સ્પષ્ટતા માંગતા પૂછ્યું હતું કે શું આ યોજના માત્ર શાસક પક્ષ માટે છે કે તમામ માટે? આ પ્રશ્નનો જવાબ આપતાં વિધાનસભા અધ્યક્ષ જે.સી.ડી. પ્રભાકરે સ્પષ્ટ કર્યું હતું કે આ સરકારી વાહન અને ભથ્થાની સુવિધા પક્ષપાત વિના વિધાનસભાના તમામ સભ્યો (ધારાસભ્યો) માટે સમાન રીતે લાગુ થશે.
મુખ્યમંત્રી સ્વાસ્થ્ય વીમા કવચ ₹25 લાખ કરાયું
આ બેઠકમાં ધારાસભ્યો ઉપરાંત સામાન્ય જનતા માટે પણ એક મોટા રાહતના સમાચાર આપવામાં આવ્યા હતા. મુખ્યમંત્રીએ ‘મુખ્યમંત્રી સ્વાસ્થ્ય વીમા યોજના’ હેઠળ મળતા વાર્ષિક કવરેજની સીમા ₹5 લાખથી વધારીને સીધી ₹25 લાખ કરવાની જાહેરાત કરી છે. આ નિર્ણયથી રાજ્યના ગરીબ અને મધ્યમ વર્ગના પરિવારોને ગંભીર બીમારીઓના ઇલાજ માટે મોટી આર્થિક રાહત મળશે અને તેઓ ઉત્તમ સ્વાસ્થ્ય સેવાઓ મેળવી શકશે.
