Crypto: ટ્રમ્પની અનિશ્ચિત વેપાર નીતિથી ક્રિપ્ટો કરન્સીમાં મંદી

બિટકોઈનના ભાવમાં મંદીને કારણે બિટકોઈન સ્પોટ ઈટીએફસમાંથી સતત આઉટફલો જોવા મળી રહ્યો છે. વર્તમાન સપ્તાહના મંગળવારે એક જ દિવસમાં એક અબજ ડોલરનો આઉટફલો જોવા મળ્યો હતો. જે સ્પોટ બિટકોઈન ઈટીએફ લોન્ચ થયા બાદ સૌથી મોટો આઉટફલો હતો.

બિટકોઈન રિઝર્વ ઊભા કરવાની અપાયેલી ખાતરીના પાલન કરવા તરફ અમેરિકાના પ્રમુખ ડોનાલ્ડ ટ્રમ્પના વહીવટીતંત્ર તરફથી કોઈ પગલાં લેવાઈ રહ્યા હોવાનું જણાતું નથી જેને કારણે રોકાણકારો નિરાશ થયા છે આ ઉપરાંત લિક્વિડિટીની તાણે પણ બજાર પર અસર કરી હોવાનું સુત્રો જણાવી રહ્યા છે.

બિટકોઈન તથા એથરમ માટે સંસ્થાકીય માગ નબળી પડી છે. કેનેડા તથા મેક્સિકો પર ટેરિફ લાગુ કરવાની ચોથી માર્ચની તારીખ નજીક આવી રહી છે તેમ વધુ ઘટાડા માટે બજાર તૈયાર થઈ રહ્યું છે.  જો કે ટેરિફ લાગુ કરવાની તારીખને લઈને વિરાધાભાષી નિવેદનો આવી રહ્યા હોવાથી બજારમાં અનિશ્ચિત સ્થિતિ જોવા મળી રહી છે.

ડોનાલ્ડ ટ્રમ્પની અનિશ્ચિત વેપાર નીતિથી જાન્યુઆરીની ૧,૦૯,૦૦૦ ડોલરની ટોચેથી બિટકોઈન વીસ ટકા જેટલો ગબડી ગયો છે.