IIT ખડગપુરમાં PM મોદીનું સંબોધન: 50 વર્ષ પહેલાં ભારતે સેમિકન્ડક્ટર કંપનીને બતાવ્યો હતો રસ્તો!
વડાપ્રધાન નરેન્દ્ર મોદી શનિવારે પશ્ચિમ બંગાળના IIT ખડગપુરના પ્લેટિનમ જ્યુબિલી સમારોહમાં સામેલ થયા હતા. દેશની પ્રથમ ઇન્ડિયન ઇન્સ્ટિટ્યૂટ ઓફ ટેક્નોલોજી (IIT)એ પોતાની સ્થાપનાનાં 75 વર્ષ પૂર્ણ કર્યાં છે. આ પ્રસંગે વડાપ્રધાને સંસ્થાની ઐતિહાસિક સફર, ભારતની વૈજ્ઞાનિક પ્રગતિ અને યુવા પેઢીની ભૂમિકા અંગે વાત કરી હતી. તેમણે કહ્યું કે બંગાળની ધરતી પર નવા વિચારોને હંમેશાં પ્રોત્સાહન મળ્યું છે. IIT ખડગપુરના આ કાર્યક્રમમાં ભારતનો ભૂતકાળ, વર્તમાન અને ભવિષ્ય એકસાથે જોવા મળી રહ્યાં છે. અહીં ઉપસ્થિત પ્રતિભાશાળી અને મહત્વાકાંક્ષી યુવાનો દેશની આવતીકાલની તાકાત છે. વર્ષ 1951માં સ્થપાયેલી આ સંસ્થાએ દેશના વિકાસમાં મહત્ત્વપૂર્ણ યોગદાન આપ્યું છે.

પોતાની ક્ષમતાને ઓળખવા માટે વિચારની મર્યાદા તોડવી જરૂરી
વડાપ્રધાન મોદીએ પોતાના સંબોધનમાં કહ્યું હતું કે કોઈપણ દેશ પોતાની વાસ્તવિક ક્ષમતાને ત્યારે જ ઓળખી શકે છે, જ્યારે તે વિચારવાની જૂની મર્યાદાઓને તોડીને આગળ વધે. છેલ્લા કેટલાક વર્ષોમાં ભારતે આ વાત સાબિત કરી બતાવી છે. દુનિયાને ભારતનો સંદેશ છે કે મર્યાદાઓ તોડો અને નવી શક્યતાઓને સાકાર કરો. તેમણે IIT ખડગપુરની 75 વર્ષની સફરને યાદ કરતાં કહ્યું કે આ સમયગાળામાં ભારતે બળદગાડાથી બુલેટ ટ્રેન અને ટપાલથી સોશિયલ મીડિયા સુધીની લાંબી પ્રગતિ કરી છે. દેશના પ્રથમ IIT તરીકે આ સંસ્થાએ ટેક્નોલોજી, સંશોધન અને ઔદ્યોગિક વિકાસમાં મહત્ત્વપૂર્ણ ભૂમિકા ભજવી છે.
ગરીબી ક્યારેય દૂર નહીં થાય એવી માનસિકતા બદલાઈ
વડાપ્રધાને દેશની ગરીબી અને સરકારની યોજનાઓનો ઉલ્લેખ કરતાં કહ્યું કે એક સમય એવો હતો જ્યારે ગરીબીને કાયમી સમસ્યા માનવામાં આવતી હતી. દાયકાઓ સુધી ગરીબી હટાવવાના નારા આપવામાં આવ્યા, પરંતુ નીતિઓ અને યોજનાઓનો અમલ કાગળો સુધી જ સીમિત રહેતો હતો. તેમણે કહ્યું કે જ્યારે તેમની સરકારે લાલ કિલ્લા પરથી શૌચાલય બનાવવાની જાહેરાત કરી ત્યારે સંસદમાં કેટલાક લોકોએ તેની મજાક ઉડાવી હતી. પરંતુ તેઓ એ સમજી શક્યા નહોતા કે મહિલાઓ અને ગરીબ પરિવારો માટે શૌચાલયની સુવિધા કેટલી મહત્ત્વપૂર્ણ છે. મોદીએ કહ્યું કે છેલ્લા 12 વર્ષમાં સરકારનો પ્રયાસ લોકોને માત્ર સુવિધાઓ આપવાનો નહીં, પરંતુ તેમને આત્મનિર્ભર અને સશક્ત બનાવવાનો રહ્યો છે.
