New SEBI chief
સરકારે નાણા અને મહેસૂલ સચિવ તુહિન કાંત પાંડેને બજાર નિયમનકાર સેબીના અધ્યક્ષ તરીકે નિયુક્ત કર્યા છે. તેઓ માધવી પુરી બુચનું સ્થાન લેશે, જેમનો કાર્યકાળ આ મહિને પૂરો થઈ રહ્યો છે. કાર્મિક, જાહેર ફરિયાદ અને પેન્શન મંત્રાલય દ્વારા જારી કરાયેલા એક પ્રકાશનમાં, કેબિનેટની નિમણૂક સમિતિએ 1987 બેચના ઓડિશા કેડરના IAS અધિકારી પાંડેને સિક્યોરિટીઝ એન્ડ એક્સચેન્જ બોર્ડ ઓફ ઈન્ડિયા (SEBI) ના અધ્યક્ષ તરીકે નિયુક્ત કર્યા છે.
તુહિન કાંત પાંડે મોદી સરકારમાં ઘણા મહત્વના પદો પર રહી ચૂક્યા છે. તુહિન પાંડે અગાઉ DIPAM (ડિપાર્ટમેન્ટ ઓફ ઇન્વેસ્ટમેન્ટ એન્ડ પબ્લિક એસેટ મેનેજમેન્ટ)ના સેક્રેટરી હતા, પરંતુ અલી રઝા રિઝવીની નિવૃત્તિ બાદ તેમને DPE (ડિપાર્ટમેન્ટ ઓફ પબ્લિક એન્ટરપ્રાઇઝિસ)ની નોકરી આપવામાં આવી હતી. ત્યારબાદ તેમને નાણા મંત્રાલયમાં નાણાં સચિવ તરીકે નિયુક્ત કરવામાં આવ્યા.
સેબી ચીફનું પદ ખૂબ જ મહત્વપૂર્ણ અને જવાબદાર કામ છે. કારણ કે હવે તેમને શેરબજાર પર દેખરેખ રાખવાની રહેશે. રોકાણકારોના હિતોનું રક્ષણ કરવાની જવાબદારી પણ તેમની રહેશે. તુહિન પાંડેને એવા સમયે સેબીના ચીફ બનાવવામાં આવ્યા છે જ્યારે માર્કેટમાં ભારે ઘટાડો છે અને રોકાણકારોના લાખો કરોડ રૂપિયાનું નુકસાન થયું છે. આવી સ્થિતિમાં તુહિન પાંડેની ભૂમિકા ખૂબ જ મહત્વપૂર્ણ બની જાય છે. આ કામ માટે તેમના પગાર વિશે વાત કરીએ તો, તુહિન પાંડેને સેબી ચીફ માટે ભારત સરકારના સેક્રેટરી જેટલો પગાર મળશે. આ પગાર 5,62,500 રૂપિયા પ્રતિ માસ છે ઉલ્લેખનીય છે કે ઘર અને કાર વગેરે જેવા ભથ્થા અલગથી ચુકવવામાં આવશે.
પાંડેએ પંજાબ યુનિવર્સિટીમાંથી અર્થશાસ્ત્ર અને અંગ્રેજીમાં માસ્ટર ડિગ્રી મેળવી છે. જે બાદ તેણે વિદેશમાં બર્મિંગહામ યુનિવર્સિટીમાંથી MBA કર્યું. જ્યારે બજાર સતત ઘટતું રહે છે, ત્યારે સેબીના વડા તરીકે તેમની નિમણૂકથી બજારમાં આજે અને ભવિષ્યમાં ઘણા ફેરફારો જોવા મળી શકે છે.
તેમની સામે સૌથી મોટો પડકાર બજારની સ્થિરતા જાળવવાનો, રોકાણકારોનો વિશ્વાસ વધારવો અને નિયમોનું પાલન સુનિશ્ચિત કરવાનો રહેશે.
