Mamata Banerjee: ભાજપની વોશિંગ મશીનમાં જવા વાળા જાય”: TMCમાં ભંગાણ બાદ મમતા બેનર્જીનો વળતો પ્રહાર
આજના બદલાતા રાજકીય પ્રવાહો વચ્ચે પશ્ચિમ બંગાળના રાજકારણમાં એક નવો વળાંક આવ્યો છે. તૃણમૂલ કોંગ્રેસ (TMC) ના વરિષ્ઠ નેતા અને કમારહાટીના ધારાસભ્ય મદન મિત્રાએ બુધવારે (૧૫ જુલાઈ) ના રોજ મમતા બેનર્જીની આગેવાની હેઠળના જૂથના પોતાના તમામ પદો પરથી રાજીનામું આપી દીધું છે. આ રાજીનામા બાદ તેઓ વિપક્ષના નેતા ઋતબ્રત બેનર્જીની આગેવાની હેઠળના બીજા બાગી જૂથમાં સામેલ થઈ ગયા છે. આ ઘટનાક્રમે બંગાળના રાજકારણમાં ભારે ગરમાવો લાવી દીધો છે.
બાગી નેતાઓને ‘ગદ્દાર’ ગણાવી મમતા બેનર્જીએ માગી માફી
આ પક્ષપલટા અને ભંગાણ બાદ પશ્ચિમ બંગાળના પૂર્વ મુખ્યમંત્રી મમતા બેનર્જીએ આકરા પ્રહારો કર્યા છે. તેમણે પક્ષ છોડીને જનારા બાગી નેતાઓને ‘ગદ્દાર’ ગણાવ્યા છે અને આવા નેતાઓને પક્ષમાં સ્થાન આપવા બદલ જનતા સમક્ષ માફી માગી છે. મમતા બેનર્જીએ સ્પષ્ટ શબ્દોમાં જણાવ્યું કે, “જે લોકો તૃણમૂલ કોંગ્રેસ છોડીને જવા માંગે છે, તેઓ ખુશીથી જઈ શકે છે. મેં મારા રાજકીય અસ્તિત્વને બચાવવા માટે ક્યારેય મારા ‘વિવેક’ કે સિદ્ધાંતોનો સોદો કર્યો નથી.”
“ભાજપ ઈચ્છે છે કે મને હાર્ટ એટેક આવે, પણ…” – મમતા બેનર્જી
વિરોધીઓ અને ભાજપ પર સીધો પ્રહાર કરતા મમતા બેનર્જીએ જણાવ્યું હતું કે, “ભાજપ એવું ઈચ્છે છે કે તણાવના કારણે મને હાર્ટ એટેક આવી જાય, પરંતુ હું તેમને સ્પષ્ટ કહી દેવા માંગુ છું કે જ્યાં સુધી ભાજપનો રાજકીય અંત નહીં આવે ત્યાં સુધી હું જીવતી રહીશ અને લડતી રહીશ.” આ સાથે જ તેમણે પક્ષમાં ચાલી રહેલા આંતરિક વિખવાદ વચ્ચે પોતાના ભત્રીજા અને પક્ષના સેનાપતિ અભિષેક બેનર્જીનો જોરદાર બચાવ કર્યો હતો. તેમણે ઉમેર્યું કે, વિરોધીઓ દ્વારા માત્ર પક્ષ પર હુમલો કરવાના બહાના તરીકે અભિષેક બેનર્જીને નિશાન બનાવવામાં આવી રહ્યા છે.
એજન્સીઓના ડરથી નેતાઓ પક્ષ બદલી રહ્યા હોવાનો દાવો
મમતા બેનર્જીએ કેન્દ્ર સરકાર અને ભાજપ પર કેન્દ્રીય તપાસ એજન્સીઓ તેમજ પોલીસના દુરુપયોગનો ગંભીર આરોપ લગાવ્યો છે. તેમણે દાવો કર્યો કે ભાજપ તપાસ એજન્સીઓનો ડર બતાવીને નેતાઓને બળજબરીપૂર્વક પક્ષ બદલવા માટે મજબૂર કરી રહી છે.
તેમણે ઉમેર્યું કે, “લોકસભા અને રાજ્યસભામાં આજે પણ અમારા ૧૮ સાંસદો અડીખમ ઊભા છે. પરંતુ જે નેતાઓ અને સાંસદો વિપક્ષની ‘સેટિંગ કંપની’માં સામેલ થયા છે, તેઓ માત્ર અને માત્ર પોલીસ અને તપાસ એજન્સીઓના ડરથી ગયા છે. જે નેતાઓ સમજૂતી કરવા નથી માગતા, તેમને સતત રાજકીય સતામણીનો સામનો કરવો પડી રહ્યો છે.”
ભાજપની ‘વોશિંગ મશીન’ બ્રાન્ડ પોલિટિક્સ પર પ્રહાર
ભાજપનું નામ લીધા વિના મમતા બેનર્જીએ આકરા પ્રહારો કરતા કહ્યું કે, તૃણમૂલ કોંગ્રેસ છોડનારા નેતાઓ ભાજપની ‘વોશિંગ મશીન’ અને ભાજપ પ્રેરિત બાગી જૂથમાં આશ્રય લઈ રહ્યા છે. ગઈકાલે પક્ષ છોડનારા મદન મિત્રા અંગે ખુલાસો કરતા તેમણે કહ્યું કે, “જે વ્યક્તિ (મદન મિત્રા) આજે પક્ષ છોડીને ગયા છે, તેમણે ગઈકાલે જ અમને જણાવ્યું હતું કે તેમને અને તેમના પરિવારને કેન્દ્રીય એજન્સી તરફથી સમન મળ્યું છે. ત્યારે જ અમે સમજી ગયા હતા કે તેઓ ટૂંક સમયમાં પાલો બદલી શકે છે. જેમની સેટિંગ થઈ જાય છે, તેઓ ભાજપના વોશિંગ મશીનમાં સાફ થવા જતા રહે છે.”
તાનાશાહીના આક્ષેપો અને પક્ષની આંતરિક સ્થિતિ
અત્રે ઉલ્લેખનીય છે કે, છેલ્લા કેટલાક અઠવાડિયામાં તૃણમૂલ કોંગ્રેસ છોડનારા ઘણા વરિષ્ઠ નેતાઓએ અભિષેક બેનર્જી પર પક્ષને સરમુખત્યારશાહી પદ્ધતિથી ચલાવવાનો અને ભયનું વાતાવરણ ઊભું કરવાનો આક્ષેપ કર્યો હતો. બાગી નેતાઓનું કહેવું છે કે પક્ષમાં હવે જૂના અને વફાદાર નેતાઓનું સન્માન જળવાયું નથી. જોકે, મમતા બેનર્જીએ આ તમામ આક્ષેપોને ફગાવી દીધા છે અને સ્પષ્ટ કર્યું છે કે મુશ્કેલ સમયમાં પણ તેમનો પરિવાર નમવાને બદલે રાજકીય લડત લડવાનું ચાલુ રાખશે.
