ક્રૂડ ઓઈલમાં ઉછાળાની આશંકા: LPG સિલિન્ડર પર તેલ કંપનીઓનું નુકસાન વધ્યું, આગામી દિવસોમાં શું થશે?
વૈશ્વિક બજારમાં કાચા તેલ (ક્રૂડ ઓઈલ)ની કિંમતોમાં સતત થતા ઉતાર-ચઢાવ વચ્ચે ભારતમાં આજે એલપીજી (LPG) ગેસ સિલિન્ડરના ભાવ સ્થિર રહ્યા છે. આ સ્થિરતાથી દેશના કરોડો સામાન્ય ગ્રાહકો અને ગૃહિણીઓને મોટી રાહત મળી છે. આંતરરાષ્ટ્રીય સ્તરે ભૂ-રાજકીય તણાવ અને બેન્ચમાર્ક ક્રૂડની કિંમતોમાં અચાનક આવી રહેલા ફેરફારોને કારણે ગ્લોબલ ઓઈલ માર્કેટમાં ભારે ઉથલપાથલ મચી ગઈ છે. ભારતમાં એલપીજીના દર સીધા સામાન્ય નાગરિકના માસિક બજેટને અસર કરે છે, કારણ કે દેશના મોટા ભાગના ઘરોમાં રાંધણગેસ તરીકે તેનો ઉપયોગ થાય છે.
આજના તાજા LPG સિલિન્ડરના દરો
ઓઈલ માર્કેટિંગ કંપનીઓ (OMCs) દ્વારા 29 સપ્ટેમ્બર 2026 માટે એલપીજી સિલિન્ડરના નવા દરો જાહેર કરવામાં આવ્યા છે. સપ્ટેમ્બર મહિનાની શરૂઆતમાં 19 કિલોગ્રામ વાળા કમર્શિયલ સિલિન્ડરના ભાવમાં રૂ. 9.50નો સામાન્ય વધારો કરવામાં આવ્યો હતો, પરંતુ 14.2 કિલોગ્રામ ધરાવતા ઘરેલુ એલપીજી સિલિન્ડરના ભાવ લાંબા સમયથી યથાવત રાખવામાં આવ્યા છે.
દેશના મુખ્ય શહેરોમાં ઘરેલુ અને કમર્શિયલ સિલિન્ડરના હાલના ભાવ નીચે મુજબ છે:
| શહેર | ઘરેલુ સિલિન્ડર ભાવ (14.2 kg) | કમર્શિયલ સિલિન્ડર ભાવ (19 kg) |
| દિલ્હી | ₹942.00 | ₹2,747.50 |
| મુંબઈ | ₹941.50 | ₹2,701.00 |
| કોલકાતા | ₹968.00 | ₹2,884.00 |
| બેંગલુરુ | ₹944.50 | ₹2,831.00 |
| વિજયવાડા | ₹966.50 | ₹2,890.00 |
| ચેન્નાઈ | ₹957.50 | ₹2,916.50 |
| કટક | ₹968.00 | ₹2,885.00 |
| પ્રયાગરાજ | ₹994.50 | ₹2,885.00 |
| રાંચી | ₹1,010.50 | ₹2,925.50 |
આગામી દિવસોમાં કાચું તેલ વધુ મોંઘું થવાની શક્યતા
પશ્ચિમ એશિયામાં વધી રહેલા ભૌગોલિક-રાજકીય તણાવ અને યુદ્ધની સ્થિતિ વચ્ચે બ્રિકવર્ક રેટિંગ્સે નાણાકીય વર્ષ 2026-27 (FY27) ના બીજા અર્ધવાર્ષિક ગાળા માટે ક્રૂડ ઓઈલ અંગે ગંભીર ચેતવણી આપી છે.
રિપોર્ટ અનુસાર, સામાન્ય પરિસ્થિતિમાં (જેની શક્યતા 55% છે) બ્રેન્ટ ક્રૂડની સરેરાશ કિંમત 95 થી 110 ડોલર પ્રતિ બેરલ રહેવાનું અનુમાન છે. જોકે, જો વૈશ્વિક તણાવ વધુ વકરશે તો હાઈ-રિસ્ક સિનારીયોમાં ક્રૂડ ઓઈલનો ભાવ 120 ડોલર પ્રતિ બેરલના રેકોર્ડ સ્તર સુધી પહોંચી શકે છે.
તેલ કંપનીઓ પર વધતું આર્થિક બોજ અને ભવિષ્યનું ચિત્ર
રેટિંગ એજન્સી ‘ICRA’ ના તાજેતરના અહેવાલ મુજબ, આંતરરાષ્ટ્રીય સ્તરે ઊંચી કિંમતો હોવા છતાં સ્થાનિક ભાવ ન વધારવાના કારણે તેલ કંપનીઓને (OMCs) હાલમાં પ્રતિ ઘરેલુ સિલિન્ડર આશરે રૂ. 300 નું નુકસાન (Under-recovery) થઈ રહ્યું છે.
જો કાચા તેલની કિંમત આંતરરાષ્ટ્રીય બજારમાં 115 થી 125 ડોલર પ્રતિ બેરલ સુધી પહોંચશે, તો ઓઈલ કંપનીઓનું વાર્ષિક નુકસાન વધીને રૂ. 1.21 લાખ કરોડ સુધી થઈ શકે છે. નિષ્ણાતોનું માનવું છે કે તેલ કંપનીઓ આટલું મોટું આર્થિક નુકસાન લાંબા સમય સુધી જાતે વહન કરી શકશે નહીં. ભવિષ્યમાં આ સ્થિતિને પહોંચી વળવા માટે સરકાર તરફથી સબસિડી કે નાણાકીય મદદ મેળવવી પડશે અથવા તો તબક્કાવાર રીતે કિંમતો વધારીને આ બોજ ગ્રાહકો પર નાખવો પડી શકે છે.