IITના વિદ્યાર્થીઓએ ભારતને આત્મનિર્ભર બનાવવામાં યોગદાન આપ્યું
મોદીએ કહ્યું કે જ્યારે IIT ખડગપુરની સ્થાપના થઈ ત્યારે ભારતને આઝાદી મળ્યાને થોડાં જ વર્ષો થયાં હતાં. દેશમાં પ્રથમ લોકસભાની ચૂંટણી પણ યોજાઈ નહોતી. તે સમયે ઉદ્યોગો અને માળખાકીય સુવિધાઓના વિકાસ માટે કુશળ એન્જિનિયરોની જરૂરિયાત હતી. સંસ્થાએ આ જરૂરિયાત પૂરી કરવામાં મોટી ભૂમિકા ભજવી. સમય જતાં અહીંના વિદ્યાર્થીઓ અને ભૂતપૂર્વ વિદ્યાર્થીઓએ ભારતના અંતરિક્ષ તથા પરમાણુ ઊર્જા કાર્યક્રમોને આગળ વધારવામાં યોગદાન આપ્યું. વડાપ્રધાને વિશ્વાસ વ્યક્ત કર્યો કે વિકસિત ભારતના નિર્માણમાં પણ IIT ખડગપુર મહત્ત્વપૂર્ણ ભૂમિકા ભજવશે. તેમણે કહ્યું કે દેશની ક્ષમતા તેની સામે રહેલા પડકારોનો સામનો કરવાની હિંમત પરથી નક્કી થાય છે.

50 વર્ષ પહેલાં સેમિકન્ડક્ટર કંપનીને ભારતે પાછી મોકલી હતી
વડાપ્રધાન મોદીએ સેમિકન્ડક્ટર ક્ષેત્રનો ઉલ્લેખ કરતાં એક જૂની ઘટનાની વાત કરી હતી. તેમણે કહ્યું કે લગભગ 50 વર્ષ પહેલાં એક કંપની ભારતમાં સેમિકન્ડક્ટર ચિપ બનાવવાનો પ્રસ્તાવ લઈને આવી હતી, પરંતુ તે સમયે તેને મંજૂરી આપવામાં આવી નહોતી અને પાછી મોકલી દેવામાં આવી હતી. મોદીએ કહ્યું કે જ્યારે તેમની સરકારે સેમિકન્ડક્ટર મિશનની શરૂઆત કરવાની વાત કરી ત્યારે કેટલાક લોકોએ તેને મોડું પગલું ગણાવ્યું હતું. જોકે સરકારે આ દિશામાં કામ ચાલુ રાખ્યું અને આજે ભારતે ચિપની નિકાસ પણ શરૂ કરી દીધી છે. તેમણે યુવાનોને રાષ્ટ્રપ્રથમની ભાવના સાથે કામ કરવા અપીલ કરી હતી, જેથી દેશની સાથે તેમની પોતાની પ્રગતિની નવી તકો પણ ઊભી થાય.
50 કરોડ લોકો ગરીબીમાંથી બહાર આવ્યા હોવાનો દાવો
સમારોહ દરમિયાન વડાપ્રધાન મોદીએ વિશ્વ બેંકના અહેવાલનો ઉલ્લેખ કરીને દાવો કર્યો હતો કે છેલ્લા 12થી 13 વર્ષ દરમિયાન ભારતમાં આશરે 50 કરોડ લોકો ગરીબીમાંથી બહાર આવ્યા છે. તેમણે કહ્યું કે આ કોઈ સામાન્ય સિદ્ધિ નથી, પરંતુ બદલાતી વિચારસરણી અને નવી શક્યતાઓ શોધવાના પ્રયાસોનું પરિણામ છે. વડાપ્રધાને IIT ખડગપુરના વિદ્યાર્થીઓ અને ભૂતપૂર્વ વિદ્યાર્થીઓને એક વિશેષ સંકલ્પ લેવા અપીલ કરી હતી. તેમણે કહ્યું કે જ્યારે આ સંસ્થા પોતાની સ્થાપનાનાં 100 વર્ષ પૂર્ણ કરે ત્યારે ભારત વિકસિત રાષ્ટ્ર બની ચૂક્યું હોવું જોઈએ. આ લક્ષ્ય હાંસલ કરવા માટે યુવાનોને સંશોધન, નવી ટેક્નોલોજી અને આત્મનિર્ભરતાના ક્ષેત્રોમાં આગળ આવવું પડશે.
