WhatsApp: ભારતીય ટેક માટે ગૌરવની ક્ષણ: ક્રેડના ફાઉન્ડર કુણાલ શાહ હવે વોટ્સએપના વૈશ્વિક વડા
ટેક જગતમાં એક ચોંકાવનારા સમાચાર સામે આવ્યા છે. મેટાની માલિકીની લોકપ્રિય મેસેજિંગ એપ ‘વોટ્સએપ’ના લાંબા સમયથી વડા રહેલા વિલ કેથકાર્ટ હવે તેમની જવાબદારીમાંથી મુક્ત થઈ રહ્યા છે. તેમની જગ્યાએ હવે ભારતીય ઉદ્યોગસાહસિક અને ફિનટેક કંપની ‘ક્રેડ’ (CRED)ના સ્થાપક કુણાલ શાહ વોટ્સએપની વૈશ્વિક કમાન સંભાળશે. આ ફેરફાર માત્ર એક કંપનીના સીઈઓ બદલાવા પૂરતો મર્યાદિત નથી, પરંતુ તે ભારતીય ટેક ક્ષેત્ર માટે એક સીમાચિહ્ન સમાન છે.
વિલ કેથકાર્ટનો વિદાય અને કુણાલ શાહની નવી સફર
વિલ કેથકાર્ટે સોશિયલ મીડિયા પર આ જાણકારી આપતા જણાવ્યું કે, છેલ્લા સાત વર્ષમાં વોટ્સએપ જે રીતે વિકસ્યું છે અને સુરક્ષિત બન્યું છે, તે જોઈને તેમને હવે આગળ વધવાનો આ યોગ્ય સમય લાગ્યો છે. તેમના નેતૃત્વમાં વોટ્સએપે ત્રણ અબજથી વધુ વપરાશકર્તાઓ સુધી એન્ડ-ટુ-એન્ડ એન્ક્રિપ્શન પહોંચાડ્યું છે.
બીજી તરફ, મુંબઈના કુણાલ શાહની સફર પ્રેરણાદાયી રહી છે. ફ્રીચાર્જથી લઈને ક્રેડ સુધીની તેમની સફરમાં તેમણે સાબિત કર્યું છે કે તેઓ યુઝર્સની જરૂરિયાતને સારી રીતે સમજે છે. કેથકાર્ટે કુણાલ શાહની પ્રશંસા કરતા કહ્યું કે, ક્રેડને ભારતની સૌથી મહત્વની ટેક કંપનીઓમાં સ્થાન અપાવનાર કુણાલ શાહ વોટ્સએપના યુઝર્સ માટે પણ એટલા જ સમર્પિત રહેશે.
મેટા અને ક્રેડ વચ્ચેની વ્યૂહાત્મક ભાગીદારી
આ નેતૃત્વ પરિવર્તન પાછળ એક મોટી બિઝનેસ ડીલ પણ જવાબદાર છે. મીડિયા અહેવાલો મુજબ, મેટા હવે ભારતીય ફિનટેક દિગ્ગજ ક્રેડમાં 900 મિલિયન ડોલરનું જંગી રોકાણ કરવા જઈ રહ્યું છે. આ ડીલ બાદ મેટા પાસે ક્રેડમાં લગભગ 20 ટકા હિસ્સો આવશે, જેનાથી કંપનીનું મૂલ્ય અંદાજે 4.5 અબજ ડોલર સુધી પહોંચશે.
આ ભાગીદારીના ભાગરૂપે કુણાલ શાહ ક્રેડના ડે-ટુ-ડે ઓપરેટિંગ રોલમાંથી હટીને વોટ્સએપની વૈશ્વિક નેતૃત્વની ભૂમિકા સ્વીકારશે. ક્રેડમાં હવે મિતેન સંપત વચગાળાના (Interim) સીઈઓ તરીકે કામગીરી સંભાળશે, જ્યારે કુણાલ શાહ ક્રેડમાં એક શેરહોલ્ડર તરીકે જોડાયેલા રહેશે. મહત્વની વાત એ છે કે મેટા રોકાણકાર હોવા છતાં, તેમને ક્રેડના સભ્યોના ડેટા કે ખાનગી વિગતોનો કોઈ એક્સેસ મળશે નહીં, જે ગ્રાહકોની પ્રાઈવસી માટે ખૂબ જ જરૂરી છે.
ભારત માટે આ ડીલ કેમ છે ખાસ?
આ ઘટનાક્રમ ભારતીય ટેક ઇકોસિસ્ટમ માટે બે મોટા સંકેત આપે છે:
ભારતીય પેમેન્ટ માર્કેટ પર પકડ: હાલમાં ભારતમાં ફોન-પે અને ગૂગલ-પેનું વર્ચસ્વ છે. વોટ્સએપ-પે હજુ પણ આ સ્પર્ધામાં પાછળ છે. મેટા હવે ફેસબુક અને ઇન્સ્ટાગ્રામ દ્વારા યુઝર્સને શોધવા, વોટ્સએપ દ્વારા કોમર્સ અને ક્રેડ દ્વારા પેમેન્ટ ઈન્ફ્રાસ્ટ્રક્ચર પૂરું પાડીને એક મજબૂત ડિજિટલ ઈકોસિસ્ટમ બનાવવા માંગે છે.
ભારતીય પ્રતિભાનો વૈશ્વિક સ્વીકાર: આ પ્રથમ વખત છે જ્યારે કોઈ ભારતીય ફાઉન્ડરને વિશ્વની સૌથી મોટી મેસેજિંગ એપની કમાન સોંપવામાં આવી છે, જેના ત્રણ અબજથી વધુ યુઝર્સ છે. આ ભારતની ટેક ક્ષમતાનો વૈશ્વિક મંચ પર વિજય ગણી શકાય.
